ސްޕެނިޝް ލީގުގައި ބުދަ ދުވަހުގެރޭ ފަހަތުން އަރައި އެތުލެޓިކް ބިލްބާއޯ ބަލިކޮށް، ތާވަލުގެ އެއްވަނައިގައި އެތުލެޓިކޯ މެޑްރިޑުން ހަ ޕޮއިންޓުގެ ލީޑެއް ނަގައިފިއެވެ.

އަމިއްލަ ދަނޑުގައި ކުޅުނު މެޗުން އެތުލެޓިކޯ މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ބިލްބާއޯއިންނެވެ. އެގޮތުން މެޗު 21 ވަނަ މިނެޓުގައި އިނާކީ ވިލިއަމްސް ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ އިކާ މުނިއައީންނެވެ. އެކަމަކު ފުރަތަމަ ހާފުގެ އިތުރު ވަގުތުގައި ތޯމަސް ލެމާ ނަގައިދިން ހުރަހަކުން މާކޯސް ލޮރެންޓޭ ވަނީ ލަނޑެއް ޖަހައި، އެތުލެޓިކޯއަށް ނަތީޖާ އެއްވަރުކޮށްދީފައެވެ.

އަދި މި މެޗުން އެތުލެޓިކޯ މޮޅުކޮށްދިން ލަނޑު ދެވަނަ ހާފު ފަށައިގެން ހަވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ މި ސީޒަނުގައި މޮޅު ކުޅުމެއް ދައްކަމުން އަންނަ ތަޖުރިބާކާރު ފޯވާޑް ލުއިސް ސުއަރޭޒެވެ. މިއީ އޭރިއާ ތެރެއިން ސުއަރޭޒަށް ބިލްބާއޯގެ އުނާއީ ނޫނޭޒް ކުރި ފައުލަކަށް ރެފުރީ ދިން ޕެނަލްޓީ އެކެވެ. މި ލަނޑަކީ މި ސީޒަނުގެ ލީގުގައި ސުއަރޭޒް ޖެހި 18 ވަނަ ލަނޑެވެ.

މި މޮޅާއެކު ތާވަލުގެ އެއްވަނައިގައި އެތުލެޓިކޯއިން ހަ ޕޮއިންޓުގެ ލީޑެއް ނެގިއިރު، އެ ޓީމަށް ވަނީ ކުޅުނު 26 މެޗުން 62 ޕޮއިންޓް ލިބިފައެވެ. ދެވަނައިގައި އޮތް ބާސެލޯނާއަށް 26 މެޗުން 56 ޕޮއިންޓް ލިބިފައިވާއިރު، ތިންވަނައިގައި އޮތް އެންމެ ފަހުގެ ޗެމްޕިއަން ރެއާލް މެޑްރިޑަށް 26 މެޗުން ވަނީ 54 ޕޮއިންޓް ލިބިފައެވެ. އަދި އެތުލެޓިކޯ އަތުން ބަލިވި ބިލްބާއޯ އޮތީ ތާވަލުގެ އަށްވަނައިގައި 26 މެޗުން 33 ޕޮއިންޓާއެކުއެވެ.