ބޮޑީބިލްޑިންގ އެސޯސިއޭޝަން އޮފް މޯލްޑިވްސް (ބީބީއޭއެމް) އިން ބާއްވަމުން އަންނަ ނެޝަނަލް ބޮޑީބިލްޑިންގ އެންޑް ފިޒީކްސް ސްޕޯޓްސް ޗެމްޕިއަންޝިޕް (މިސްޓަރ މޯލްޑިވްސް) ގެ އެކްސްކުލޫސިވް ރައިޓްސް ކުރިއަށް އޮތް ތިން އަހަރަށް ރާއްޖެޓީވީއަށް ދީފިއެވެ.
މިސްޓަރ މޯލްޑިވްސްގެ މުޅި އިވެންޓް މި އަހަރުން ފެށިގެން ތިން އަހަރަށް ރާއްޖެޓީވީއަށް ދިނުމަށް އެއްބަސްވީ ހޯމަ ދުވަހު ރާއްޖެޓީވީގައި ބޭއްވި ރަސްމިއްޔާތުގައެވެ. މި އެއްބަސްވުމުގައި ރާއްޖެޓީވީގެ ފަރާތުން މެނޭޖިންގ ޑިރެކްޓަރު އަޙްމަދު ސަލީމް ސޮއިކުރެއްވިއިރު، ބީބީއޭއެމުގެ ފަރާތުން އެއްބަސްވުމުގައި ސޮއިކުރެއްވީ އެ އެސޯސިއޭޝަނުގެ ނައިބު ރައީސް އަޙްމަދު އައިމަނެވެ.
މި އެއްބަސްވުމާއެކު ކުރިއަށް އޮތް ތިން އަހަރު ބޭއްވުމަށް ހަމަޖެހިފައިވާ މިސްޓަރ މޯލްޑިވްސްގެ އެކްސްކުލޫސިވް ރައިޓްސް ރާއްޖެޓީވީއަށް ވަނީ ލިބިފައެވެ. އަދި މި އެއްބަސްވުމުގެ ދަށުން މިސްޓަރ މޯލްޑިވްސް ޕްރޮމޯޓް ކުރުމަށް މުބާރާތުގެ އެތުލީޓުންނާއެކު ރާއްޖެޓީވީން މަސައްކަތްކުރާއިރު، އެ މުބާރާތައް ހާއްސަކޮށްގެން ޕްރީ-ޝޯތަކެއް ތައްޔާރުކުރުމަށްވެސް ވަނީ ނިންމާފައެވެ.
އެއްބަސްވުމުގައި ސޮއިކުރެއްވުމަށްފަހު ބީބީއޭއެމްގެ ނައިބު ރައީސް އަޙްމަދު އައިމަން ވިދާޅުވީ މިސްޓަރ މޯލްޑިވްސްއަކީ ދިވެހިން ވަރަށް ޝައުގުވެރިކަމާއެކު ދެކެން ބޭނުންވާ ޝޯއެއް ކަމަށާއި، މި ޝޯ ހިންގުމަށް ރާއްޖެޓީވީއާއެކު ސޮއިކުރުމާއެކު، ޝޯ އިތުރަށް ފުރިހަމަވެގެންދާ ކަމަށެވެ. އަދި މި ދަތި ހާލަތުގައިވެސް ރާއްޖެޓީވީން ކުޅިވަރަށް ދޭ އަހަންމިއްޔަތުކަން މިކަމުން ވަރަށް ބޮޑަށް ފާހަގަވާ ކަމަށާއި، ބޮޑީބިލްޑިންގއަަކީ ސިއްހަތާ ގުޅިފައިވާ ކަމަކަށްވާއިރު، ރާއްޖެޓީވީން ސިއްހަތަށް ދޭ އަހަންމިއްޔަތުކަންވެސް ފާހަގަވާ ކަމަށްވެސް އައިމަން ވިދާޅުވިއެވެ.
މި ރަސްމިއްޔާތުގައި ބޮޑީބިލްޑަރުންގެ ފަރާތުން ވާހަކަދައްކަމުން އަލީ ސަލީމް އިބްރާހީމް ބުނީ މި ފެންވަރުގެ މުބާރާތެއް ރާއްޖެޓީވީން އިސްނަގައިގެން ތިން އަހަރުގެ މުއްދަތަށް ނެގުމަކީ ބޮޑީބިލްޑަރުންނަށްވެސް ލިބިގެންދާ ވަރަށް ބޮޑު ހިތްހަމަޖެހުމެއް ކަމަށެވެ. އަދި މިކަމުން ބޮޑީބިލްޑަރުން ކުރާ ބުރަ މަސައްކަތް ރާއްޖެޓީވީގެ ފަރާތުންވެސް ބަލައިގެންފައިވާކަންވެސް ހާމަވެގެންދާ ކަމަށްވެސް ބުންޏެވެ.
މި ރަސްމިއްޔާތަށްފަހު ރާއްޖެޓީވީގެ ސްޕޯޓްސް ހެޑް ހުސެއިން ފަރިޔާޒް ވިދާޅުވީ މިސްޓަރ މޯލްޑިވްސް ބޭއްވުމަށް ރާއްޖެޓީވީއާއެކު އެއްބަސްވެގެން ދިޔުމާއެކު، މި ކަމުގެ ސަބަބުން ބީބީއޭއެމަށް ވަރަށް ގިނަ ފައިދާތަކެއް ކުރާނެ ކަމަށެވެ. އަދި މިސްޓަރ މޯލްޑިވްސް ނެގުމުގެ އެންމެ ބޮޑު ބޭނުމަކީ ކުޅިވަރު ކުރިއެރުވުމަށް ރާއްޖެޓީވީން ކުރަމުންދާ މަސައްކަތް އިތުރަށް ފުޅާކޮށް، ބޮޑީބިލްޑިންނަކީ ރާއްޖޭގެ މަގުބޫލް ކުޅިވަރަކަށް ހަދައި، ބޮޑީބިލްޑަރުންނަކީ ގިނަ ބަޔަކަށް އެނގޭނެ ބަޔަކަށް ހެދުން ކަމަށްވެސް ވިދާޅުވިއެވެ. އަދި މި އެއްބަސްވުމާއެކު މިސްޓަރ މޯލްޑިވްސް ކުލަގަދަ އިވެންޓަކަށް ހެދުމަށް ރާއްޖެޓީވީން މަސައްކަތްކުރާނެ ކަމަށްވެސް ފަރިޔާޒް ވަނީ ވިދާޅުވެފައެވެ.
ކުރިއަށް އޮތް ތިން އަހަރަށް މިސްޓަރ މޯލްޑިވްސްގެ އެކްސްކުލޫސިވް ރައިޓްސް ރާއްޖެޓީވީއަށް ދިންއިރު، މި އަހަރުގެ ބޭއްވުމަށް ހަމަޖެހިފައިވާ 19 ވަނަ ނެޝަނަލް ބޮޑީބިލްޑިންގ އެންޑް ފިޒީކްސް ސްޕޯޓްސް ޗެމްޕިއަންޝިޕް (މިސްޓަރ މޯލްޑިވްސް) އޮންނާނީ މާޗު މަހުގެ 26 ވަނަ ދުވަހުއެވެ. މި އަހަރުގެ މުބާރާތް މާޗު މަހު ބޭއްވުމަށް ތާވަލުކުރިއިރު، ކޮވިޑް-19 އާ ގުޅިގެން މިދިޔަ އަހަރު މުބާރާތް ބާއްވާފައެއް ނުވެއެވެ
