ރާއްޖެއިން ކޮވިޑް-19އަށް ޕޮޒިޓިވްވި މީހުންގެ އަދަދު ހޯމަ ދުވަހުވެސް 100ށް ނާރާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން އާންމުކުރި ތަފާސްހިސާބުތަކުން ދައްކައިފިއެވެ.

އެޗްޕީއޭގެ ތަފާސްހިސާބުތައް ދައްކާގޮތުން އާދިއްތަ ދުވަހުގެ އިރުއޮއްސި ހަޔަކުން ފެށިގެން ހޯމަ ދުވަހުގެ އެގަޑިއާ ހަމައަށް ނެގި 4،561 ސާމްޕަލްގެ ތެރެއިން ޕޮޒިޓިވްވީ 94 މީހުންނެވެ. އޭގެ ތެރެއިން މާލެ ސަރަހައްދުން ޕޮޒިޓިވްވީ 80 މީހުންނެވެ. އަތޮޅުތެރެއިން ހަތް މީހުން އަދި ރިސޯޓުތަކުންވެސް 7 މީހަކު ޕޮޒިޓިވްވެފައިވެއެވެ.

މިއާއެކު ރާއްޖެއިން ކޮވިޑް-19އަށް ޕޮޒިޓިވްވި މީހުންގެ ޖުމްލަ 21،666ށް އަރާފައިވާއިރު އޭގެ ތެރެއިން މިހާރު ފަރުވާދެމުން އަންނަނީ 2،350 މީހުންނަށެވެ. އޭގެ ތެރެއިން 127 މީހަކަށް އެޑްމިޓްކޮށްގެން ފަރުވާދެމުން އަންނައިރު މިއީ އާދިއްތަ ދުވަހާ އަޅާބަލާއިރު ދެމީހުންގެ އިތުރުވުމެކެވެ. އެޗްޕީއޭގެ ތަފާސްހިސާބުތައް ދައްކާގޮތުން ހޯމަ ދުވަހު 150 މީހަކު ވަނީ ބަލިން ރަނގަޅުވެސް ވެފައެވެ.

މާލެ ސަރަހައްދުގައި ކޮވިޑް-19ގެ ކޭސްތައް އިތުރުވެ ތިން ވަނަ ރާޅަކާ ކުރިމަތިވީ މިދިޔަ ޖެނުއަރީ މަހުއެވެ. އޭރުން ފެށިގެން ކޮންމެ ދުވަހަކުވެސް ފެންނަ ކޭސްތަކުގެ އަދަދު 100ން މަތީގައި އަދި ގިނަ ދުވަސް ދުވަހު 150ން މަތީގައި ހުރުމަށް ފަހު ކޭސްތަކުގެ އަދަދު 100ން ދަށުގައި ހުންނަތާ މިއީ ތިން ވަނަ ދުވަހެވެ. ކޭސްތަކުގެ އަދަދުތައް މަޑުމަޑުން ދަށަށްދާތާ މިހާރު ވަނީ ހަފްތާއެއްހާ ދުވަސް ވެފައެވެ.

ރާއްޖޭގައި ކޮވިޑް-19ގެ ކޭސްތައް އިތުރުވުމާއެކު ރައްކާތެރިކަމުގެ ގިނަ ފިޔަވަޅުތަކެއް އަޅާފައިވާއިރު، ރޭގަނޑު 11ގެ ފަހުން ބޭރަށް ނުނިކުމެވޭ ގޮތަށް ކަރފިއު އިއުލާންކޮށްފައިވެއެވެ. އަދި އިރުއޮއްސި ހައެއްގެ ފަހުން އެއްގަމު އުޅަނދުފަހަރު ދުއްވުން މަނާކޮށްފައިވާއިރު، ގްރޭޑް ހަތަކުން ދަށުގެ ދަރިވަރުންނަށް ކިޔަވައިދެމުން އަންނަނީވެސް އޮންލައިންކޮށެވެ. މީގެ އިތުރުން ރޭގަނޑު އަށެއްގެ ފަހުން ރެސްޓޯރަންޓުތަކުގައި ޑައިން އިން ކުރުން ވެސް ވަނީ މަނާކޮށްފައެވެ.