މޮޓޯޖީޕީ ވޯލްޑް ޗެމްޕިއަންޝިޕް ތިން ފަހަރު ހޯދާފައިވާ މަޝްހޫރު މޮޓޯސައިކަލް ރޭސް ޖެހުންތެރިޔާ ޖޯޖް ލޮރެންޒޯ ރާއްޖެ އަތުވެއްޖެއެވެ.
ހޯމަ ދުވަހުގެ ހެނދުނު ލޮރެންޒޯ ރާއްޖެ އައިސްފައިވާއިރު، ފަތުރުވެރިކަމާ ބެހޭ ވަޒީރު ޑރ. އަބްދުﷲ މައުސޫމާއި، ކުޅިވަރާއި ބެހޭ ވަޒީރު އަޙްމަދު މަޚްލޫފް ވަނީ އޭނާއަށް ވެލާނާ އިންޓަނޭޝަނަލް އެއާޕޯޓުން މަރުހަބާ ކިޔާފައެވެ. އަދި ރާއްޖޭގެ ރޭސް ޖެހުންތެރިންވެސް ވަނީ ލޮރެންޒޯއަށް މަރުހަބާ ކިޔާފައެވެ.
މިއީ ލޮރެންޒޯ ރާއްޖެ އައި ދެވަނަ ފަހަރެވެ. ރާއްޖެ އައުމަށްފަހު މީޑިއާތަކަށް ދިން އިންޓަވިއުއެއްގައި ލޮރެންޒޯ ބުނީ ދެވަނަ ފަހަރަށް ރާއްޖެ އާދެވުމުން އެކަމާ އުފަލުން ހުރި ކަމަށާއި، ރާއްޖެއަކީ ހިތްގައިމު ގައުމެއް ކަމަށެވެ. އަދި ރާއްޖޭގެ ރޭސް ޖެހުންތެރިންނާ ބައްދަލުވުމުން އެކަމާ އުފާވާ ކަމަށްވެސް ލޮރެންޒޯ ބުންޏެވެ. މީގެ އިތުރުން ލޮރެންޒޯ ބުނީ ރޭސް ޖެހުންތެރިންނަށް އެންމެ މުހިންމު ކަމަކީ ފެންވަރު ރަނގަޅު ޓްރެކަކާއި ރަނގަޅު ވަސީލަތްތަކެއް ލިބުން ކަމަށެވެ.
އެއާޕޯޓުގައި ހުރެ މީޑިއާތަކަށް ދެއްވި އިންޓަވިއުއެއްގައި ކުޅިވަރާ ބެހޭ ވަޒީރު އަޙްމަދު މަޚްލޫފް ވަނީ މިއީ ރާއްޖޭގެ ރޭސް ޖެހުންތެރިންނަށް ލިބުނު ކާމިޔާބީއެއް ކަމަށް ސިފަކުރައްވާފައެވެ. އަދި ކުރިއަށް އޮތް ތަނުގައި ރޭސް ޖެހުންތެރިން އެދޭ ބަދަލެއް ގުޅީފަޅު ތަރައްގީވުމުން ފެނިގެންދާނެ ކަމަށް ވަޒީރު ވަނީ ވިދާޅުވެފައެވެ.
މީގެ އިތުރުން ފަތުރުވެރިކަމާ ބެހޭ ވަޒީރު ޑރ. އަބްދުﷲ މައުސޫމް ވިދާޅުވީ ސަރުކާރުގެ އެންމެ ބޮޑު އެއް އަމާޒަކީ ރާއްޖެ ސްޕޯޓްސް ޑެސްޓިނޭޝަނެއްގެ ގޮތުގައި ޕްރޮމޯޓުކުރުން ކަމަށާއި، އެގޮތުން މުސްތަގުބޮލުގައި ރާއްޖޭގައި އެކިކަހަލަ މުބާރާތްތައް ބޭއްވުމަށް ނިންމާފައިވާ ކަމަށެވެ.
ސްޕެއިނަށް އުފަން އުމުރުން 33 އަހަރުގެ ލޮރެންޒޯ ވަނީ މޮޓޯޖީޕީ ވޯލްޑް ޗެމްޕިއަންޝިޕް މީގެ ކުރިން ތިން އަހަރު ކާމިޔާބުކޮށްފައެވެ. އެއީ 2010، 2012 އަދި 2015 ވަނަ އަހަރުއެވެ. އަދި އޭނާ ވަނީ 250ސީސީ ވޯލްޑް ޗެމްޕިއަންޝިޕް 2006 ވަނަ އަހަރާއި 2007 ވަނަ އަހަރު ކާމިޔާބުކޮށްފައެވެ. ރޭސް ޖެހުމުން އޭނާ ރިޓަޔާކޮށްފައިވަނީ 2019 ވަނަ އަހަރުއެވެ.
