ކޮވިޑް-19ގެ ތިން ވަނަ ރާޅާއެކު ފެށި މާސް އިންސްޕެކްޝަންގައި މިހާތަނަށް 2400ށް ވުރެ ގިނަ އާއްމު ޚިދުމަތްތައް ދޭ ތަންތަން ބެލިފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި އެޗްޕީއޭގެ ޑިރެކްޓަރ އަހުމަދު ނާސިރު ވިދާޅުވީ މާސް އިންސްޕެކްޝަން ކުރިއަށް ގެންދަނީ އާއްމު ޚިދުމަތް ދޭތަންތަނުން ކަނޑައަޅާފައިވާ ގައިޑްލައިންއާއި އުސޫލުތަކާއި އެއްގޮތަށް އަމަލުކުރަމުންދޭތޯ ބެލުމުގެ އިތުރުން އާއްމު ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން ކަމަށެވެ.

މިހާރު ކުރިއަށްދާ އިންސްޕެކްޝަނަށް އަލިއަޅުއްވާލައްވާ ނާސިރު ވިދާޅުވީ ކުރިއާ ހިލާފަށް މިފަހަރު ގިނަ ތަންތަނުން ގައިޑްލައިންތަކާއި އެއްގޮތަށް އަމަލު ކުރަމުންދާ ކަމަށެވެ. އަދި އެތަންތަނުން ޚިދުމަތް ހޯދާ އާއްމު ފަރުދުން ވެސް އުސޫލުތައް ދަމަހައްޓާކަން ފާހަގަކުރެވިފައިވާ ކަމަށެވެ.

ނާސިރު ވިދާޅުވީ ފުރަތަމަ އިންސްޕެކްޝަން ފަށައިގެން ކުރިއަށްދިޔައިރުގައި ވަރަށް ބޮޑަށް ގައިޑްލައިންތަކަށް އާއްމުން ހޭލުންތެރިކުރުވަން ޖެހުނު ކަމަށެވެ. އެއީ އާއްމު ޚިދުމަތްތައް ދޭ ތަންތަން ކަމުގައިވާ ކެފޭ/ރެސްޓައުރެންޓް، ފިހާރަ، ސެލޫން އަދި ޖިމް ތަކުން އަމަލުކުރަން ޖެހޭނީ ތަފާތު އުސޫލުތަކަށެވެ. އެހެންކަމުން ފުރަތަމަ އިންސްޕެކްޝަން ކުރިއަށް ގެންދިޔައިރުގައި ބައެއް ދަތިތައް ކުރިމަތިވި ނަމަވެސް މިހާރު އެމައްސަލަތައް ކުރިމަތިނުވާ ކަމަށް އޭނާ ވިދާޅުވިއެވެ.

ޕަބްލިކް ޓްރާންސްޕޯޓުތަކުގެ އިންސްޕެކްޝަން ކުރިއަށް ގެންދާކަން ފާހަގަކުރައްވައި ނާސިރު ވިދާޅުވީ ޓެކްސީ، ބަސް އަދި ފެރީތަކުން ޚިދުމަތްތައް ދެމުންދާ ގޮތް ބަލަމުންދާ ކަމަށެވެ. މީގެ އިތުރުން ސްކޫލު، ކޮލެޖް، ހޮސްޕިޓަލް، ކްލިނިކް، ސަރުކާރު އޮފީސްތަކާއި، ޕްރައިޓް އޮފީސްތައް ވެސް ބަލަމުންދާ ކަމަށް ނާސިރު ވިދާޅުވިއެވެ. އަދި މިފަހަރުގެ މާސް އިންސްޕެކްޝަންގައި ގްރޭޓަރ މާލެ އެއްކޮށް ބަލާނެ ކަމަށާއި، މިހާތަނަށް 2400ށްވުރެ ގިނަ ތަންތަން ބަލާފައިވާ ކަމަށް އޭނާ ވިދާޅުވިއެވެ.

އަމަލުކުރަމުންދާ އުސޫލަށް އަލިއަޅުއްވާލައްވާ ނާސިރު ވިދާޅުވީ ގައިޑްލައިންއާ ފުރަތަމަ ފަހަރަށް ހިލާފުވުމުން ދެވޭނީ ވައިޓް ނޯޓިސް ކަމަށެވެ. އެއީ ނަސޭހަތްތެރިވުމުގެ ގޮތުން ނޯޓިސްއެއް ކަމަށް އޭނާ ވިދާޅުވިއެވެ. ދެވަނައަށް ދެވޭ ރެޑް ނޯޓިސްއަކީ ފިޔަވަޅުއަޅާނެ ކަމުގެ އިންޒާރު ދިނުމުގެ ގޮތުން ދެވޭ ނޯޓިސްއެއް ކަމަށް ނާސިރު ވިދާޅުވިއެވެ. އަދި ވިދާޅުވީ ދެވަނަ ފަހަރު ދެވޭ އިންޒާރުއާއެކު ކުށް ތަކުރާރު ކޮށްފިނަމަ ޖޫރިމަނާ ކުރާ ގޮތަށް އޮތް ނަމަވެސް މިހާރު އެއުސޫލު ބަދަލުވެފައިވާ ކަމަށެވެ. އެގޮތުން ތިން ވަނަ މަރުހަލާގައި އެތަނެއް 24 ގަޑިއިރަށް ބަންދުކުރެވޭނެ ކަމަށް ނާސިރު ވިދާޅުވިއެވެ.

އެޗްޕީއޭއިން އާންމުކޮށްފައިވާ ޖޫރިމަނާކުރާ އުސޫލުގައި ވާގޮތުން ފުރަތަމަ ފަހަރަށް ނަމަ ޖޫރިމަނާކުރަނީ 5000 ރުފިޔާއިންނެވެ. އަދި ދެވަނަ ފަހަރު ނަމަ 25،000 ރުފިޔާއިން ޖޫރިމަނާ ކުރެވޭއިރު، އެންގުމާ ޚިލާފުވެ ކަންކަން ރަނގަޅު ނުކުރާނަމަ، ތިންވަނަ ފަހަރަށް 50،000 ރުފިޔާއިން ޖޫރިމަނާކުރާނެއެެވެ. ހަތަރުވަނަ ފަހަރުގެ ޖޫރިމަނާއަކީ 75،000 ރުފިޔާއެވެ. ފަސްވަނަ ފަހަރު ޖޫރިމަނާ ކުރާނީ އެއްލައްކަ ރުފިޔާއިންނެވެ.