ހޮނިހިރު ދުވަހު ރާއްޖެއިން 2434 މީހުންނަށް ކޮވިޑް-19 ވެކްސިން ދީފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ހާމަކޮށްފައިވާ ތަފާސްހިސާބުތަކަށް ބަލާއިރު ހޮނިހިރު ދުވަހު މާލެ ސަރަހައްދުން 1016 މީހުންނަށް ވަނީ ވެކްސިން ދީފައެވެ. އަދި އަތޮޅުތަކުން 1418 މީހުންނަށް ވަނީ ވެކްސިންދީފައެވެ. މިއާއެކު މުޅި ރާއްޖޭގައި ވެކްސިން ދިން މީހުންގެ އަދަދު ވަނީ 230،130ށް އަރާފައެވެ.

މީގެތެރެއިން 128،293 މީހުންނަށް ވެކްސިން ދިނީ މާލެ ސަރަހައްދުންނެވެ. އަދި އަތޮޅުތަކުން 101،837 މީހުންނަށް ވަނީ ވެކްސިން ދީފައެވެ.

ކޮވިޑް-19ށް ވެކްސިން ދިނުމުގެ ޕްރޮގްރާމް ރާއްޖޭގައި ފަށާފައިވަނީ ފެބްރުއަރީ މަހުގެ 1 ވަނަ ދުވަހުއެވެ. އެންމެ ފުރަތަމަ ރާއްޖޭގައި ދީފައިވަނީ އިންޑިޔާގެ ސެރަމް އިންސްޓިޓިއުޓުން އުފެއްދި ކޮވިޝީލްޑް ވެކްސިނެވެ. އެވެކްސިން މާރޗް މަހުގެ 15 ވަނަ ދުވަހާ ހަމައަށް މާލޭގައި ދެމުން އައިސްފައިވެއެވެ. އޭގެފަހުން މިހާރު ދެމުން އަންނަނީ ޗައިނާގެ ސިނޯފަރމް އިން އުފައްދާފައިވާ ވެކްސިނެވެ. އުމުރުން 18 އަހަރާއި 60 އަހަރާ ދެމެދުގެ މީހުންނަށް ދެމުން އަންނަނީ ސިނޯފަރމް ވެކްސިނެވެ.

މާލޭގެ 8 ތަނަކުން ވެކްސިން ދެމުން އަންނައިރު މޯބައިލް ޓީމުގެ ގޮތުގައި 2 ޓީމެއް އަންނަނީ މާލޭގައި ވެކްސިން ދިނުމުގައި ހަރަކާތްތެރިވަމުންނެވެ. އަދި އަތޮޅުތަކުގައި 169 ތަނަކުން އަންނަނީ ވެކްސިން ދެމުންނެވެ.