ޕޯޓް ވޯކަރ އިންޑަކްޝަން ޕްރޮގްރާމް 100ށް ވުރެ ގިނަ މީހުން ފުރިހަމަކޮށްފިއެވެ.
"ޕޯޓް ވޯކަރ އިންޑަކްޝަން ޕްރޮގްރާމް"އަކީ މުދާ ކްލިއަރ ކުރުމަށް އެމްޕީއެލްގެ ސަރަހައްދަށް ވަންނަ ފަރާތްތަކުގެ ސަލާމަތާއި ރައްކާތެރިކަން ކަށަވަރު ކުރުމާއި، އެފަރާތްތައް ޓްރެއިން ކުރުމަށް ހިންގާ ޕްރޮގްރާމެކެވެ. ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން އެމްޕީއެލްގެ މޭނޭޖިންގ ޑިރެކްޓަރ ޝާހިދު އަލީ ވިދާޅުވީ، މީގެކުރިން އެމްޕީއެލުން ސަލާމަތާއި ރައްކާތެރިކަމުގެ ޓްރެއިން ހިންގަމުންދިޔައީ ހަމައެކަނި، އެމްޕީއެލްގެ މުވައްޒަފުންނަށް އެކަނި ކަމަށެވެ. ނަމަވެސް އެމްޕީއެލް ސަރަހައްދު ބޭނުންކުރަނީ ހަމައެކަނި އެމްޕީއެލް މުވައްޒަފުން ނޫންކަމަށާއި މުދާ ކުލިއަރ ކުރުމަށް އެކިއެކި ކުންފުނިތަކުންނާއި މުދާ ކުލިއަރ ކުރާ ގްރޫޕްތަކުގެ ގިނަ ބަޔަކު ވަންނަމުންދާ ކަމަށެވެ. އަދި އެހެން ޕޯޓްތަކާއި ހިލާފަށް އެމްޕީއެލްގައި ޖާގައިގެ ދަތިކަމާހުރެ، ބޯޓު ފަހަރުތަކަށް މުދާ ލޯޑުކުރުމާއި އަންލޯޑު ކުރުމާއި، އަދި މުދާ ކުލިއަރ ކުރަމުން ގެންދަނީ އެމްޕީއެލްގެ ސަރަހައްދުން ކަމަށްވާތީ، ހާދިސާތައް ހިނގުމަކީ ވެދާނެ ކަމެއް ކަމަށާއި ނަމަވެސް އެފަދަ ހިތާމަވެރި ހާދިސާތައް ހިނގުން ވީހާވެސް މަދުކޮށް، އެފަދަ ހާދިސާތައް ނުހިނގާނެގޮތަށް ކަންކަން ބައްޓަން ކުރެވިފައިވާނެ ކަމަށެވެ. ޝާހިދު ވިދާޅުވީ، ޕޯޓް ފަދަ ތަންތަނަކީ ވަރަށް ގިނަ ހިތާމަވެރި ހާދިސާތައް ހިނގާ ތަންތަނަށްވާތީ އަދި ހާއްސަކޮށް، އެމްޕީއެލްގައި މީގެ ކުރިންނާއި އަދި ފާއިތުވެދިޔަ ދެ މަސްދުވަހުގެ ތެރޭގައި ވަރަށް ހިތާމަވެރި ދެ ހާދިސާއެއް ހިނގައި ދެ މީހަކު ނިޔާވެފައިވާތީ، އެމްޕީއެލް ސަރަހައްދަށް މުދާ ކުލިއަރ ކުރަން ވަންނަ ފަރާތްތަކުގެ ސަލާމާތާއި ރައްކާތެރިކަމަށް ވަރަށް ބޮޑު އިސްކަމެއްދޭ ކަމަށެވެ. އެގޮތުން، ފެބްރުއަރީ މަހު ފެށި "ޕޯޓް ވޯކަރ އިންޑަކްޝަން ޕްރޮގްރާމް"ގައި 100ށް ވުރެ ގިނަ މީހުން ފުރިހަމަކޮށްފައިވާކަމަށެވެ. މި ޓްރެއިނިންގ ފުރިހަމަ ނުކުރާ ފަރާތްތަކަށް މުދާ ކުލިއަރ ކުރުމަށް ނުވަތަ އެފަދަ އެއްވެސް މަސައްކަތެއް ކުރުމަށް ނުވަދެވޭނެ ކަމަށް ޝާހިދު ވިދާޅުވިއެވެ. ޝާހިދު ވިދާޅުވީ، ހަ މަސްދުވަހަށް ކުރިއަށްގެންދާ މި ޕްރޮގްރާމް ނިމޭއިރު، އެމްޕީއެލް ސަރަހައްދަށް މުދާ ކުލިއަރ ކުރުމަށް ވަންނަމުންދާ އެންމެހާ ފަރާތްތަކަކީ އެ ޕްރޮގްރާމް ނިންމައި ސެޓްފިކެޓް ހާސިލްކޮށްފައިވާ ފަރާތްތަކެއް ކަމަށް ވާނެ ކަމަށެވެ.
މައުލޫމާތު ލިބިފައިވާ ގޮތުގައި އެމްޕީއެލް ސަރަހައްދަށް މުދާ ކުލިއަރ ކުރުމަށް 1500އަށްވުރެ ގިނަ ފަރާތްތަކަށް ފާސް ދޫކޮށްފައިވެއެވެ.
