އިޓާލިއަން ލީގުގައި ބުދަ ދުވަހުގެރޭ ސްޕެޒިއާއާ އެއްވަރުވެ، ތާވަލުގެ އެއްވަނައިގައި ލީޑުފުޅާކުރަން ލިބުނު ފުރުސަތު އިންޓަ މިލާނުން ނަގާލިއިރު، ފަހަތުން އަރައި ޕާމާ ބަލިކޮށް އެންމެ ފަހުގެ ޗެމްޕިއަން ޔުވެންޓަސްއިން މުހިންމު މޮޅެއް ހޯދައިފިއެވެ.

ސްޕެޒިއާ އާއި އިންޓަ ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.

ސްޕެޒިއާގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހައި، ލީޑު ނަގާފައިވަނީވެސް އެ ޓީމުންނެވެ. އެގޮތުން މެޗުގެ 12 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޑިއޭގޯ ފަރިއާސްއެވެ. އެކަމަކު މެޗުގެ 39 ވަނަ މިނެޓުގައި އިވާން ޕެރިސިޗް ވަނީ އިންޓައަށް ނަތީޖާ އެއްވަރުކޮށްދީފައެވެ. އަދި އޭގެ ފަހުން ލީޑު ނަގަން އިންޓަގެ ރޮމެލޫ ލުކާކޫއަށް ހުސް ފުރުސަތެއް ލިބުނު ނަމަވެސް، އެ ފުރުސަތުގެ ބޭނުން ހިފިފައެއް ނުވެއެވެ.

މި މެޗުން އިންޓަ އެއްވަރުވިއިރު، ބުދަ ދުވަަހުގެރޭ ކުޅުނު މެޗުން ތާވަލުގެ ދެވަނައިގައި އޮތް އޭސީ މިލާން ވަނީ ސަސުއޯލޯ އަތުން 2-1 ގެ ނަތީޖާއަކުން ބަލިވެފައެވެ. އެހެންކަމުން ތާވަލުގެ އެއްވަނައިގައި 12 ޕޮއިންޓަށް ލީޑުފުޅާކުރަން އިންޓައަށް ފުރުސަތެއް އޮތް ނަމަވެސް، އެ ޓީމު މި ވަގުތު އެއްވަނައިގައި އޮތީ 10 ޕޮއިންޓުގެ ލީޑަކާއެކުއެވެ. ކުޅުނު 32 މެޗުން 76 ޕޮއިންޓް އިންޓައަށް ލިބިފައިވާއިރު، މިލާން ދެވަނައިގައި އޮތީ 32 މެޗުން 66 ޕޮއިންޓާއެކުއެވެ.

މީގެ އިތުރުން ލީގުގައި ބުދަ ދުވަހުގެރޭ ކުޅުނު މެޗުން ޕާމާ އަތުން ފަހަތުން އަރައި ޔުވެންޓަސް މޮޅުވީ 3-1 ގެ ނަތީޖާއަކުންނެވެ.

ޔުވެންޓަސްގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ޕާމާއިންނެވެ. މެޗުގެ 25 ވަނަ މިނެޓުގައި ހިލޭ ޖެހުމަކުން މި ލަނޑު އެ ޓީމަށް ކާމިޔާބުކޮށްދިނީ ގެސްޓޮން ބްރޫގްމަނެވެ. އެކަމަކު ފުރަތަމަ ހާފު ނިމުމުގެ ކުރިން އަލެކްސް ސަންޑްރޯ ވަނީ ޔުވެންޓަސްއަށް ނަތީޖާ އެއްވަރުކޮށްދީފައެވެ. އަދި ދެވަނަ ހާފު ފަށައިގެން ދެވަނަ މިނެޓުގައި ސަންޑްރޯ ވަނީ އިތުރު ލަނޑެއް ޖަހައި، ޔުވެންޓަސް ކޮޅަށް ނަތީޖާ އަނބުރާލާފައެވެ. ދެން މި މެޗުގައި ޔުވެންޓަސްއިން ކާމިޔާބުކުރި ތިންވަނަ ލަނޑު މެޗުގެ 68 ވަނަ މިނެޓުގައި ކާމިޔާބުކޮށްދިނީ މަތައިސް ޑި ލީޓެވެ.

މި މޮޅާއެކު ޔުވެންޓަސް ވަނީ ތާވަލުގެ ތިންވަނައަށް ޖެހިލާފައެވެ. ކުޅުނު 32 މެޗުން 65 ޕޮއިންޓް ޔުވެންޓަސްއަށް ލިބިފައިވާއިރު، ހަތަރުވަނައިގައި އޮތް އެޓަލާންޓާއަށް ވަނީ 31 މެޗުން 64 ޕޮއިންޓް ލިބިފައެވެ. އެހެންކަމުން ލީގުގައި ބުރާސްފަތި ދުވަހުގެރޭ ރޯމާ އަތުން މޮޅުވެގެން އަލުން ތިންވަނައަށް އެރުމުގެ ފުރުސަތު އެޓަލާންޓާއަށް އެބައޮތެވެ.