ކޮވިޑް-19ގެ ސަބަބުން ހއ. ބާރަށް މޮނިޓަރިންއަށް ލާފައިވާތީ ޖެންޑަރ މިނިސްޓްރީގެ ފަރާތުން އެރަށުގެ ބައެއް އާއިލާތަކަށް ކެއާ ޕެކޭޖް ފޮނުވައިފިއެވެ.
އެ މިނިސްޓްރީން ބުނީ ބާރަށުގެ 63 އާއިލާއަކަށް ކެއާ ޕެކޭޖް ފޮނުވާފައިވާ ކަމަށާއި، ޕެކޭޖްތަކުގައި ހުންނާނީ ކެއިން ބުއިމާއި އެހެނިހެން ޒަރޫރީ ކަންކަމަށް ބޭނުންވާ ސާމާނު ކަމަށެވެ. މިނިސްޓްރީން ބުނީ ކެއާ ޕެކޭޖްތައް ފޮނުވާފައިވާނީ ހާއްސަ އެހީއަށް ބޭނުންވާ ކުދިން ތިބި އާއިލާތަކާއި، ބަލިކަމުގައި އެނދުމަތިކޮށްފައި ތިބި މީހުންގެ އާއިލާތަކާއި، އަދި މިހާލަތުގައި ޒަރޫރީ ބޭނުންތައް ފުއްދާނެ ތަކެތި ހޯދުމަށް މާލީ އެހީ ބޭނުންވެފައިވާ އާއިލާތައް ބަލައި އެ އާއިލާތަކަށް އިސްކަންދީގެން ކަމަށެވެ.
މީގެ އިތުރަށް އަދިވެސް އެ ރަށުގައި އެހީ ބޭނުންވެފައިވާ އާއިލާތައް ތިބިތޯ ބަލަމުން އަންނަ ކަމަށާއި، ކުރިއަށް އޮތް ތަނުގައި އެ އާއިލާތަކަށްވެސް އެހީ ފޯރުކޮށްދޭނެ ކަމަށް މިނިސްޓްރީން ބުންޏެވެ.
ހއ. ބާރަށުން ކޮވިޑް-19 ފެނި އެރަށް މޮނިޓަރިންއަށް ލާފައިވާތާ މިހާރު ވަނީ 19 ދުވަސްވެފައެވެ. އެރަށުން ފުރަތަމަ ޕޮޒިޓިވްވީ ރަށަށް ގޮސް ކަރަންޓީނުގައި ތިބި ބައެކެވެ. އެކަމަކު ފަހުން އެމީހުން ރަށު ތެރެއިން މީހުންނާ ބައްދަލުވެފައިވާކަން އެނގިގެން ބެލިއިރު މުޅި ރަށުގައި ބަލީގެ ބޮޑު ކްލަސްޓަރއެއް އުފެދިފައިވާއިރު މިހާތަނަށް 30ށް ވުރެ ގިނަ މީހުން އެރަށުން ޕޮޒިޓިވްވެފައިވެއެވެ.
