ސަރުކާރުގެ އިސް މަގާމުތަކެއް ފުރުއްވައި އަދި ސަރުކާރަށް އިޚްލާޞްތެރި ޚިދުމަތްތަކެއް ކޮށްދެއްވި މައްޗަންގޮޅި ދޭދަރުގޭ އިސްމާޢީލް ފިރާޤު އަވަހާރަވުމާއި ގުޅިގެން އެ ޢާއިލާއަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތަޢުޒިޔާ ވިދާޅުވެއްޖެއެވެ.

އިސްމާޢީލް ފިރާޤު އަވަހާރަވީ، ގިނަ ދުވަސްތަކެއް ވަންދެން އާލާސްކަންފުޅާ އުޅުއްވުމަށްފަހު، ބުދަ ދުވަހުގެރޭ އޭޑީކޭ ހޮސްޕިޓަލުގައެވެ. އަވަހާރަވިއިރު އުމުރަކީ 59 އަހަރެވެ.

އަލްމަރްޙޫމް އިސްމާޢީލް ފިރާޤަކީ، 19 އަހަރަށްވުރެ ދިގު މުއްދަތެއްގައި ސަރުކާރަށް ޚިދުމަތް ކުރައްވާފައިވާ އަދި ސަރުކާރުގެ އިސް މަގާމުތަކެއް ފުރުއްވާފައިވާ ބޭފުޅެކެވެ. ފުރަތަމަ އަދާކުރެއްވީ، މިނިސްޓްރީ އޮފް އެޓޮލްސް އެޑްމިނިސްޓްރޭޝަންގެ ސެކްރެޓަރީކަމެވެ. އޭގެފަހުން އެ މިނިސްޓްރީގެ އެސިސްޓެންޓް ޕްރޮޖެކްޓް އޮފިސަރު ކަމާއި، ޕްރޮގްރާމް އެނަލިސްޓްކަން ކުރައްވާފައިވެއެވެ. އޭގެފަހުން ޚިދުމަތް ކުރެއްވީ މިނިސްޓްރީ އޮފް ޓޫރިޒަމްގައެވެ. އެ މިނިސްޓްރީގެ އެސިސްޓެންޓް ޑިރެކްޓަރ، ޕްލޭނިންގ އެންޑް ޑިވެލޮޕްމަންޓް ކަމުގެ މަގާމާއި، ޑެޕިއުޓީ ޑިރެކްޓަރ، ޕްލޭނިންގ އެންޑް ޑިވެލޮޕްމަންޓް ކަމުގެ މަގާމު އަދާކުރައްވާފައިވެއެވެ. އަދި މިނިސްޓްރީ އޮފް އެންވަޔަރަންމަންޓް، އެނަރޖީ އެންޑް ވޯޓަރގެ ޑިރެކްޓަރ ކަމުގެ މަގާމާއި، މިނިސްޓްރީ އޮފް ޕްލޭނިންގ އެންޑް ނޭޝަނަލް ޑިވެލޮޕްމަންޓްގެ ޑިރެކްޓަރ ޖެނެރަލް ކަމުގެ މަގާމާއި، އެގްޒެކެޓިވް ޑިރެކްޓަރ ކަމުގެ މަގާމުވެސް ފުރުއްވާފައިވެއެވެ.

އިސްމާޢީލް ފިރާޤުގެ މައްޗަށް ކަށުނަމާދުކުރުން އޮތީ، މިއަދުގެ މެންދުރު ނަމާދަށްފަހު ފުރުޤާން މިސްކިތުގައެވެ. ކަށުނަމާދުގައްޔާއި ޖަނާޒާގައި ރައިސުލްޖުމްހޫރިއްޔާއާއި، ރައީސުލްޖުމްހޫރިއްޔާގެ ނައިބާއި، ބައެއް ވަޒީރުންނާއި، ސަރުކާރުގެ އިސް ބައެއް ބޭފުޅުން ބައިވެރިވެވަޑައިގެންނެވިއެވެ. އަދި ޢާންމުންގެ ގިނަ އަދަދެއްގެ ބަޔަކުވެސް ބައިވެރިވިއެވެ.