ކައުންސިލް އިންތިޚާބު މިފަހަރު ބޮޑުތަނުން އެމްޑީޕީ ކާމިޔާބު ކުރާނެކަމަށް ރައިސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ވޯޓުލެއްވުމަށް ފަހު ނޫސްވެރިންނާއި ބައްދަލުކުރައްވަމުން ރައީސް ވިދާޅުވީ ޕީޕީއެމްގެ ޓިކެޓުގައި ވާދަކުރައްވާ ޑރ. މުހައްމަދު މުއިއްޒު ބަލިކޮށް އެމްޑީޕީ ޓިކެޓުގައި ވާދަކުރައްވާ އަނަސް އައްބުއްސައްތާރު މާލޭގެ މޭޔަރުކަމަށް ހޮވޭނީ މަދުވެގެން 65 އިންސައްތައިގެ ވޯޓުން ކަމަށެވެ. އެންމެފަހުން 2019 ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިޚާބުގައި އެމްޑީޕީއަށް ލިބުނު މެޖޯރިޓީއަށް ވުރެ ބޮޑު މެޖޯރިޓީއެއް މިފަހަރު ލިބޭނެ ކަމަށް އުއްމީދު ކުރައްވާ ކަމަށްވެސް ވިދާޅުވިއެވެ.
މިހާރު ކުރިއަށްދާ ލޯކަލް ކައުންސިލް އިންތިހާބުގައި އެންމެ ވާދަވެރިކަން ބޮޑު ގޮނޑިއަކީވެސް މާލެ ސިޓީގެ މޭޔަރުގެ ގޮނޑިއެވެ.
ރައީސް ސާލިހު ވިދާޅުވީ މިއީ ލާމަރުކަޒީ ގާނޫނަށް އިސްލާހު ގެނެސް ކައުންސިލްތަކަށް ބާރު ދީގެން އިންތިޚާބު ކުރެވޭ ފުރަތަމަަ ކައުންސިލް ކަމަށާއި އެމަނިކުފާނުގެ ވިސްނުންފުޅަކީ ކައުންސިލްތަކަށް ވީހާވެސް ބޮޑަށް ބާރުތައް ދޫކޮށްލުން ކަމުގައެވެ.
