އޭއެފްސީ ކަޕްގައި އިންޑިއާގެ މޯހަން ބާގަން ލަދުގަންނުވާލުމަށްފަހު މާޒިޔާ ސްޕޯޓްސް އެންޑް ރެކްރިއޭޝަން ގްރޫޕް އީގެ އެއްވަނައަށް ޖެހިލައިފި އެވެ.
ބުދަ ދުވަހު ހަވީރު ކުޅުނު މި މެޗު މޯހަން ބާގަންއާ ވާދަކޮށް މާޒިޔާ އިން މެޗު ކާމިޔާބުކުރީ 2-5 ގެ ތަފާތުބޮޑު ނަތީޖާއަކުންނެވެ.
ގަލޮޅު ދަނޑުގައި ކުޅުނު މި މެޗުގައި މާޒިޔާގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، މެޗުގައި ފުރަތަމަ ލަނޑު ޖަހާ ލީޑު ނެގީވެސް އެޓީމުންނެވެ. މި ލަނޑު 12 ވަނަ މިނެޓުގައި އެޓީމަށް ކާމިޔާބުކޮށްދިނީ ޔަސްފާދު ހަބީބު (މުލަކޭ) އެވެ.
މި ލަނޑަށްފަހުވެސް މާޒިޔާ އިން ދިޔައީ މޯހަން ބާގަންގެ ހާފަށް ބާރުބޮޑުކޮށް ލަނޑު ޖެހުމަށް ފުލުފުލުގައި ފުރުސަތު ތަނަވަސްކުރަމުންނެވެ. މެޗުގެ 15 ވަނަ މިނެޓުގައި މޯހަން ބާގަންގެ ޖޭޖޭ ފޮނުވާލި ބޯޅަ ކީޕަރު ދިފާއުކުރިއިރު، 22 ވަނަ މިނެޓުގައި މޯހަން ބާގަންގެ ކުޅުންތެރިޔަކު ބޮލުން ކުރިޔަށް ފޮނުވާލި ބޯޅަ ގޯލު ލައިން މަތިން މާޒިޔާގެ މުހައްމަދު އުމެއިރު ވަނީ ދިފާއުކޮށްފައެވެ.
މާޒިޔާ އިން މެޗުގެ ލީޑު ފުޅާކުރީ 27 ވަނަ މިނެޓުގައި މުހައްމަދު އުމެއިރު ކާމިޔާބުކުރި ލަނޑުންނެވެ. މި ލަނޑު އޭނާ ކާމިޔާބުކުރީ އެލެގްޒެންޑްރާ ރަކިޗް ނަގައިދިން ހުރަހަކުންނެވެ.
މީގެއިތުރުންވެސް މާޒިޔާއަށް ވަނީ ހުސް ގިނަ ފުރުސަތުތަކެއް ލިބި ބޭކާރުވެފައެވެ. މާޒިޔާ އިން މެޗުގައި ކާމިޔާބުކުރި ތިން ވަނަ ލަނޑު 44 ވަނަ މިނެޓުގައި އެޓީމަށް ކާމިޔާބުކޮށްދިނީ ރަކިޗް އެވެ.
ފުރަތަމަ ހާފް ނިމުނީ 0-3 ގެ ނަތީޖާއިން މޯހަން ބާގަންގެ މައްޗަށް މާޒިޔާ ކުރީގައި އޮވެގެންނެވެ.
Another three points for ruthless @MaziyaSr as @Mohun_BaganAC are eliminated from the #AFCCup2017… #MAZvMOH pic.twitter.com/xswr9xzhBX
— AFC Cup (@AFCCup) May 3, 2017
ދެވަނަ ހާފް ފެށިގެންވެސް މާޒިޔާ އިން މޮޅު ކުޅުމެއް ދައްކާފައެވެ. އެހެންނަމަވެސް 48 ވަނަ މިނެޓުގައި ކިންގްޝުކް ޑިބްނަތް އެވެ. މި ލަނޑު އޭނާ ކާމިޔާބުކުރިއިރު، މާޒިޔާގެ ޑިފެންޑަރު އަމްދާން އަލީ (އެންޑީ) ބޯޅަ ސާފްކޮށްލަން މަސައްކަތްކުރި އެވެ.
އެހެންނަމަވެސް މާޒިޔާ އިން ވަނީ 54 ވަނަ މިނެޓުގައި އަސަދުﷲ އަބްދުﷲ ކާމިޔާބުކުރި ލަނޑުން ލީޑު އިތުރަށް ފުޅާކޮށްފައެވެ. މި ލަނޑު އޭނާ ކާމިޔާބުކުރީ ލިބުނު ޕެނަލްޓީއަކުންނެވެ.
މާޒިޔާ އިން މެޗުގައި ކާމިޔާބުކުރި ފަސް ވަނަ ލަނޑު 59 ވަނަ މިނެޓުގައި އެޓީމަށް ކާމިޔާބުކޮށްދިނީ ރަކިޗް އެވެ. އޭނާ މި ލަނޑު ކާމިޔާބުކުރީ އޭރިޔާ ބޭރުން ފޮނުވާލި ބާރު ހަމަލާއަކުންނެވެ.
މޯހަން ބާގަން އިން މެޗުގައި ކާމިޔާބުކުރި ދެވަނަ ލަނޑު 77 ވަނަ މިނެޓުގައި އެޓީމަށް ކާމިޔާބުކޮށްދިނީ ޖޭޖޭ އެވެ. މި ލަނޑު އޭނާ ކާމިޔާބުކުރީ ޕެނަލްޓީއަކުންނެވެ.
މެޗުގެ ފަހު 10 މިނެޓުގައި މޯހަން ބާގަން ޓީމުގެ ފަރާތުން ފުލުފުލުގައި ހަމަލާތައް ފެނިގެންދިޔަ ނަމަވެސް އެ ބޯޅަތައް މާޒިޔާ އިން ވަނީ ދިފާއުކޮށްފައެވެ.
މި ނަތީޖާއާއެކު އޮތީ ކުޅުނު ހަތަރު މެޗުން ހޯދި ނުވަ ޕޮއިންޓާއެކު ޕޮއިންޓް ތާވަލުގެ އެއްވަނައިގަ އެވެ. މެޗުން ބަލިވި މޯހަން ބާގަން ތިން މެޗުން ލިބުނު ތިން ޕޮއިންޓާއެކު އޮތީ ގްރޫޕްގެ ތިންވަނައިގަ އެވެ.
ގްރޫޕްގައި ހިމެނޭ ޑާކާ އަބަހާނީ އަދި ބެންގްލޫރް އެފްސީ ބައްދަލުކުރި މެޗު 0-2 ގެ ނަތީޖާއަކުން ކާމިޔާބުކުރީ ޑާކާ އަބަހާނީ އެވެ. އެގޮތުން އަބަހާނީ ވަނީ ތިން ޕޮއިންޓް ހަމަކޮށްފައެވެ. އެހެންނަމަވެސް އެޓީމު އޮތީ ގްރޫޕްގެ ފުލުގައެވެ. މެޗުން ބަލިވި ބެންގްލޫރު އެފްސީ އޮތީ ގްރޫޕްގެ ދެވަނައިގަ ނުވަ ޕޮއިންޓާއެކުގައެވެ. މާޒިޔާ އަށް އެއްވަނަ ލިބުނީ ލަނޑުގެ ތަފާތުންނެވެ.
.@bengalurufc and @MaziyaSr are tied at the top of Group E after four games! #AFCCup2017 pic.twitter.com/DNbfBL7dIQ
— AFC Cup (@AFCCup) May 3, 2017
