ރާއްޖޭގައި ކޮވިޑް ވެކްސިން ދޭންޖެހޭ އާބާދީގެ 57 އިންސައްތައަށް ވެކްސިންގެ ފުރަތަމަ ޑޯޒް ދީފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން އެކަން ހާމަކޮށް ވަނީ ޓްވީޓެއްކޮށްފައެވެ. އެޗްޕީއޭއިން އެންމެ ފަހުން ހާމަކޮށްފައިވާ ތަފާސްހިސާބަށް ބަލާއިރު ރާއްޖޭގައި ކޮވިޑް ވެކްސިންގެ ފުރަތަމަ ޑޯޒް 251،139 މީހަކަށް ވަނީ ދީފައެވެ.
ރާއްޖޭގައި ކޮވިޑް-19 ވެކްސިން ދިނުމުގެ ޕްރޮގްރާމް ފަށާފައިވަނީ ފެބްރުއަރީ މަހުގެ 1 ވަނަ ދުވަހުއެވެ. އެންމެ ފުރަތަމަ ރާއްޖޭގައި ޖަހާފައިވަނީ އިންޑިޔާއިން ދިން ކޮވިޝީލްޑް ވެކްސިނެވެ. އެވެކްސިންގެ ދެ ލައްކަ ޑޯޒް ހުސްވަންދެން ރާއްޖޭގައި އެވެކްސިން ޖަހާފައިވެއެވެ. އެގޮތުން މާލެ ސަރަހައްދުގައި މަރޗް މަހުގެ 15 ވަނަ ދުވަހާ ޖެހެންދެން ކޮވިޝީލްޑް ވެކްސިންގެ ފުރަތަމަ ޑޯޒް ދެމުން އައުމަށްފަހު ވެކްސިން ދިނުން މެދުކަނޑާލިއެވެ. އެއަށްފަހު މާލެ ސަރަހައްދުގައި ފުރަތަމަ ޑޯޒް ޖަހަންފެށީ މަރޗް މަހުގެ 23 ވަނަ ދުވަހުއެވެ. ދެން މާލެ ސަރަހައްދުގައި ޖަހަން ފަށާފައިވަނީ ޗައިނާގެ ސިނޮފަރމް ވެކްސިނެވެ. މިވެކްސިންގެ ދެ ލައްކަ ޑޯޒް ވަނީ ލިބިފައެވެ.
މީގެއިތުރުން ރާއްޖެއަށް ވަނީ ފައިޒަރ ވެކްސިންގެ 5500 ޑޯޒް ލިބިފައެވެ. އެޗްޕީއޭއިން ވަނީ މިވެކްސިން ޖަހާނީ ވަކި ޚާއްސަ ހާލަތްތަކުގައިވާ މީހުންނަށް އެކަނިކަން ހާމަކޮށް އެފަރާތްތަކުން ރަޖިސްޓްރީވުމުގެ ފުރުސަތު ހުޅުވާލާފައެވެ. އަދި ފައިޒަރ ވެކްސިން ޖަހާނީ ހަމައެކަނި މާލެ ސަރަހައްދުގައި ކަމަށާއި ވެކްސިން ޖަހާނީ ފައިޒަރ ވެކްސިންގެ މުޅި އަދަދުން 2 ޑޯޒް ފޯރުކޮށްދެވޭނެ އަދަދަށް ބަލައިގެން ކަމަށްވެސް އެޗްޕީއޭއިން ވަނީ ބުނެފައެވެ.
އެންމެ ފުރަތަމަ ކޮވިޝީލްޑް ވެކްސިން ޖެހި މީހުންނަށް މިހާރު އަންނަނީ އެވެކްސިންގެ ދެ ވަނަ ޑޯޒް ޖަހަމުންނެވެ. ކޮވިޝީލްޑް ވެކްސިންގެ ދެވަނަ ޑޯޒް ޖަހަން ޖެހެނީ ފުރަތަމަ ޑޯޒް ޖަހާތާ 8 ހަފްތާއާއި 12 ހަފްތާ ފަހުންނެވެ. ދެ ވަނަ ޑޯޒް ޖަހަން ފަށާފައިވަނީ އޭޕްރީލް މަހުގެ 3 ވަނަ ދުވަހުއެވެ. މިހާތަނަށް ދެ ވަނަ ޑޯޒް 5753 މީހަކު ވަނީ ޖަހާފައެވެ.
ރާއްޖޭގައި ދިރިއުޅޭ ދިވެހިންގެ އިތުރުން ބިދޭސީންނަށްވެސް އަންނަނީ ވެކްސިން ދެމުންނެވެ.
