ލޯކަލް ކައުންސިލް އިންތިޚާބުގައި މިހާތަނަށް ގުނި ފޮށިތަކުން މާލޭ ސިޓީގެ މޭޔަރުކަމަށް ޕީޕީއެމްގެ ފަރާތުން ވާދަކުރައްވާ ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު 59 އިންސައްތައިގެ ކުރިއެރުމެއް ހޯއްދަވައިފިއެވެ.

އިންތިޚާބުގެ ވަގުތީ ނަތީޖާ ދައްކާ ގޮތުން މިހާތަނަށް ޑރ. މުއިއްޒަށް ޖުމްލަ 3067 ވޯޓު ލިބިވަޑައިގެންފައިވެއެވެ. މި ގޮނޑިއަށް ވާދަކުރައްވާ އެމްޑީޕީގެ ކެންޑިޑޭޓް އަނަސް އަބްދުއްސައްތާރަށް ލިބިވަޑައިގެންފައިވަނީ 1702 ވޯޓެވެ. އަދި އަމިއްލަ ގޮތުން ވާދަކުރެއްވި އަލްހާން ފަހުމީއަށް 52 ވޯޓެވެ.

އެހެންކަމުން އިންތިޚާބުގެ ވަގުތީ ނަތީޖާ ދައްކާ ގޮތުން މާލޭ ސިޓީގެ މޭޔަރު ކަމުގެ ގޮނޑިއަށް ވާދަ ކުރައްވާ ކެންޑިޑޭޓުންގެ ތެރެއިން މި ގޮނޑި ކާމިޔާބު ކުރެއްވުން ގާތީ ޑރ.މުއިއްޒެވެ.  

މާލެ ސަރަހައްދުގައި ޖުމްލަ 371 ވޯޓު ފޮއްޓެއް ބަހައްޓާފައިވެއެވެ. މި ފޮށިތަކަށް ވޯޓުލުމުގެ ހައްގު މާލޭގެ 48،000 އަށްވުރެ ގިނަ ރައްޔިތުންނަށް ލިބިފައިވެއެވެ.