އިނގިރޭސި ޕްރިމިއާ ލީގުގައި ހޮނިހިރު ދުވަހުގެ ހަވީރު އެސްޓަން ވިލާ އަތުން އާސެނަލް ބަލިވެއްޖެއެވެ.

ވިލާގެ ދަނޑުގައި ކުޅުނު މެޗުން އާސެނަލް ބަލިވީ 1-0 ގެ ނަތީޖާއަކުންނެވެ. މި މެޗުން އާސެނަލް ބަލިވިއިރު، ލީގުގައި އެންމެ ފަހުން ކުޅުނު ދެ މެޗުންވެސް އެ ޓީމު ވަނީ ބަލިވެފައެވެ.

މި މެޗުގެ ފުރަތަމަ ހާފުގައި އާސެނަލުގެ ފަރާތުން އާދައިގެ ކުޅުމެއް ފެނިގެންދިޔައިރު، މެޗުގެ ވަރަށް ކުރީކޮޅު ވިލާއިން ވަނީ ލީޑު ނަގާފައެވެ. އެގޮތުން އާސެނަލުގެ ޑިފެންޑަރު ސެޑްރިކް ސޮއާރެސް ހެދި ގޯހެއްގެ ފައިދާ ނަގައި މެޗު ފަށައިގެން 74 ވަނަ ސިކުންތުގައި މި ލަނޑު ވިލާއަށް ކާމިޔާބުކޮށްދިނީ ފޯވާޑް އޮލީ ވަޓްކިންސްއެވެ. މިއީ މި ސީޒަނުގެ ޕްރިމިއާ ލީގުގައި ވަޓްކިންސް ކާމިޔާބުކުރި 10 ވަނަ ލަނޑެވެ.

މި މެޗުގެ ފުރަތަމަ ހާފާ ޚިލާފަށް ދެވަނަ ހާފުގައި ދެ ޓީމުންވެސް ގިނަ ހަމަލާތަކެއް އުފެއްދިއިރު، އާސެނަލުގެ ހަމަލާތައް ހުއްޓުވުމުގައި ވިލާގެ ގޯލްކީޕަރު އެމިލިއާނޯ މާޓިނޭޒް ވަނީ މުހިންމު ދައުރެއް އަދާކޮށްފައެވެ. އެގޮތުން އާސެނަލުގެ ނިކޮލަސް ޕެޕޭ ފޮނުވާލި ނުރައްކާތެރި ހަމަލާއެއް މާޓިނޭޒް ވަނީ ހުށިޔާރުކަމާއެކު ދިފާއުކޮށްފައެވެ. އަދި މި ހާފުގައި ލީޑު ފުޅާކުރަން ވިލާއަށްވެސް ރަނގަޅު ފުރުސަތުތަކެއް ލިބުނު ނަމަވެސް، އެ ޓީމުގެ ކެޕްޓަން ޖެކް ގްރީލިޝް އާއި މިޑްފީލްޑަރު ރޮސް ބާކްލީއަށް ލިބުނު ފުރުސަތުތަކުގެ ބޭނުން ހިފިފައެއް ނުވެއެވެ.

މި މެޗު ނިމެން ގާތް ވެފައި ވަނިކޮށް ނަތީޖާ އެއްވަރުކުރަން އާސެނަލަށް އެންމެ ހުސް ފުރުސަތެއް ލިބުނީ ބަދަލު ކުޅުންތެރިއެއްގެ ގޮތުގައި ކުޅެން އެރި އެ ޓީމުގެ ޒުވާން މިޑްފީލްޑަރު މާޓިން އޮޑެގާޑަށެވެ. އެކަމަކު އޭރިއާ ތެރެއިން އޮޑެގާޑް ފޮނުވާލި ހަމަލާ ދިޔައީ ގޯލުގެ ހުރަސް ދަނޑިމަތިން ބޭރަށެވެ.

މި ނަތީޖާއާއެކު އާސެނަލް އޮތީ ތާވަލުގެ 10 ވަނައިގައި ކުޅުނު 23 މެޗުން ލިބުނު 31 ޕޮއިންޓާއެކުއެވެ. އަދި މި މޮޅާއެކު ތާވަލުގެ އަށްވަނައަށް ވިލާ ޖެހިލިއިރު، އެ ޓީމަށް ވަނީ 21 މެޗުން 35 ޕޮއިންޓް ލިބިފައެވެ.