ރާއްޖޭގައި ސްޕޯޓްސް ޓޫރިޒަމް ކުރިއެރުވުމަކީ ފަތުރުވެރިކަމާ ބެހޭ ވުޒާރާގެ އަމާޒެއް ކަމަށާއި، އެގޮތުގެ މަތީން ކުރިޔަށް ހުރި ދުވަސްތަކުގައި ސްޕޯޓްސް ޓޫރިޒަމް ކުރިއެރުވުމަށް މުބާރާތްތައް ބޭއްވުމަށް ނިންމާފައިވާ ކަމަށް ފަތުރުވެރި ކަމާ ބެހޭ ވަޒީރު އަބްދުﷲ މަޢުސޫމް ވިދާޅުވެއްޖެއެވެ.
މޮޓޯޖީޕީ ވޯލްޑް ޗެމްޕިއަން ޖޯޖް ލޮރެންޒޯއަށް މަރުހަބާ ކިޔުމަށް ވެލާނާ އިންޓަނޭޝަނަލް އެއަރޕޯޓުގައި ބޭއްވި ރަސްމިއްޔާތަށްފަހު ނޫސްވެރިންނާ ވާހަކަދައްކަވަމުން މަޢުސޫމް ވިދާޅުވީ ރާއްޖޭގައި ސްޕޯޓްސް ޓޫރިޒަމް ކުރިއެރުވުމަށް ފަތުރުވެރިކަމާ ބެހޭ ވުޒާރާއިން ހާއްސަ އިސްކަމެއް ދެއްވާ ކަމަށާއި، އެގޮތުން މޫދު ކުޅިވަރުތައް ކުރިއެރުވުމަށް ބޮޑު އިސްކަމެއް ދީގެން ކުރިޔަށްދާ ކަމަށެވެ. އެގޮތުން ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަ ކުރުމުގެ ގޮތުން އައްޑޫ ސިޓީގައި އަކުއާ ބައިކް ވޯލްޑް ޗެމްޕިއަންޝިޕެއް ބޭއްވުމަށް މަސައްކަތް ކުރަމުން އަންނަ ކަމަށް ވަޒީރު ވިދާޅުވިއެވެ.
"ރާއްޖެ.އެމްވީ"އަށް މައުލޫމާތު ލިބިފައިވާ ގޮތުން ރާއްޖޭގެ ޓޫރިޒަމަށް 50 އަހަރު ފުރުން ފާހަގަކުރުމުގެ ގޮތުން ރާއްޖޭގެ އެކި ކަންކޮޅުތަކުގައި ސްޕޯޓްސް ޓޫރިޒަމް ޕްރޮމޯޓު ކުރުމަށް ފަތުރުވެރިކަމާ ބެހޭ ވުޒާރާއިން އަންނަނީ މަސައްކަތް ކުރަމުންނެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރުން މީގެ ކުރިން ވެސް ސްޕޯޓްސް ޓޫރިޒަމް ޕްރޮމޯޓު ކުރުމަށް ގިނަ މަސައްކަތްތަކެއް ކޮށްފައިވާއިރު 2019 ވަނަ އަހަރު ރާއްޖޭގައި ވަނީ ފުރަތަމަ ފަހަރަށް ބީޗް ވޮލީބޯޅައިގެ ބައިނަލްއަގްވާމީ މުބާރާތެއް ބާއްވާފައެވެ.
