ރ. ފައިނުގައި އެއަރޕޯޓް އެޅުން ހުއްޓުވީ ރައްޔިތުން ގޯތިގެދޮރު އަޅަން އޮތް ބިންގެއްލިގެން ހިނގައިދާނެތީކަމަށް ރ. އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވެއްޖެއެވެ.
ރާއްޖެ ޓީވީގެ ހަވަރުބެރު ޕްރޮގްރާމްގައި ވާހަކަދައްކަވަމުން މުހައްމަދު ވަހީދު ވިދާޅުވީ، އޭރު ޕީޕީއެމް ސަރުކާރެއްއޮތީމަ މަޝްރޫއު ހޮއްޓުވީ ނޫންކަމަށާއި، ފައިނަކީ ބިންބޮޑު ރަށެއް ނަމަވެސް އެއަރޕޯޓް އެޅުމަށްޓަކައި ހިއްކާނެ ބިމެއް ނެތުމުން، އެއަރޕޯޓް އަޅާނަމަ އަޅަންޖެހޭނީ ރަށުތެރޭގައި ކަމަށެވެ. އެހެންކަމުން އެ ޕްރޮޖެކްޓްގައި ހިމަނާފައިވާ ސިޓީ ހޮޓާތައް އަޅައިފިނަމަ މިހާރު ރަށުގައި އުޅޭ އާބާދީ ވަށައިގެން ފެންސް ޖެހުނީ ކަމަށެވެ. ދެން އެރަށުގެ ދިރިއުޅޭ އާބާދީ ދަނޑުވެރިކަން ކުރާނެ ބިމެއްވެސް ނޯންނާނެ ކަމަށެވެ. އެއަރޕޯޓް ހަދަން ދެކޮޅުހެދީ މި ސަބަބުތަކާ ހެދި ކަމަށެވެ. އެހެންނަމަވެސް ދަތުރުފަތުރުގެ ފަސޭހައަކީ އންނަން ޖެހޭ ކަމެއް ކަމަށް ގަބޫލް ކުރައްވާ ކަމަށެވެ. ރައްޔިތުންގެ ބޯހިޔާވަހިކަން ނަގާލާފައި އެއަރޕޯޓް އެޅުމުން މިކަންކަން ދެކޮޅުނުޖެހޭ ކަމަށެވެ. މިއި ފައިނުގެ ޒުވާނުން ވެސް ގަބޫލުކުރާ ހަގީގަތެއް ކަމަށް ވެސް މެމްބަރު ވިދާޅުވިއެވެ.
2018 ވަނަ އަހަރުގެ މެއި މަހު ފައިނުގައި އެއަރޕޯޓް ހެދުމަށް އައިލެންޑް އޭވިއޭޝަނާ ހަވާލުކުރި މަޝްރޫއުގައި އެއާޕޯޓާއި ސިޓީ ހޮޓާ އެޅުމަށް ފައިނުގެ ބޮޑު ބައެއް ނަގަން ނިންމާފައިވެއެވެ. އައިލެންޑް އޭވިއޭޝަންގެ ޓްރެއިނިން ސެންޓަރަކާއި ކާގޯ ވިލެޖެއް ވެސް ތަރައްގީކުރުމަށް އެ ޕްރޮޖެކްޓްގައި ހިމަނާފައިވެއެވެ. އެ މަޝްރޫއާ ގުޅޭގޮތުން ސަރުކާރުން ފައިނު ކައުންސިލާ ހިއްސާ ކޮށްފައިވާ ކުރެހުމުގައިވާ ގޮތުން، ރަށުގެ ބިމުގެ ގާތްގަނޑަކަށް ތިން ބައި ކުޅަ ދެބައި ނަގަން އޮތީ ހަމަޖެހިފައެވެ.
