ބައެއް މިނިސްޓްރީތަކުގެ ބަޖެޓު ބޮޑުވުމުން ރައްޔިތުންގެ މަޖިލީހުގެ މެމްބަރުން ކަންބޮޑުވުން ފާޅުކުރައްވައިފި އެވެ.
ބުދަ ދުވަހު އަންނަ އަހަރަށް ލަފާ ކުރާ ދައުލަތުގެ ބަޖެޓަށް ބަހުސް ކުރައްވަމުން ބައެއް މެމްބަރުން ވަނީ ބައެއް މިނިސްޓްރީތަކުގެ ބަޖެޓު ބޮޑުވުމުން އެކަން ފާހަގަކުރައްވާފަ އެވެ.
އެގޮތުން އެމްޑީޕީގެ ޕީޖީ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް ވަނީ ފާއިތުވެދިޔަ އަހަރުތަކުގައި އިކޮނިމިކް މިނިސްޓްރީގެ ބަޖެޓާއި އަޅާބަލާއިރު އަންނަ އަހަރަށް އެ މިނިސްޓްރީއަށް ކަނޑައަޅާފައިވާ ބަޖެޓު އެތައް ގުނައެއް ބޮޑުވެފައިވާކަން ފާހަގަކުރައްވާފަ އެވެ.
2019 ވަނަ އަހަރު އެ މިނިސްޓްރީގެ ބަޖެޓަކީ 58 މިލިއަން. 2020 ވަނަ އަހަރު އެ މިނިސްޓްރީގެ ބަޖެޓަކީ 105 މިލިއަން. އަންނަ އަހަރު ލަފާ ކުރާ ބަޖެޓު އަނެއްކާވެސް ބަޖެޓު ކޮމިޓީން ދިރާސާކޮށް ބަލާލަން ޖެހޭނެ. 2021 ވަނަ އަހަރުގެ ބަޖެޓަކީ 304 މިލިއަން ރުފިޔާ.އެމްޑީޕީގެ ޕީޖީ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް
އިކޮނޮމިކް މިނިސްޓްރީގެ ބަޖެޓު ތިން ގުނަ ވެފައިވާއިރު، މިވާހަކަތައް ރައްޔިތުން ތަމްސީލުކުރާ މެމްބަރުންގެ ހައިސިއްޔަތުން ދައްކަން ޖެހޭ ކަމަށެވެ.
މި ކަންބޮޑުވުން ދެން ފާޅުކުރައްވާފައިވަނީ ހުޅުދޫ ދާއިރާގެ މެމްބަރު އިލްޔާސް ލަބީބެވެ. މެމްބަރު ވިދާޅުވެފައިވަނީ ބަޖެޓުގެ ހަރަދުތައް ހިންގަނީ ކޮން ކަމަކަށްތޯ ބަލަން ޖެހޭ ކަމަށެވެ. އެހެންނަމަވެސް ދައުލަތަށް ލިބޭ އާމްދަނީއަށް ވުރެ ހިންގުމުގެ ހަރަދަށް ދާ ވަރު ބޮޑުވާކަމަށްވަނަމަ އެއީ ކަންބޮޑުވާން ޖެހޭ ކަމެއް ކަމަށެވެ.
އިލްޔާސް ވިދާޅުވީ ބައެއް މިނިސްޓްރީތަކުގެ ބަޖެޓު ބޮޑުވެގެން ނުވާނެ ކަމަށާއި ދައުލަތެއް ބިނާކޮށް، ޑިމޮކްރެސީ ކުރިއެރުވުމަށް މަސައްކަތް ކުރަމުން އަންނައިރު މިނިސްޓްރީތަކަށް ފާރަވެރިވާ މުއައްސަސާތަކަށް ވެސް އެވަރުގެ ބަޖެޓެއް ދޭން ޖެހޭ ކަމަށެވެ.
މިފަދަ މޭރުމަކުން މެމްބަރުން ވާހަކަދައްކަވާފައިވާއިރު ބަޖެޓު ކޮމިޓީގެ މުގައްރިރު އަދި ކިނބިދޫ ދާއިރާގެ މެމްބަރު މުހައްމަދު ނާޝިޒް ވަނީ ބަޖެޓު ދިރާސާ ކުރާއިރު އެކަންކަމަށް ބަލާނެ ކަމުގެ ޔަގީން ކަން އަރުވާފަ އެވެ.
