މި ސަރުކާރަކީ ވަކި ޕާޓީއެއްގެ ސަރުކާރެއް ކަމަށް ދެކެވެމުންދާ ވާހަކަތަކަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރައްދުދެއްވައިފިއެވެ.
މި ސަރުކާރަކީ ހަމައެކަނި 'އެމްޑީޕީ ސަރުކާރެއް' ކަމަށް ދޭހަވާ މޭރުމުން އެ ޕާޓީގެ ބައެއް މެމްބަރުން ގެންދަވަނީ ވާހަކަދައްކަމުންނެވެ.
ޖުމްހޫރީ ދުވަހުގެ މުނާސަބަތުގައި ރާއްޖެޓީވީގެ ފަށާއިރު ޕްރޮގްރާމްގައި އެކަމާ ގުޅޭގޮތުން ވާހަކަދައްކަވަމުން ރައީސް ސޯލިހު ވިދާޅުވީ، މިހާތަނަށް އެއްވެސް ޕާޓީއަކަށް 50 އިންސައްތަ އަގުލަބިއްޔަތުން ވެރިކަމަށް އާދެވިފައި ނުވާ ކަމަށެވެ.
ރާއްޖޭގެ ސިޔާސީ މަސްރަހު އޮތް ގޮތްއަޅިުގަނޑުމެން ފުރަތަމަ ބަލާލަން ޖެހޭ، އެއްވެސް ސިޔާސީ ޕާޓީއަކަށް ރައްޔިތުންގެ 50% އަގުލަބިއްޔަތެއް ނެތް.ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު
އެމްޑީޕީއަކީ ރާއްޖޭގެ އެންމެ ބޮޑު ޕާޓީކަން ފާހަގަކުރައްވާ ރައީސް ސޯލިހު ވިދާޅުވީ އެހެންނަވަމެސް، އެ ޕާޓީއަށް ވެސް ރިޔާސީ އިންތިހާބު ކާމިޔާބުކުރެވިފައިވަނީ ކޯލިޝަނަކުން ކަމަށެވެ. މި ސަރުކާރުގެ ކޯލިޝަންގެ މައި ޕާޓީކަމަށް އެމްޑީޕީ ވީނަމަވެސް މިއީ ހަމައެކަނި ވަކި ޕާޓީއެއްގެ ވެރިކަމެއް ކަމަށް ނުދަންނަވާނެ ކަމަށެވެ. މިކަން ފާހަގަކުރައްވާ ރައީސް ވިދާޅުވީ މިއީ ރައްޔިތުންގެ ވެރިކަމެއް ކަމަށެވެ.
