ފެނަކައިން ކޮރަޕްޝަނަށް މަގުފަހިވާގޮތަށް ކަންތައްތައް ހިންގާކަމަށް ބުނެ ދައްކަނީ އަސާސެއް ނެތް ދޮގު ވާހަކަތަކެއް ކަމަށް އެ ކުންފުނިން ބުނެފިއެވެ.
ފެނަކައިން ނެރުނު ނޫސްބަޔާނެއްގައި ބުނީ އެ ކުންފުނިން ރައްޔިތުންނަށް އަސާސީ ހިދުމަތްތައް ފޯރުކޮށްދިނުމަށް ކުރާ މަސައްކަތްތަކުގައި ކޮރަޕްޝަނަށް މަގުފަހިވާގޮތަށް އަމަލުކުރާ ކަމަށް ދޭހަވާގޮތަށް ބައެއް ފަރާތްތަކުން ކެނޑިނޭޅި ފަތުރަމުންދަނީ އަސާސެއް ނެތް ވާހަކަތަކެއް ކަމަށެވެ. އަދި މިއީ ކުންފުނީގެ މިހާރުގެ މެނޭޖްމަންޓުން ކުންފުންޏަށް ހޯދައިދެމުންދާ ކުރިއެރުންތަކާއި ފަޚުރުވެރި ރީތި ނަމާއި ކާމިޔާބީތަކާމެދު ހަސަދަވެރި ނިޔަތެއް އޮވެގެން ކުންފުނީގެ ނަން ކިލަނބުކޮށް، މެނޭޖްމަންޓާއި މުވައްޒަފުންގެ އަގު ވައްޓާލުމަށް އެއްވެސް ޒިންމާދާރު ކަމެއްނެތި ރޭވުމެއްގެ ތެރެއިން ކުރަމުންދާ ސިލްސިލާ ފިނޑި އަމަލެއް ކަމަށް ފެނަކައިން ބުނެއެވެ.
މި ނޫސްބަޔާނުގައި ފެނަކައިން ވަނީ ކުންފުނީގެ މިހާރުގެ މެނޭޖްމަންޓުން ކުންފުންޏާ ހަވާލުވުމަށްފަހު، މަސައްކަތް ކުރަނީ ރައްޔިތުންނަށް ފައިދާހުރި ހިދުމަތްތަކެއް ދިނުމަށް ކަމަށާއި، ކުންފުނީގެ މުވައްޒަފުންގެ ނަޒާހާތްތެރިކަން ކަށަވަރުކޮށްދޭނެ ކަމަށް ބުނެފައެވެ.
ފެނަކައިން ބުނީ ރައްޔިތުންގެ އާންމު ދިރިއުޅުމާ ސީދާ ގުޅިފައިވާ މިފަދަ ކުންފުންޏަކާ ގުޅޭގޮތުން އެކި ފަރާތްތަކުން އުފައްދައި ހުށަހަޅާ އަސާސެއްނެތް އެންމެހާ ކަންކަން ހަރަދަނާކަމާއެކު ތަފްސީލީ ގޮތެއްގައި ބަލަންޖެހޭ އެންމެހައި ބެލުންތައް ބަލައި ދިރާސާ ކުރައްވައިގެން ކަމުގެ ހަގީގަތް ރައްޔިތުންނަށް ނުއޮޅޭފަދަ ގޮތެއްގައި މައުލޫމާތު އާންމު ކުރުމަށް ދައުލަތުގެ ކަމާބެހޭ ފަރާތްތަކަށް ގޮވައިލާ ކަމަށެވެ.
