އަންގާރަ ދުވަހު 7،862 މީހުން ވެކްސިން ޖަހާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސް ހިސާބުތަކުން ދައްކައިފިއެވެ.

އެޗްޕީއޭއިން އެންމެ ފަހުން ނެރުނު ތަފާސް ހިސާބުތައް ދައްކާ ގޮތުން މާލެ ސަރަހައްދުން 4،083 މީހުން ވެކްސިން ޖަހާފައިވާއިރު އަތޮޅު ތެރެއިން 3،779 މީހުން ވެކްސިން ޖަހާފައިވެއެވެ. އެއާއިއެކު ރާއްޖެއިން ވެކްސިން ޖެހި މީހުންގެ އަދަދު ވަނީ 165،675ށް އަރައިފައެވެ. އޭގެ ތެރެއިން 95،362 މީހުން މާލެ ސަރަހައްދުން ވެކްސިން ޖަހާފައިވާއިރު، 70،313 މީހުން ވެކްސިން ޖަހާފައިވަނީ އަތޮޅު ތެރެއިންނެވެ.

ފެބްރުއަރީ މަހުގެ އެއް ވަނަ ދުވަހުން ފެށިގެން ރާއްޖޭގައި ކޮވިޑް-19 ވެކްސިނޭޝަން ޕްރޮގްރާމް ކުރިއަށް ގެންދާއިރު، ރާއްޖޭގެ ގިނަ ސަރަހައްދެއްގައި އެކި އުމުުރުފުރާތަކަށް އަންނަނީ ވެކްސިން ޖަހަމުންނެވެ. އަދި ވީހާވެސް ގިނަ މީހުން ވެކްސިން ޖެހުމަށް އިލްތިމާސްކުރައްވާ އެޗްއީއޯސީގެ ތަރުޖަމާން ޑރ. ނަޒްލާ ރަފީގް ވަނީ ވެކްސިންގެ ރައްކާތެރިކަން ދެނެގަތުމަށް ދިރާސާތައް ހެދޭނީ އާބާދީގެ ބޮޑު ބައެއް ވެކްސިން ޖެހުމުންކަން ފާހަގަކުރައްވާފައެވެ.

މާލެ ސަރަހައްދުގައި 8 ވެކްސިނޭޝަން ސެންޓަރާއި 2 މޮބައިލް ސެންޓަރު ހިމެނޭއިރު އަތޮޅުތަކުގައި 169 ވެކްސިން ސެންޓަރުން ވެކްސިން ދިނުމުގެ ކަންކަން ކުރިއަށްދާނެ ކަމަށް އެޗްޕީއޭއިން ބުނެއެވެ. ރާއްޖޭގައި ބޭނުން ކުރުމުގެ ހުއްދަ ދީފައިވަނީ ކޮވިޝީލްޑް ވެކްސިނެވެ.

ހޯމަ ދުވަހު ހެލްތު މިނިސްޓަރ އަހުމަދު ނަސީމް ވަނީ މާލެ ސަރަހައްދުގައި ކޮވިޝީލްޑް ވެކްސިންގެ ފުރަތަމަ ޑޯޒު ޖަހައިދެނީ މަރޗް މަހުގެ 15 ވަނަ ދުވަހާ ހަމައަށްކަމަށް ވިދާޅުވެފައެވެ. މިނިސްޓަރ ވަނީ ކޮންމެވެސް އެއް ހިސާބަކުން ދެވަނަ ޑޯޒު ޖަހަން ފަށަން ޖެހޭނެކަން ފާހަގަކުރައްވައި ބަލި ހަލުވިކަމާއެކު ފެތުރެމުންދާއިރު ބަލިން ފުރިހަމަ ރައްކާތެރިކަން ލިބޭނީ ވެކްސިންގެ ދެ ޑޯޒުވެސް ފުރިހަމަކޮށްގެން ކަމަށް ވިދާޅުވެފައެވެ.