ފީފާ ވޯލްޑް ކަޕުގެ ޔޫރަޕް ކޮލިފައިންގައި އަންގާރަ ދުވަހުހެރޭ ކުޅުނު މެޗުތަކުން ޕޮޗުގަލާއި، ބެލްޖިއަމް އަދި ނެދަލެންޑްސް މޮޅުވެއްޖެއެވެ.

ގްރޫޕް އޭގައި ހިމެނޭ ޕޯޗުގަލް މޮޅުވީ ލަގްޒަމްބާގް އަތުން ފަހަތުން އަރައި 3-1 ގެ ނަތީޖާއަކުންނެވެ.

ލަގްޒަމްބާގުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީވެސް އެ ޤައުމުންނެވެ. އެގޮތުން މެޗުގެ 30 ވަނަ މިނެޓުގައި ލަގްޒަމްބާގަށް ލީޑު ނަގައިދިން ލަނޑު ކާމިޔާބުކޮށްދިނީ ޖާސަން ރޮޑްރިގޭސެވެ. އެކަމަކު ފުރަތަމަ ހާފުގެ ފަހު މިނެޓުގައި ޑިއޯގޯ ޖޮޓާ ވަނީ ޕޯޗުގަލަށް ނަތީޖާ އެއްވަރުކޮށްދީފައެވެ. މި މެޗުގައި ޕޯޗުގަލުން ފަހަތުން އަރައި ލީޑު ނަގާފައިވަނީ ދެވަނަ ހާފު ފަށައިގެން ހަވަނަ މިނެޓުގައެވެ. މި ލަނޑު އެ ޤައުމަށް ކާމިޔާބުކޮށްދިނީ ކެޕްޓަން ކްރިސްޓިއާނޯ ރޮނާލްޑޯއެވެ. އަދި މެޗު ނިމެން 10 މިނެޓަށް ވެފައި ވަނިކޮށް ޖޮއާއޯ ޕަލީނިއާ ޕޯޗުގަލަށް ލީޑު ފުޅާކޮށްދީފައެވެ.

މި ޕޯޗުގަލް މޮޅުވިއިރު، ގްރޫޕް އޭގެ އެއްވަނައިގައި އެ ޤައުމު އޮތީ ކުޅުނު ތިން މެޗުން ލިބު ހަތް ޕޮއިންޓާއެކުއެވެ. ތާވަލުގެ ދެވަނައިގައި އޮތް ސާބިއާއަށްވެސް ތިން މެޗުން ހަތް ޕޮއިންޓް ލިބިފައިވާއިރު، އަންގާރަ ދުވަހުހެރޭ ކުޅުނު މެޗުން ސާބިއާ ވަނީ ރަށުން ބޭރުގައި އަޒަރުބައިޖާން އަތުން 2-1 ގެ ނަތީޖާއަކުން މޮޅުވެފައެވެ.

މީގެ އިތުރުން ގްރޫޕް އީގައި ހިމެނޭ ބެލްޖިއަމް މޮޅުވީ ބެލަރޫސް އަތުން 8-0 ގެ ތަފާތު ބޮޑު ނަތީޖާއަކުންނެވެ.

އަމިއްލަ ޤައުމުގައި ކުޅުނު މެޗުގައި ބެލްޖިއަމުން މޮޅު ކުޅުމެއް ދެއްކިއިރު، މި މެޗުގައި ބެލްޖިއަމުގައި ހާންސް ވަނަކެންނާއި ލެއަންޑްރޯ ޓްރޮސާޑް ވަނީ ކޮންމެ ކުޅުންތެރިއަކު ދެ ލަނޑު ޖަހާފައެވެ. ދެން މި މެޗުގައި ބެލްޖިއަމުން ކާމިޔާބުކުރި ލަނޑުތައް ޖަހައިދިނީ މިޝީ ބަޓްޝުއާއީ އާއި، ޖެރެމީ ޑޯކޫ އާއި، ޑެނިސް ޕްރައެޓް އަދި ކްރިސްޓިއަން ބެންޓެކޭއެވެ.

މި މެޗުން ފަސޭހަކަމާއެކު ބެލްޖިއަމް މޮޅުވިއިރު، ގްރޫޕް އީގެ އެއްވަނައިގައި އެ ޤައުމު އޮތީ ކުޅުނު ތިން މެޗުން ލިބު ހަތް ޕޮއިންޓާއެކުއެވެ. އަދި ތާވަލުގެ ދެވަނައިގައި އޮތް ޗެކް ރިޕަބްލިކަށް ތިން މެޗުން ހަތަރު ޕޮއިންޓް ލިބިފައިވާއިރު، މި ގްރޫޕުގައި ދެން އޮތް ވޭލްސް އާއި ބެލަރޫސަށް ދެ މެޗުން ލިބިފައިވަނީ ތިން ޕޮއިންޓެވެ.

މީގެ އިތުރުން ގްރޫޕް ޖީއަށް ބަލާލާއިރު، މި ގްރޫޕުގައި ހިމެނޭ ނެދަލެންޑްސް މޮޅުވީ ޖިބްރަލްޓާ އަތުން 7-0 ގެ ތަފާތު ބޮޑު ނަތީޖާއަކުންނެވެ.

ރަށުން ބޭރުގައި ކުޅުނު މި މެޗުގައި ނެދަލެންޑްސްއިން މޮޅު ކުޅުމެއް ދެއްކިއިރު، މި މެޗުގައި ނެދަލެންޑްސްގެ މެމްފިސް ޑިޕާއި ވަނީ ދެ ލަނޑު ޖަހާފައެވެ. ދެން މި މެޗުގައި ނެދަލެންޑްސްއިން ކާމިޔާބުކުރި ލަނޑުތައް ޖަހައިދިނީ ސްޓީވެން ބެއާހަސް އާއި، ލޫކް ޑި ޔޮންނާއި، ޖިއޮޖީނިއޯ ވައިނަލްޑަމާއި، ޑޮންޔެލް މަލެން އަދި ޑޮނީ ވެން ޑަ ބީކެވެ.

މި މެޗުން ނެދަލެންޑްސް މޮޅުވި ނަމަވެސް، ގްރޫޕް ޖީގެ އެއްވަނައިގައި އޮތީ އަންގާރަ ދުވަހުހެރޭ ލަޓްވިއާއާ 3-3 ގެ ނަތީޖާއަކުން އެއްވަރުވި ތުރުކީއެވެ. އެގޮތުން ތުރުކީއަށް ކުޅުނު ތިން މެޗުން ހަތް ޕޮއިންޓް ލިބިފައިވާއިރު، ދެވަނައިގައި އޮތް ނެދަލެންޑްސްއަށް ތިން މެޗުން ލިބިފައިވަނީ ހަ ޕޮއިންޓެވެ. އަދި ތާވަލުގެ ތިންވަނައިގައި އޮތް މޮންޓެނީގްރޯ އާއި ހަތަރުވަނައިގައި އޮތް ނޯވޭއަށްވެސް ތިން މެޗުން ވަނީ ހަ ޕޮއިންޓް ލިބިފައެވެ.