އާރްބީ ލައިޕްޒީގަށް ކުޅެމުން އަންނަ ފްރާންސްގެ ޒުވާން ޑިފެންޑަރު ޑަޔުޓް އުޕަމެކާނޯ ބަޔާން މިއުނިކަށް ބަދަލުވާން ނިންމާފައިވާ ކަމަށް ރިޕޯޓުތައް ބުނެފިއެވެ.

ރިޕޯޓުތައް ބުނާ ގޮތުން އުމުރުން 22 އަހަރުގެ އުޕަމެކާނޯ ވަނީ ކުރިއަށް އޮތް ހޫނު މޫސުމުގެ ޓްރާންސްފާގައި ބަޔާނަށް ބަދަލުވާން އެއްބަސްވެފައެވެ. އެކަމަކު މިދިޔަ އަހަރު ލައިޕްޒީގާއެކު ހަދާފައިވާ އެއްބަސްވުން 2023 ވަނަ އަހަރުގެ ނިޔަލަށް އުޕަމެކާނޯ އާކުރިއިރު، އެ އެއްބަސްވުން އުވާލަން 42.5 މިލިޔަން ޔޫރޯ ދައްކަން ޖެހެއެވެ. އެއްބަސްވުމުމުގެ އެ މާއްދާއަށް މި ސީޒަން ނިމުމުން އަމަލުކުރަން ފަށާއިރު، ބަޔާނުން އުޕަމެކާނޯގެ ސޮއި ހޯދަން ނިންމީ އެ އަގު ދޭން އެއްބަސްވުމަށްފަހު ކަމަށް ރިޕޯޓުތައް ބުނެއެވެ.

ބަޔާނަށް ބަދަލުވާން އުޕަމެކާނޯ ނިންމިއިރު، އޭނާއަކީ މި ވަގުތު ޔޫރަޕުގައި އެންމެ ޑިމާންޑް ބޮޑު އެއް ޑިފެންޑަރެވެ. އެގޮތުން އޭނާ ހޯދުމަށް ލިވަޕޫލާއި، ޗެލްސީގެ އިތުރުން މެންޗެސްޓާ ޔުނައިޓެޑުންވެސް އަންނަނީ މަސައްކަތް ކުރަމުންނެވެ.

އޮސްޓްރިއާގެ ލިއެފްރިނުން ފުޓްބޯޅަ ކެރިއަރު ފެށި އުޕަމެކާނޯ އެންމެ ފުރަތަމަ ބަދަލުވީ އާރްބީ ސާލްޒްބާގަށެވެ. އަދި ސާލްޒްބާގުގައި ދެ ސީޒަން ހޭދަކުރުމަށްފަހު 2017 ވަނަ އަހަރު އޭނާ ލައިޕްޒީގަށް ބަދަލުވީ 10 މިލިޔަން ޔޫރޯގެ ފީއަކަށެވެ. އަދި މިހާތަނަށް އޭނާ ލައިޕްޒީގުގައި ފަސް ސީޒަން ހޭދަކޮށްފައިވާއިރު، އެ ޓީމަށް ވަނީ ޖުމްލަ 139 މެޗު ކުޅެދީފައެވެ.

އަދި މިދިޔަ އަހަރު ފްރާންސްގެ ގައުމީ ފުޓްބޯޅަ ޓީމުން އުޕަމެކާނޯ ޖާގަ ހޯދިއިރު، އޭނާ ވަނީ އެ ގައުމަށް މިހާތަނަށް ތިން މެޗު ކުޅެދީފައެވެ. އަދި އޭނާ ވަނީ 2018 ވަނަ އަހަރު ޝޯޓްލިސްޓް ކުރި ގޯލްޑަން ބޯއި އެވޯޑަށްވެސް ނޮމިނޭޓުވެފައެވެ.