ބާންލީއަށް ކުޅެމުން އަންނަ އިނގިރޭސި ގައުމީ ޓީމުގެ ކުރީގެ މިޑްފިލްޑަރު ޖޯއި ބާޓޮން ފުޓުބޯޅަ ހަރަކާތްތަކުން 18 މަސްދުވަހަށް ސަސްޕެންޑުކުރަން އިނގިރޭސި އެފްއޭ އިން ނިންމައިފިއެވެ.
އުމުރުން 34 އަހަރުގެ ބާޓޮން ސަސްޕެންޑުކުރަން ނިންމާފައިވަނީ އެފްއޭގެ ގަވައިދާ ހިލާފުވެ، ފުޓުބޯޅަ މެޗުތަކުގައި މަކަރުހެދި ކަމަށް އެއްބަސްވުމުން އެކަމުގެ އަދަބެއްގެ ގޮތުންނެވެ.
އެގޮތުން އެފްއޭ އިން ބުނީ 26 މާޗު 2006 ން ފެށިގެން 13 މޭއި 2016 ގެ ނިޔަލަށް މެޗުތަކުގެ ނަތީޖާ އަދި އެހެނިހެން ކަންކަމަށް ބާޓޮން 1،260 ބެޓު ކޮށްފައިވާކަން ސާބިތުވާ ކަމަށާއި، މިއީ އެފްއޭގެ އީ-އެއިޓް ގަވައިދާ ހިލާފު ކަމެއް ކަމަށެވެ.
Midfielder @Joey7Barton has been suspended from all football activity after admitting an FA misconduct charge: https://t.co/reUbzOTn78
— The FA (@FA) April 26, 2017
މީގެއިތުރުން އިންޑިޕެންޑެންޓް ރެގިއުލޭޓަރީ ކޮމިޝަންގެ އަޑުއެހުމުގައި ބާޓޮން ސަސްޕެންޑުކުރުމުގެ އިތުރުން އޭނާ ވަނީ 30،000 ޕައުންޑުން ޖޫރިމާނާވެސް ކޮށްފައެވެ.
މިދިޔަ އަހަރު ސްކޮޓިޝް އެފްއޭ އިން ވެސް ވަނީ ބާޓޮންގެ މިފަދަ އަމަލަކަށް އޭނާ އެއް މެޗަށް ސަސްޕެންޑުކޮށްފައެވެ. އޭނާ ވަނީ މިދިޔަ އަހަރު ޖުލައި އެއްވަނަ ދުވަހުން ފެށިގެން ސެޕްޓެމްބަރު މަހުގެ 15 ވަނަ ދުވަހުގެ ނިޔަލަށް 44 ބެޓު ކުރިކަމަށްވެސް އެއްބަސްވެފައެވެ. އޭނާ މިގޮތަށް އެއްބަސްވެފައިވަނީ ކުރިން ކުޅުނު ކްލަބް ރޭންޖާޒްއަށް ބަދަލުވުމަށްފަހުއެވެ.
މިހާރު ބާންލީއަށް ކުޅެމުން އަންނަ ބާޓޮން ވަނީ ނިއުކާސަލް، މެންޗެސްޓާ ސިޓީ އަދި ކުއީންސް ޕާކް ރޭންޖާސް (ކިއުޕީއާރް) ފަދަ ކްލަބްތަކަށް ކުޅެފައެވެ. މީގެއިތުރުން އޭނާ ވަނީ އިނގިރޭސި ގައުމީ ޓީމަށްވެސް ކުޅެފައެވެ.
