އިންޑިއާގެ ކާމިޔާބު ބެޑްމިންޓަން ކުޅުންތެރިޔާ ޕުސަރްލާ ވެންކަޓަ "ޕީވީ" ސިންދޫގެ ހަޔާތުގެ މައްޗަށް ފިލްމެއް އުފައްދަން ނިންމައި އޭނާގެ ރޯލު ކުޅޭނެ އެކްޓަރުވެސް ހަމަޖެހިއްޖެ ކަމަށް އިންޑިއާގެ ނޫސްތަކުން ބުނެފިއެވެ.
ޚަބަރުތައް ބުނާ ގޮތުން ސިންދޫގެ ރޯލުން ފެނިގެން ދާނީ ކުޅަދާނަ ބަތަލާ ދީޕިކާ ޕަދުކޯން އެވެ.
ޕީވީ ސިންދޫގެ ހަޔާތުގެ މައްޗަށް އުފައްދާ ފިލްމު ޕްރޮޑިއުސް ކުރާނީ ސޯނޫ ސޫދު އެވެ. ސޯނޫ މި ފިލްމާއި ބެހޭގޮތުން ބުނެފައިވަނީ މި ފިލްމު ހެދުމަށް ވަރަށް ޝައުގުވެރިކަން އުފެދިފައިވާކަމަށެވެ. އަދި މިއީ ފިލްމު އުފައްދަން އެންމެ އެކަށީގެންވާ ވަގުތުކަމަށެވެ.
ސޯނޫ ބުނީ ޕީވީގެ ފިލްމެއް ހަދަން އޭނާ ޝައުގުވެރިކަން އުފެދުނީ ސޯނޫ ރިހިމެޑެލް ހޯދި ހިސާބުން ކަމަށެވެ. އަދި މި ފިލްމު ހެދުމަށް ހިޔާލުކުރީ ވަރުގަދަ ރިސާޗެއް ހެދުމަށްފަހުގައި ކަމަށެވެ.
އަދި އެ ރިސާޗުން އެނގިގެން ދިޔައީ ޕީވީ ބެޓްމިންޓަން ކުޅުމަށް ދާއިރު ކޮންމެ ފަހަރަކުވެސް ގެއިން ފެށިގެން 50 ކިލޯމީޓަރުގެ ދަތުރެއް ކުރުމަށްފަހުގައި ކަމަށާއި އޭގެން ވަރަށް ބޮޑު ހިތްވަރެއް ލިބުނު ކަމަށް އޭނާ ބުނެފައިވެއެވެ.
ސޯނޫ ބުނީ މިހާރު ކުރަމުން ދަނީ ފިލްމުގެ ސްކްރިޕްޓު ލިޔުމުގެ ކަންތައްތައް ކަމަށެވެ. އަދި މި ފިލްމަކީ ބެލުންތެރިން ބަލައިގަންނާނެ ފިލްމެއްކަމަށް އުއްމީދު ކުރާކަމަށް އޭނާ ބުންޏެވެ.
