މަޑުއްވަރީގައި ކުޑަކުއްޖަކު ރޭޕްކުރި މީހުންގެ ތެރޭގައި ފުލުހެއް ވެސް ހިމެނޭ ކަމަށް "ރާއްޖެ އެމްވީ"އަށް އެނގިއްޖެއެވެ.

އެރަށުގައި ރަށު ސްކޫލްގެ ޓީޗަރަކާއި އިތުރު ބަޔަކު އުމުރުން 14 އަހަރުގެ އަންހެން ކުއްޖެއް ގޭންގް ރޭޕް ކުރި މައްސަލައެއް ފެންމަތިވެ އެ ރަށުގައި ވަނީ ހަމަނުޖެހުން ބޮޑުވެފައެވެ. އެ މައްސަލާގައި ކުއްޖާ ޖެންޑަރ މިނިސްޓްރީގެ ބެލުމުގެ ދަށަށް ގެންގޮސްފައިވާއިރު، އެ ކުއްޖާ ވަނީ ކަން ހިނގައި ދިޔަގޮތުގެ ބަޔާނެއް ވެސް މިނިސްޓްރީއަށް ދީފައެވެ. އެކަމުގައި ބައިވެރިވި ޓީޗަރަކީ އެ ރަށު ސްކޫލްގައި ކިޔަވައިދޭ އެ ރަށު މީހެކެވެ.

"ރާއްޖެ އެމްވީ" އަށް އެނގިފައިވާގޮތުގައި އެކަމުގައި ފުލުހެއް ވެސް ބައިވެރިވި ކަމަށް ކުއްޖާ ބުނެއެވެ. އޭނާ ގެންދިޔައީ ސްކޫލް ޕްރޮޖެކްޓެއްގެ ނުނިމި އޮތް ބައި ފުރިހަމަކުރުމަށް ކަމަށް ބުނެ ގެއަކަށް ކަމަށާއި، އެތަނަށް ވަންއިރު ޓީޗަރުގެ އިތުރަށް ދެ ފިރިހެނުން ތިބި ކަމަށް އެނގިފައިވެއެވެ. އޭގެ ތެރެއިން އެކަކަކީ ފުލުހެއް ކަމަށް ވެސް ވެއެވެ. އެމީހާ ހުރީ ވެސް ފުލުހުންގެ ޔުނީފޯމުގައި ކަމަށާއި އެއީ ފުލުހުންގެ ވަރަށް ބޮޑު މީހެއް ކަމަށް ބުނެ ކުއްޖާއަށް ބިރުދެއްކި ކަމަށް ވެސް ކުއްޖާއާ ހަވާލާދީ މައުލޫމާތު ލިބިފައިވެއެވެ.

އެތަނަށް ވައްދާފައި، އެއިން އެއްވެސް ވާހަކައެއް ނުބުނުމަށާއި، ބުނެފި ނަމަ އާއިލާގެ އެންމެން މަރާލާނެ ކަމަށް ބުނެ ބިރު ދެއްކި ކަމަށް ކުއްޖާ ބުނެފައިވާ ކަން ވެސް އެނގިފައިވެއެވެ. އަދި އެހެން ބުނެ ބިރު ދައްކާ ޖޫސްތައްޓެއް ދިނީ ކަމަށާއި އޭގެ ފަހުން އޭނާ މަޑުމަޑުން ހޭނެތެމުން ދިޔަ އިރު ހަތަރެސްފައި ބަންނަމުން ދިޔަކަން އެ ކުއްޖާއަށް އެނގޭ ކަމަށް ވެސް އެކުއްޖާގެ ބަޔާނާ ހަވާލާދީ "ރާއްޖެއެމްވީ" އަށް މައުލޫމާތު ލިބިފައިވެއެވެ.

އެކަން ހިނގާފައި ވަނީ މީގެ ދެ ހަފްތާ ވަރު ކުރިން ކަމަށާއި، އޭގެ ފަހުން ކުއްޖާ އަށް ވަރަށް ބޮޑަށް ނަފްސާނީ ގޮތުން އަސަރުކޮށްފައިވާ ކަމަށް ވެސް މައުލޫމާތު ލިބިފައިވެއެވެ. އެގޮތުން ދެ ފިރިހެނަކު އެއްތަނަކުން ފެނުނަސް ބިރުން ހަޅޭއް ލަވާ ކަމަށާއި، އަބަދު އެއްތަނަކަށް ބަލަހައްޓައިގެން މީހުންނާ ވާހަކަ ނުދައްކާ އިނދެ ރޮއެ ހަޅޭއް ލަވާ ހަދާ ކަމަށް ވެސް ވެއެވެ. އެކަންކަމުގައި އެ ކުއްޖާއަށް ރަށު ހޮސްޕިޓަލުގައި ބާއްވައިގެން ފަރުވާދެމުން ދިޔައިރު ވެސް އެއްވެސް މީހަކު ކުއްޖާއާ ގާތްވިޔަ ނުދޭ ކަމަށް ވެސް މައުލޫމާތު ލިބިފައިވެއެވެ.

ކުޑަކުއްޖަކު ރޭޕްކުރި މައްސަލަ ފެންމަތިވެ ރަށު ތެރޭގައި ހަމަނުޖެހުން ބޮޑުވެފައިވާއިރު، އާންމުން ވަނީ ފުލުހުންގެ އިދާރާ ކައިރިއަށް އެއްވެ އަޑު އުފުލާފައެވެ. އަދި އެ އިދާރާގެ ބައެއް މުދަލަށް ގެއްލުންދީފައިވާ ފޮޓޯތައް ވެސް ސޯޝަލް މީޑިއާގައި އާންމުވެފައިވެއެވެ.

މި މައްސަލައިގައި ފުލުހުން ބުނީ ނ، ރ، ބ، އަދި ޅ ހިމެނޭ ސަރަހައްދުގެ ރަށެއްގައި 18 އަހަރު ނުފުރޭ އަންހެން ކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް ތަހުގީގުކުރަމުންދާކަމަށެވެ. މި މަހުގެ 3 ވަނަ ދުވަހު ހިނގާފައިވާ އެ ހާދިސާ ރިޕޯޓްކުރީ މި މަހު 11 ގައި ކަމަށް ވެސް ފުލުހުން ބުނެފައިވެއެވެ.