ކޮވިޑް-19ގެ ވެކްސިން ޖަހާ މީހުންގެ އަދަދު އިތުރުވުމާއިއެކު، އިނގިރޭސިވިލާތުން ޕޮޒިޓިވްވާ މީހުންގެ އަދަދާއި މަރުވާ މީހުންގެ އަދަދު ދަށްވަމުން އަންނަ ކަމަށް ރިޕޯޓްތައް ބުނެފިއެވެ.

އިނގިރޭސިވިލާތުން 23.6 މިލިއަން މީހުން ވެކްސިން މިހާތަނަށް ޖަހާފައިވާއިރު، ހޮނިހިރު ދުވަހު އެގައުމުން ކޮވިޑަށް ޕޮޒިޓިވްވެފައިވަނީ 5،534 މީހުންނެވެ. އަދި ބަލީގައި މަރުވެފައިވަނީ 121 މީހުންނެވެ.  

އިނގިރޭސިވިލާތުގެ މީޑިއާތަކުން ރިޕޯޓްކޮށްފައިވާ ގޮތުން އެގައުމުގައި ހަރަކާތްތެރިވަމުން އަންނަ ހުރިހާ ފްރޮންޓްލައިން މުވައްޒަފުންހެން ވެކްސިންގެ ފުރަރތަމަ ޑޯޒު ޖަހާފައިވާއިރު، ކުރިޔަށް އޮތް ހަފްތާއެއްގެ ތެރޭގައި ހުރިހާ ފްރޮންޓްލައިން މުވައްޒަފުން ވެކްސިންގެ ފުރަތަމަ ޑޯޒު ޖަހާނެއެވެ.

އަދި ވެކްސިން ޖަހާ މީހުންގެ އަދަދު އިތުރުވަމުން އަންނައިރު މީގެ ސަބަބުން ކޮވިޑްގެ ބަލީގައި މަރުވާ މީހުންގެ އަދަދާއި، ބައްޔަށް ޕޮޒިޓިވްވާ މީހުންގެ އަދަދު ވަނީ ބޮޑުތަނުން ދަށްވެފައެވެ.

އިނގިރޭސިވިލާތުގެ ވެކްސިނާއި ބެހޭ ވަޒީރު ނަދީމް ޒަހަވީ ވިދާޅުވީ ކުރިޔަށް އޮތް ހަފްތާތަކުގެ ތެރޭގައި 10 މިލިއަނަށްވުރެ ގިނަ ވެކްސިން ޑޯޒު ބޭނުންވާނެ ކަމަށާއި، އެ އަދަދު ދުވަހެއް ދުވަހަކަށް އިތުރުވެދާނެ ކަމަށް ބެލެވޭ ކަމަށެވެ.

އިނގިރޭސިވިލާތުގައި މިހާތަނަށް ބޭނުން ކުރަމުން އަންނަނީ ފައިޒާ ވެކްސިނާއި އެސްޓްރާޒެނެކާ ވެކްސިން އެކަނިއެވެ. ނަމަވެސް ކުރިޔަށް އޮތް މަސްދުވަހުގެ ތެރޭގައި އެމެރިކާގެ މޮޑާނާ ކުންފުނީގެ ވެކްސިންވެސް ބޭނުން ކުރަން ފެށުމަށް ވަނީ ނިންމާފައެވެ.

އިނގިރޭސިވިލާތުގެ ސަރުކާރުން މީގެ ކުރިން ވަނީ ޖުލައި މަހު އެގައުމުގެ 18 އަހަރުން މަތީގެ އެންމެންނަށް ވެކްސިންދީ ނިމޭނެ ކަމަށް ލަފާކޮށްފައެވެ.