އިންޑިއާގައި މިހާތަނަށް އުފެދުނު އެންމެ މޮޅު ކްރިކެޓް ކުޅުންތެރިޔާ ސަޗިން ޓެންޑުލްކާ ކޮވިޑް-19 އަށް ފައްސިވެއްޖެއެވެ.

ސަޗިން  ކޮވިޑަށް ފައްސިވެފައިވާކަން ހޮނިހިރު ދުވަހު، ޓްވިޓާ މެދުވެރިކޮށް އޭނާ ވަނީ ހާމަކޮށްފައެވެ. އޭނާ ބުނެފައިވާ ގޮތުގައި ކޮވިޑުގެ އަލާމަތްތައް ކޮންމެވެސް ވަރަކަށް ހަށިގަނޑުން ފެންނަށް އެބަހުއްޓެވެ. އެހެންކަމުން ޑޮކްޓަރުގެ އިރުޝާދުގެ ދަށުން، އޭނާ ވަނީ އަމިއްލައަށް ގޭގައި ކަރަންޓީނު ވެފައެވެ.

ފާއިތުވެދިޔަ އެއް އަހަރު ދުވަހު، ދޭތެރެދޭތެރެއިން އަމިއްލައަށް ކޮވިޑަށް ޓެސްޓުކުރަމުން ގެންގޮސްފައިވާ ކަމަށް ސަޗިން ބުނެފައިވެއެވެ.  

ސަޗިން އަކީ އިންޑިއާގެ ޤައުމީ ކުރިކެޓް ޓީމުގެ ކައްޕިކަން ކޮށް، ގިނަ ކާމިޔާބީތަކެއް ހޯދާފައިވާ ކުޅުންތެރިއެެވެ. އަދި "އިންޑިއާ ލެޖެންޑްސް" ޓީމުގެ ކައްޕިކަމުގައި ދާދިފަހުން ރައިޕޫރުގައި އޮތް ރޯޑް ސޭފްޓީ ވޯލްޑް ސީރީޒްވެސް ކާމިޔާބުކޮށްފައިވެއެވެ. މި މުބާރާތް އެ ޓީމުން ކާމިޔާބުކޮށްފައިވަނީ، ފައިނަލުގައި ސްރީލަންކާ ލެޖެންޑްސްއާ ވާދަކޮށް، ކުރި ހޯދައިގެންނެވެ.

ކޮވިޑުގެ ހާލަތު އިންޑިއާގެ މަހަރަޝްޓްރަގައި މިހާރު ވަނީ ވަރަށް ބޮޑަށް ގޯސްވެފައެވެ. އެ ސަރަޙައްދުން ހުކުރު ދުވަހު އެކަނިވެސް 36،000 މީހުން ފައްސިވެފައިވެއެވެ.