އެމެރިކާގެ ފާމަސޫޓިކަލް ކުންފުނި ފައިޒަރ އާއި ޖަރުމަނުގެ ބައޯއެންޓެކް ގުޅިގެން އުފެއްދި ކޮވިޑް-19 ވެކްސިން އެމެރިކާގައި ޖަހަން ފަށައިފިއެވެ.

އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ހުކުރު ދުވަހު ވަނީ ފައިޒަރގެ ކޮވިޑް-19 ވެކްސިން އެމަރޖެންސީކޮށް ބޭނުންކުރުމަށް ހުއްދަ ދީފައެވެ. އެގޮތުން އެންމެ ފުރަތަމަ ވެކްސިން ޖެހި މީހަކީ ނިއު ޔޯކް ސިޓީގެ ލޯންގް އައިލެންޑް މެޑިކަލް ސެންޓަރގެ އައިސީޔޫގައި މަސައްކަތްކުރާ ނަރުހެއްކަމަށްވާ ސެންޑްރާ ލިންޑްސީއެވެ.

ވެކްސިން ޖެހުމަށްފަހު މީޑިޔާއާ ވާހަކަދައްކަމުން ސެންޑްރާ ބުނީ ވެކްސިނާއެކު އުންމީދު އައު ވެގެން ހިނގައްޖެކަމަށެވެ. އަދި މިއީ ގައުމަށް ދިމާވި ހިތާމަވެރި ވޭނުން ފުރިފައިވާ ދުވަސްތަކެއްގެ ނިމުމުގެ ފެށުމަށް ވެގެން ދާނެ ކަމުގައި އުންމީދުކުރާ ކަމަށް ސެންޑްރާ ބުންޏެވެ.

ސެންޑްރާ ވެކްސިން ޖެހިތާ މިނެޓްތަކެއް ފަހުން އެމެރިކާގެ ރައީސް ޑޮނަލްޑް ޓްރަމްޕް ވަނީ ވެކްސިން ޖަހަން ފެށިކަން ހާމަކޮށް އެމެރިކާ އާއި ދުނިޔެއަށް މަރުޚަބާ ވިދާޅުވެ ޓްވީޓް ކުރައްވާފައެވެ. ހޯމަ ދުވަހު އެމެރިކާގައި ވެކްސިން ޖަހަން ފަށާފައިވާއިރު އެންމެ ފުރަތަމަ ވެކްސިން ޖަހަން ފެށި ސްޓޭޓަކީ ނިއު ޔޯކެވެ.

ފައިޒަރގެ ވެކްސިންގެ 2.9 މިލިއަން ޑޯޒް އެމެރިކާގެ އެކި ހިސާބުތަކުގެ ހޮސްޕިޓަލްތަކަށް ބަހަން ފަށާފައި ވަނީ އާދިއްތަ ދުވަހުއެވެ. އެހެންކަމުން ހޯމަ ދުވަހުގެ ވަގުތެއްގައި އެމެރިކާގެ 150 ހޮސްޕިޓަލަކަށް ވެކްސިން ޑޯޒްތައް ލިބޭނެއެވެ.

އެމެރިކާ އަކީ ކޮވިޑް-19 ގެ ހާލަތު އެންމެ ގޯސް ގައުމެވެ. ނޮވެމްބަރ މަހުން ފެށިގެން އެ ގައުމުގައި ކޮވިޑް ޖެހިގެން މަރުވާ މީހުންގެ އަދަދު އަންނަނީ އިތުރުވަމުންނެވެ. އަދި ކޮވިޑް ޖެހިގެން ހޮސްޕިޓަލްގައި އެޑްމިޓްކުރަމުންދާ މީހުންގެ އަދަދުވެސް އަންނަނީ އިތުރުވަމުންނެވެ.