ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙުގެ ސަރުކާރުގެ ތިންވަނަ އަހަރު ގުނަމުންދާއިރު، މިހާރުވެސް ކުޅިވަރުގެ ދާއިރާއަށް އިންޤިލާބީ ބަދަލެއް ގެނެސްފައިވާ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

ވަޒީރު މިހެން ވިދާޅުވީ ރައީސް ޞާލިޙުގެ ތިންވަނަ ރިޔާސީ ބަޔާން އިއްވުމާ ގުޅިގެން، ބުރާސްފަތި ދުވަހު ރާއްޖެޓީވީން ގެނެސްދިން ކަވަރޭޖުގައި ވާހަކަފުޅު ދައްކަވަމުންނެވެ. މި އަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި އިއްވި ރިޔާސީ ބަޔާނުގައި ރައީސް ވިދާޅުވީ ކޮވިޑް-19 ގެ ފުރަބަންދުގެ ތެރޭގައިވެސް ކުޅިވަރު ވަސީލަތްތައް ތަރައްޤީކުރުމާއި، ދުޅަހެޔޮ ހަށިހެޔޮ ދިރިއުޅުމެއް ހޯދައިދިނުމުގެ ސިޔާސަތުގެ ދަށުން، މިދިޔަ އަހަރު މުހިންމު މަސައްކަތްތަކެއް ކުރެވިފައިވާ ކަމަށެވެ. އެގޮތުން މާލެ އާއި ރަށްރަށުގައި މިހާރު ފަށާފައިވާ ކުޅިވަރު ދާއިރާގެ މަޝްރޫޢުތައް ފުރިހަމަވެގެންދާއިރު، ރާއްޖޭގެ ތާރީޚުގައިވެސް ކުޅިވަރު ވަސީލަތްތައް ތަރައްޤީނުވާ މިންވަރަށް، އެ ވަސީލަތްތައް ތަރައްޤީވާނެ ކަމަށް ރައީސް ވިދާޅުވިއެވެ.

އެ ވާހަކަތަކަށް އިޝާރާތް ކުރައްވާ ވަޒީރު ވިދާޅުވީ ރައީސްގެ ރިޔާސީ ބަޔާނަކީ އުންމީދުން ފުރިގެންވާ ބަޔާނެއް ކަމަށެވެ. އަދި ރިޔާސީ ބަޔާނުގައި ކުޅިވަރުގެ ފުން ވާހަކަތަކެއް ހިމެނިފައިވުމަކީ، ކުޅިވަރާ ބެހޭ ވުޒާރާއިން ކުރައްވަމުން ގެންދަވާ މަސައްކަތްތައް ރައީސް ބައްލަވައިވަޑައިގެންނެވި ކަމުގެ ހެއްކެއް ކަމަށްވެސް ވިދާޅުވިއެވެ. އަދި މި ހުރިހާ ކަމެއް ހާސިލުކުރުމުގައި އެންމެ ބޮޑު ޝުކުރެއް ހައްގުވާ ބޭފުޅަކީވެސް ރައީސް ޞާލިޙު ކަމަށްވެސް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ މިހާރު ރޭވިފައިވާ މަޝްރޫޢުތައް ނިމިގެންދާއިރު، ތާރީޚުގައިވެސް ނުލިބޭ ވަރުގެ ބޮޑު އިންޤިލާބެއް ކުޅިވަރަށް އަންނާނެ ކަމަށް ރައީސް ވިދާޅުވި ނަމަވެސް، ޙަޤީޤަތަކީ މި ސަރުކާރަށް ދެ އަހަރު ވެގެންދިޔައިރު، މިހާރުވެސް ކުޅިވަރުގެ ދާއިރާއަށް އިންޤިލާބީ ބޮޑު ބަދަލެއް ގެނެސްފައިވާ ކަމެވެ. އަދި އެކަން ކުޅިވަރުގެ އާއިލާގައި އުޅުއްވާ ބޭފުޅުންނަށް ވަރަށް ސާފުކޮށް ފެނިވަޑައިގެންނަވާނެ ކަމަށްވެސް ވިދާޅިއެވެ.

