އަންނަ އަހަރަށް ލަފާކޮށް ހުށައަޅާފައިވާ ބަޖެޓުގައި ކަންބޮޑުވުންތަކެއް ހުރި ނަމަވެސް، މިހާރު ހުށައަޅާފައިވާ ބަޖެޓުގައި އިގްތިސާދު ސްޓިމިއުލޭޓް ކުރަން ހިމަނާފައިވާ ކަންކަމަށް ތާއީދުކުރައްވާ ކަމަށް ރައްޔިތުންގެ މަޖިލީހުގެ ބަޖެޓު ކޮމިޓީގެ މުގައްރިރު ވިދާޅުވެއްޖެއެވެ.
2021 ވަނަ އަހަރަށް ލަފާކޮށް ހުށައަޅާފައިވާ ބަޖެޓާ ގުޅޭގޮތުން ރާއްޖެޓީވީގެ "ފަލަ ސުރުހީ" ގައި ވާހަކަ ދައްކަވަމުން މެމްބަރު ނާޝިޒް ވަނީ ގިނަ ކަންތައްތަކަށް އަލިއަޅުވާލާ ވާހަކަ ދައްކަވާފައެވެ. އެގޮތުން ނާޝިޒް ވިދާޅުވީ، މިއީ ޗެލެންޖިންގ އަދި ތަންފީޒުކުރަން އުނދަގޫ ބަޖެޓަކަށް ވާނެ ކަމަށެވެ.
ހާއްސަކޮށް އާމްދަނީ ވަކިވަރަކަށް ލިބޭނެކަން އަންދާޒާކޮށް ތައްޔާރުކުރާ ބަޖެޓުގައި ދަތިތަކެއް ހުންނާނެ ކަން ގަބޫލުކުރައްވާ ކަމަށް ނާޝިޒް ވިދާޅުވިއެވެ. އަދި މިއީ ރާއްޖޭގެ ތާރީހުގައި ވެސް މިހާ ދަތި އުނދަގޫ ހާލަތެއްގައި ހުށައެޅިގެން ދިޔަ ހަމައެކަނި ބަޖެޓްކަން ފާހަގަކުރައްވާ ނާޝިޒް ވިދާޅުވީ، މީގެ ކުރިން ދައުލަތުގެ އާމްދަނީ މިހާ ދަށަށް ގޮސްގެން އާމްދަނީއަށް ފައިނޭންސް ކުރާކަށް ނުޖެހޭ ކަމަށެވެ.
މިކަހަލަ އިގްތިސާދީ ދަތި ހާލަތެއްގައި އަޅުގަނޑުމެންނަށް ކުރިމަތިވި ފުރަތަމަ ބަޖެޓު. 2010 ގައި ވަރަށް ޓަފް ޑިސިޝަންސް ނަގައިގެން އޭރުވެސް އައި ވަރަށް ބޮޑަށް އިކޮނޮމައިޒް ކޮށްފަ އޮތް ބަޖެޓެއް. އޭރަކުވެސް އަޅުގަނޑުމެންގެ އާމްދަނީ ބައި ހާފް ނުވަތަ 60 ޕަސެންޓް އާމްދަނީ އެއްކޮށް ގޮސްގެން، އެ ފައިނޭންސް ކުރާކަށް ނުޖެހޭ.ބަޖެޓު ކޮމިޓީގެ މުގައްރިރު ކިނބިދޫ ދާއިރާގެ މުހައްމަދު ނާޝިޒް
ބަޖެޓާ ގުޅޭގޮތުން މޯލްޑިވްސް މަނިޓަރީ އޮތޯރިޓީ އަދި އޮޑިޓަރ ޖެނެރަލް އޮފީހުގެ ފަރާތުން ދީފައިވާ ލަފަޔަށް އަލިއަޅުއްވާލައްވާ ނާޝިޒް ވިދާޅުވީ، އެ ދެ މުއައްސަސާއިން ވެސް ފާހަގަކޮށްފައި ވަނީ ރަނގަޅު ނުކުތާތަކެއް ކަމަށެވެ. އަދި މައިގަނޑު ގޮތެއްގައި ދެ މުއައްސަސާގެ ކަންބޮޑުވުންތައް ހުރީ މަޝްރޫއުތައް ހިންގަން ފައިސާ ހޯދާނެ ގޮތަކާއި މެދުގައި ކަމަށާއި، ނެތް ފައިސާއިން މަޝްރޫއު ނުހިންގުމަށް ލަފާދެއްވާފައިވާ ކަމަށް ވިދާޅުވިއެވެ.
