މޯލްޑިވްސް ކޮންސިއުމަރ ފެއަރ 2017 ހުޅުވައިފި އެވެ.
ބުރާސްފަތި ދުވަހު އާރޓް ގެލެރީގައި މިފެއަރ ހުޅުވައިދެއްވީ މޯލްޑިވްސް ޕޯޓްސް ލިމިޓެޑްގެ ސީއީއޯ އިބްރާހިމް އަބްދުއްރައްޒާޤު ޚަލީމެވެ.
ރާއްޖޭގައި ބާއްވާ އެންމެ ބޮޑު ޝޮޕިންގ ފެސްޓިވަލްގެ ގޮތުގައި ކުރިއަށްދާ މިފެއަރގައި 15 ކުންފުންޏަކުން ވަނީ ބައިވެރިވެފައެވެ. އަދި މިއީ ހޯލްސޭލް ވިޔަފާރިވެރިންނާއި ރީޓެއިލް ވިޔަފާރިވެރިންނާއި ސަޕްލަޔަރުންނާއި މެނުފެކްޓްޗަރުންނަށް ޚާއްޞަ ފެއަރ އެކެވެ.
ބުރާސްފަތި ދުވަހުން ފެށިގެން އަންނަ ހޮނިހިރު ދުވަހުގެ ނިޔަލަށް ކުރިއަށްދާ މިފެއަރގައި ރާއްޖެއަށް މުޅިން އަލަށް އުފެއްދުންތައް ތަޢާރަފްކުރުމާއި ސްޓޯލްތަކުން ވިޔަފާރި ކުރުމުން ހާއްސަ ޑިސްކައުންޓާއި ކާބޯތަކެތީގެ ރަހަ ބެލުމުގެ ފުރުޞަތާއި، ތަފާތު އެކި ވައްތަރުގެ މުދާ އެއްތަނަކުން ލިބިގެންދާނެ އެވެ.
އަދި ޢާންމުކޮށް ގޭތެރޭގައި ގެންގުޅޭ ސާމާނާއި އިލެކްޓްރޯނިކް ސާމާނާއި ކާބޯތަކެތީގެ ބާވަތްތައްވެސް ސްޓޯލްތަކުން ދެއްކުމަށް ވަނީ ހަމަޖެހިފައެވެ.
މިފެއަރ އިންތިޒާމްކުރާ ބްލަކް ޕްރައިވެޓް ލިމިޓެޑުން ބުނީ މިފަހަރުގެ ފެއަރއަށް ޒިޔާރަތްކުރާ މީހުންގެ މެދުގައި ކޮންމެ ގަޑިއަކު އެއްފަހަރު ލަކީޑްރޯއެއް ނެގުމަށާއި އަދި ކޮންމެ ދުވަހަކު ގްރޭންޑް ޕްރައިޒް ވިނަރއެއް ހޮވުމަށް ހަމަޖެހިފައި ކަމަށެވެ.
މިއީ، މޯލްޑިވްސް ކޮންސިއުމަރ ފެއަރ ބާއްވާ 5 ވަނަ ފަހަރެވެ.
