ސްޕެނިޝް ލީގުގައި ހޮނިހިރު ދުވަހުގެރޭ ސެވިއްޔާ ބަލިކޮށް ތާވަލުގެ ދެވަނައަށް ބާސެލޯނާ ޖެހިލައިފިއެވެ.

ރަށުން ބޭރުގައި ކުޅުނު މެޗުން ބާސާ މޮޅުވީ 2-0 ގެ ނަތީޖާއަކުންނެވެ. މި މެޗުން ބާސާ މޮޅުވިއިރު، ލީގުގައި އެންމެ ފަހުން ކުޅުނު 15 މެޗުންވެސް އެ ޓީމު ބަލިވެފައެއް ނުވެއެވެ.

ސެވިއްޔާގެ ދަނޑުގައި ކުޅުނު މެޗުގެ ފުރަތަމަ ހާފުގައި ބާސާއިން ރަނގަޅު ކުޅުމެއް ދެއްކިއިރު، މި ހާފުގައި އެ ޓީމުން ވަނީ ލީޑު ނަގާފައެވެ. އެގޮތުން މެޗުގެ 29 ވަނަ މިނެޓުގައި ކެޕްޓަން ލިއޮނެލް މެސީ ދިން ޕާހަކުން މި ލަނޑު ބާސާއަށް ކާމިޔާބުކޮށްދިނީ ފޯވާޑް އޮސްމާނޭ ޑެމްބެލޭއެވެ.

މި މެޗުގެ ދެވަނަ ހާފުގައި ސެވިއްޔާއިން ކުޅުން ރަނގަޅުކުރި ނަމަވެސް، އެ ޓީމަށް ނުރައްކާތެރި ހަމަލާތަކެއް އުފެއްދިފައެއް ނުވެއެވެ. އޭގެ ބަދަލުގައި ބާސާއިން ގިނަ ހަމަލާތަކެއް އުފެއްދިއިރު، ދެވަނަ ހާފުގެ ކުރީކޮޅު އެންމެ ހުސް ފުރުސަތެއް ލިބުނީ އެ ޓީމުގެ ޑިފެންޑަރު ސާޖީނިއޯ ޑެސްޓަށެވެ. އެކަމަކު އޭރިއާ ތެރެއިން އޭނާ ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ.

އެކަމަކު މެޗު ނިމެން ހަތަރު މިނެޓަށް ވެފައި ވަނިކޮށް މެސީ ކާމިޔާބުކުރި ލަނޑުން ބާސާއިން ވަނީ މެޗުގައި ލީޑު ފުޅާކޮށްފައެވެ. މިއީ ލަނޑު ލިސްޓުގެ އެއްވަނައިގައި އޮތް މެސީ މި ސީޒަނުގެ ސްޕެނިޝް ލީގުގައި ކާމިޔާބުކުރި 19 ވަނަ ލަނޑެވެ.

މި މޮޅާއެކު ތާވަލުގެ ދެވަނައަށް ބާސާ ޖެހިލިއިރު، ކުޅުނު 25 މެޗުން އެ ޓީމަށް ވަނީ 53 ޕޮއިންޓް ލިބިފައެވެ. އަދި ތާވަލުގެ އެއްވަނައިގައި އޮތް އެތުލެޓިކޯ މެޑްރިޑަށް 23 މެޗުން 55 ޕޮއިންޓް ލިބިފައިވާއިރު، ތިންވަނައަށް ވެއްޓުނު އެންމެ ފަހުގެ ޗެމްޕިއަން ރެއާލް މެޑްރިޑަށް 24 މެޗުން ވަނީ 52 ޕޮއިންޓް ލިބިފައެވެ. މީގެ އިތުރުން ބާސާ އަތުން ބަލިވި ސެވިއްޔާ އޮތީ ތާވަލުގެ ހަތަރުވަނައިގައި 24 މެޗުން 48 ޕޮއިންޓާއެކުއެވެ.