ކޮވިޑް ޖެހިފައިވާ ގިނަ މީހުންނަށް ދެވަނަ ފަހަރަށް ކޮވިޑްޖެހުމުގެ ފުރުސަތު ވަރަށް ކުޑަކަމަށާއި ނަމަވެސް އުމުރުން ދުވަސްވީ މީހުންނަށް އެފުރުސަތު ބޮޑުކަމަށް ދިރާސާއަކުން ދައްކައިފިއެވެ.

ބުދަ ދުވަހު ޝާއިއުކޮށްފައިވާ މި ދިރާސާއިން ހާމަވެފައިވާ ގޮތުގައި އެއް ފަހަރު ކޮވިޑް ޖެހިފައިވާ މީހުންނަށް ހަމަސް ދުވަސް ވަންދެން ދެ ވަނަ ފަހަރަށް ކޮވިޑް ޖެހުމުގެ ފުރުސަތު ކުޑައެވެ. ނަމަވެސް އުމުރުން ހަގު މީހުންނަށްވުރެ އުމުރުން ދުވަސްވީ މީހުންނަށް ދެ ވަނަ ފަހަރަށް ކޮވިޑް ޖެހުމުގެ ފުރުސަތު ބޮޑުކަމަށް ދިރާސާއިން ވަނީ އެނގިފައެވެ.

ލެންސެޓް މެޑިކަލް ޖަރނަލްގައި ޝާއިއުކޮށްފައިވާ މިދިރާސާއިން ހާމަވެފައިވާ ގޮތުގައި ފުރަތަމަ ފަހަރަށް ކޮވިޑް ޖެހިފައިވާ މީހުންގެ ތެރެއިން ދެ ވަނަ ފަހަރަށް ވައިރަސް ޖެހިފައިވަނީ ޑެންމަރކްގެ ކޮވިޑްގެ ފުރަތަމަ އަދި ދެ ވަނަ ރާޅުގައި ކޮވިޑް ޖެހުނު މީހުންގެ ތެރެއިން 0.65 އިންސައްތަ މީހުންނަށެވެ.

އެހެންނަމަވެސް އެއްވެސް ވަރަކަށް ކޮވިޑް ނުޖެހޭ މީހުންގެ ތެރެއިން 3.27 އިންސައްތަ މީހުންނަށް ވަނީ ޕީސީއާރު ޓެސްޓުން އެމީހުންނަށް ވައިރަސް ޖެހިފައިވާކަން އެނގިފައެވެ.

އުމުރުން 65 އަހަރާއި އެއަށްވުރެ މަތީ މީހުންގެ ތެރެއިން ދެވަނަ ފަހަރަށް ކޮވިޑް ނުޖެހި ރައްކާތެރިކަން ލިބެނީ 47 އިންސައްތައަށް ކަމަށް ދިރާސާއިން ވަނީ އެނގިފައެވެ. އެހެންނަމަވެސް އުމުރުން ހަގު މީހުންނަށް އެރައްކާތެރިކަން 80 އިންސައްތައަށް ލިބެއެވެ.

މިދިރާސާގައި އިސްކޮށް ހަރަކާތްތެރިވި ޑެންމަރކްގެ ސްޓެޓެންސް ސެރަމް އިންސްޓިޓިއުޓްގައި މަސައްކަތްކުރާ ސްޓީން އެތެލްބަރގް ވިދާޅުވީ ދިރާސާއިން އެނގިގެންދިޔައީ ސިއްހަތު ރަނގަޅު ޒުވާނުންގެ މެދުގައި ދެވަނަ ފަހަރަށް ކޮވިޑް ޖެހުމުގެ ފުރުސަތު ކުޑަކަންކަމަށެވެ. ނަމަވެސް އުމުރުން ދުވަސްވީ މީހުންނަށް ދެ ވަނަ ފަހަރަށްވެސް ކޮވިޑް ޖެހުމުގެ ފުރުސަތު އެބައޮތްކަމަށް ސްޓީން ވިދާޅުވިއެވެ.

އެހެންކަމުން އުމުރުން ދުވަސްވީ މީހުންނަށް ބަލީގެ ނުރައްކާތެރިކަން އޮތް މިންވަރު މިކަމުން އެނގިގެންގޮސްފިކަމަށާއި ސިޔާސަތުތައް ހަދާ ފަރާތްތަކުން އުމުރުން ދުވަސްވީ މީހުންނަށް ޚާއްސަ އިސްކަމެއް ދީގެން ސިޔާސަތުތައް ހަދަންޖެހޭކަމަށް ސްޓީން ވިދާޅުވިއެވެ.

ދެވަނަ ފަހަރަށް ކޮވިޑް ޖެހުމުގެ ފުރުސަތު ހަމަސް ދުވަހަށްފަހު ދަށްވެގެންދާކަން އަދި މިދާރާސާއިން ހޯދިފައެއްނުވެއެވެ. އެކަމަށްޓަކައި އިތުރު ދިރާސާތައް ކުރިޔަށް ގެންދަންޖެހޭކަމަށާއި އެކި ވޭރިއަންޓްތައް އުޅުމާއެކު އެވޭރިއަންޓްތަކުގައިވާ ގޮތް ދެނެގަންނަންޖެހޭކަމަށް މިދިރާސާކުރި ފަރާތްތަކުން ބުނެއެވެ.

މިދިރާސާކުރުމަށްޓަކައި ޑާޓާތައް ނަގާފައިވަނީ ޑެންމާކްގެ ނޭޝަނަލް ޓެސްޓިންގ ގެ ތެރެއިންނެވެ. އެގޮތުން 2020 ވަނަ އަހަރު ޑެންމާކުގެ އާބަދީގެ 69 އިންސައްތަ މީހުން ކަމުގައިވާ 4 މިލިއަން މީހުން ކޮވިޑަށް ކޮށްފައިވާ ޓެސްޓްތަކުގެ ނަތީޖާތައް ވަނީ މިދިރާސާގައި ބޭނުންކޮށްފައެވެ.

ދެވަނަ ފަހަރަށް ކޮވިޑް ޖެހޭތޯ ބެލުމުގެ ދިރާސާއެއް މީގެކުރިންވެސް ވަނީ ކުރިޔަށް ގެންގޮސްފައެވެ.

މިދިރާސާއިން ހާމަވި ނަތީޖާތަކަށް ކޮމެންޓްކުރަމުން ލަންޑަންގެ އިމްޕީރިއަލް ކޮލެޖްގެ ޕްރޮފެސަރުން ކަމުގައިވާ ރޮސްމެރީ ބޯއިޓޮން އާއި ޑެނީ އަލްޓްމަން ވިދާޅުވީ މިދިރާސާއިން ހާމަވި ނަތީޖާތަކުން އެނގުނީ ވައިރަހާ ދެކޮޅަށް ރައްކާތެރިކަން ލިބޭ މިންވަރު ކުރީގައި ހެދި ދިރާސާ އާ އަޅާބަލާއިރު ކުޑަކަމަށެވެ.

ގުދުރަތީ ގޮތުން ވައިރަސް އާ ދެކޮޅަށް އިންސާނާގެ ހަށިގަނޑުގައި އިމިޔުނިޓީ އުފައްދައިދޭ މިންވަރު ދަށްކަން އެނގިއްޖެކަމަށާއި އެހެންކަމުން މިކަމަށް އޮތް ހައްލަކީ ދުނިޔޭގެ އާބާދީގެ ބޮޑުބަޔަކަށް ވީ އެންމެ އަވަހަށް ވެކްސިން ޖެހުންކަމަށް ބުނެފައިވެއެވެ.