އިނގިރޭސި ޕްރިމިއާ ލީގުގައި ހުކުރު ދުވަހުގެރޭ ކުޅުނު މެޗުން ސައުތެމްޓަނުން ލީގުގެ ގަދަ ހަތަރަކަށް ވާދަކުރަމުން އަންނަ ލެސްޓާ ސިޓީއާ އެއްވަރުކޮށްފިއެވެ.

ސައުތެމްޓަނުގެ ދަނޑުގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗުގެ ވަރަށް ކުރީކޮޅު ސައުތެމްޓަނުގެ ޑިފެންޑަރު ޔަނިކް ވެސްޓެގާޑަށް ރެފުރީ ވަނީ ސީދާ ރަތް ކާޑެއް ދައްކާފައެވެ. މެޗު ފަށައިގެން 10 ވަނަ މިނެޓުގައި އޭނާއަށް ރަތް ކާޑެއް ދެއްކީ ލެސްޓާގެ ޖެމީ ވާޑީއަށް ކުރި ފައުލަކާ ގުޅިގެންނެވެ. އެއާއެކު މެޗުގެ ބޮޑުބައި ސައުތެމްޓަނުން އެއް ކުޅުންތެރިއަކު މަދުކޮށް ކުޅެން ޖެހުނު ނަމަވެސް، އެ ޓީމުން ވަނީ މެޗުގައި ރަނގަޅު ކުޅުމެއް ދައްކާފައެވެ.

އެގޮތުން މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީވެސް ސައުތެމްޓަނުންނެވެ. މެޗުގެ 61 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޖޭމްސް ވާޑް-ޕްރައުސްއެވެ. މިއީ އޭރިއާ ތެރެއިން ލެސްޓާގެ ކެލެޗީ އިހެނާޗޯގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ. އެކަމަކު އޭގެ ހަތް މިނެޓު ފަހުން އިހެނާޗޯ ނަގައިދިން ހުރަހަކުން ޖޯނީ އެވަންސް ވަނީ ލަނޑެއް ޖަހައި، ލެސްޓާއަށް ނަތީޖާ އެއްވަރުކޮށްދީފައެވެ.

މި ނަތީޖާއާއެކު ތާވަލުގެ ތިންވަނައިގައި ލެސްޓާ އޮތީ ކުޅުނު 34 މެޗުން 63 ޕޮއިންޓް ލިބިފައެވެ. ހަތަރުވަނައިގައި އޮތް ޗެލްސީއަށް 33 މެޗުން 58 ޕޮއިންޓް ލިބިފައިވާއިރު، ފަސްވަނައިގައި އޮތް ވެސްޓް ހޭމް ޔުނައިޓެޑަށް 33 މެޗުން ލިބިފައިވަނީ 55 ޕޮއިންޓެވެ. އަދި ގަދަ ހަތަރަކަށް ވާދަކުރާ އެންމެ ފަހުގެ ޗެމްޕިއަން ލިވަޕޫލް އޮތީ ތާވަލުގެ ހަވަނައިގައި 33 މެޗުން 54 ޕޮއިންޓާއެކުއެވެ. މީގެ އިތުރުން ލެސްޓާއާ އެއްވަރުކުރި ސައުތެމްޓަން އޮތީ ތާވަލުގެ 14 ވަނައިގައި 33 މެޗުން 37 ޕޮއިންޓާއެކުއެވެ.