ވަޒީރު ވިދާޅުވީ މިހާރު ކުޅިވަރުގެ ދާއިރާއަށް މި ގެނެވުނު އިންޤިލާބަކީ މިދިޔަ ދެ އަހަރު ތެރޭގައި ރާއްޖޭގެ ކުޅިވަރު ކުރިއެރުވުމަށް ސިޔާސީ އެއްވެސް ތަފާތުކުރުމެއް ނެތި ކުރެވުނު މަސައްކަތުގެ ނަތީޖާ ކަމަށެވެ.

ވަޒީރު މިހެން ވިދާޅުވިއިރު، އެންމެ ގިނަ މަޝްރޫއުތަކެއް މި ސަރުކާރުގައި މިހާތަނަށް ހިންގާފައިވަނީވެސް ކުޅިވަރުގެ ދާއިރާއަށެވެ. އެގޮތުން ރައީސް ޞާލިޙުގެ ރިޔާސީ ވައުދުފުޅުގެ ތެރޭގައި ރާއްޖޭގެ 100 ރަށެއްގައި ފެންވަރު ރަނގަޅު ޓާފް ފުޓްބޯޅަ ދަނޑު އެޅުން ހިމެނޭއިރު، މިހާތަނަށް އަށް ރަށެއްގެ ފުޓްބޯޅަ ދަނޑުތަކުގައި ވަނީ ޓާފް އަޅާފައެވެ. އަދި މިހާތަނަށް ސަރުކާރުން ވަނީ 58 ފުޓްސަލް ދަނޑު ގާއިމުކޮށްފައެވެ.

އަދި ފާއިތުވި އަހަރެއްހާ ދުވަހު ސަރުކާރުން ކުރި މަސައްކަތްތަކަށް ބަލާއިރު ޓޭބަލް ޓެނިހާއި، ޕޫލް ބިލިއާޑަށް ހުޅުމާލޭގައި އިތުރު ވަސީލަތެއް ހަމަޖައްސައިދިނުމާއި، މާލޭ ކުޅިވަރު އެކުވެނީގައި ސިންތެޓިކް ޓްރެކެއް އެޅުންވެސް ހިމެނެއެވެ. އަދި ނެޓްބޯޅަ އާއި ހޭންޑްބޯޅަ އަދި ވޮލީބޯޅައަށް އައު ވަސީލަތްތަކެއް އަޅައިދިނުމުގެ މަސައްކަތްވެސް ހަމަޖައްސައިދިނެވެ. އަދި ދާދި ފަހުން ވަނީ މާލޭގައި އޮލިމްޕިކް ސައިޒުގެ ސްވިމިންގ ޕޫލެއް އެޅުމަށް ބިންވެސް ހަވާލުކޮށްފައެވެ.

އަދި ރައީސް ޞާލިޙުގެ ރިޔާސީ ވައުދުފުޅުތަކުގެ ތެރޭގައި ރާއްޖޭގައި ބައިނަލްއަގުވާމީ ކުޅިވަރު މުބާރާތްތައް ބޭއްވުން ހިމެނޭއިރު، މީގެ ކުރިން ވަނީ މިދިޔަ އަހަރު ބައިނަލްއަގުވާމީ ގިނަ މުބާރާތްތައް ރާއްޖޭގައި ބޭއްވުމަށްވެސް ނިންމާފައެވެ. އެކަމަކު ކޮވިޑާއެކު އެ މުބާރާތްތައް މި އަހަރަށް ފަސްވެފައިވާއިރު، ކުޅިވަރުގެ ދާއިރާއިން މިދިޔަ އަހަރު ރާއްޖެއަށް ލިބުނު އެންމެ ބޮޑު ނާކާމިޔާބަކީ 2023 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ރާއްޖޭގައި ބޭއްވުމުގެ ފުރުސަތު ގެއްލުމެވެ.