ކަންބޮޑުވުންތަކާ އެކުވެސް، އިގްތިސާދު ސްޓިމިއުލޭޓް ކުރަންޖެހޭ ކަމަށް އެންމެންވެސް ގަބޫލުކުރާ ކަމަށް ވިދާޅުވިއެވެ. އެގޮތުން އަންނަ އަހަރު ބަޖެޓު ކުރެވިގެން ހިންގާ ޕީއެސްއައިޕީ މަޝްރޫއުތަކުގެ ސަބަބުން އިގްތިސާދު ސްޓިމިއުލޭޓް ވާނެ ކަމަށާއި، މިއީ ގައުމުގެ އިގްތިސާދީ މުސްތަގުބަލަށް ނުހަނު ބޭނުންތެރި ކަމެއް ކަމަށް ވިދާޅުވިއެވެ.
ނާޝިޒް އިތުރަށް ވިދާޅުވީ، މި ހާލަތުގައި ސަރުކާރުގެ ހުރިހާ ސިޔާސަތެއް ތަންފީޒުކުރެވޭނެ ބަޖެޓެއް ހުށައެޅުމަކީ ނުވާނެ ކަމެއް ކަމަށެވެ. އަދި ކޮވިޑުގެ ހާލަތާއި ގުޅިގެން އިގްތިސާދަށް ދިމާވެފައިވާ ގޮންޖެހުންތަކުން އަރައިގަނެވޭނީ އެ ހާލަތު ބަދަލުވެގެން ކަމަށް ވިދާޅުވިއެވެ. އެގޮތުން ކޮވިޑަށް ވެކްސިނެއް ނުވަތަ ފަރުވާއެއް ލިބުމުން، މި ހާލަތު މުޅިން އެއްކޮށް ބަދަލުވެގެންދާނެ ކަމަށް ވިދާޅުވިއެވެ.
ހަގީގަތުގައި ކޮވިޑްގެ މި ހާލަތަކީ މިއީ ޓެމްޕަރަރީ ހާލަތެކޭ. އިގްތިސާދީ މި ހާލަތް ދިމާވެގެން އުޅެނީ ކޮވިޑާ ހެދި. އެހެންވީމާ ކޮވިޑަށް ހައްލެއް ހޯދުނީމަ، މިސާލަކަށް ވެކްސިނެއް ނަމަވެސް އަހަރުގެ ކުރީކޮޅު އައިސްފިނަމަ މުޅި މި ސިނޭރިއޯ އެއްކޮށް ބަދަލުވެގެން ދާނެ.ބަޖެޓު ކޮމިޓީގެ މުގައްރިރު ކިނބިދޫ ދާއިރާގެ މުހައްމަދު ނާޝިޒް
2021 ވަނަ އަހަރަށް ލަފާކޮށް ދައުލަތުން ހުށައަޅާފައިވަނީ، 34.7 ބިލިއަން ރުފިޔާގެ ބަޖެޓެކެވެ. އާމްދަނީގެ ގޮތުގައި ލިބޭނެކަމަށް އަންދާޒާކޮށްފައިވަނީ، ޓެކުހުގެ ގޮތުގައި 9.8 ބިލިއަން ރުފިޔާ، ޓެކްސް ނޫން އާމްދަނީގެ ގޮތުގައި 5.75 ބިލިއަން ރުފިޔާ އަދި ހިލޭ އެހީގެ ގޮތުގައި 2.2 ބިލިއަން ރުފިޔާއެވެ. މި އަހަރުގެ ބަޖެޓު 15.5 ބިލިއަން ރުފިޔާއިން ޑެފިސިޓް ވާނެއެވެ.
