އިންޑިއާ ސަރުކާރުގެ ދައުވަތަކަށް، ރާއްޖެ ވަޑައިގެން އުޅުއްވާ އެ ގައުމުގެ ފޮރިން ސެކްރެޓަރީ ޕްރޮގްރެސިވް ކޮންގްރެސް ކޯލިޝަންގެ އިސްވެރިންނާއި އެޑްވައިޒަރުން ބައްދަލުކުރައްވައިފިއެވެ.
މާލޭގައި ހުންނަ އިންޑިއާ ހައިކޮމިޝަންގައި ބޭއްވުނު ބައްދަލުވުމާއި ގުޅޭގޮތުން ޕީޕީއެމް-ޕީއެންސީން ބުނީ މި ބައްދަލުވުމުގައި ޕީޕީއެމްގެ ރައީސް، ރައީސް އަބްދުﷲ ޔާމީން އަބްދުލްގައްޔޫމަށް ސަރުކާރުން ނުޙައްގުން ދެމުންދާ އަނިޔާތަކާމެދު ވާހަކަދައްކަވާ މަޝްވަރާކޮށްފައިވާ ކަމަށެވެ.
އިދިކޮޅުން ބުނީ އެ މަނިކުފާނުގެ ޝަރީއަތަކީ ބައިނަލްއަގުވާމީ އުސޫލުތަކާއި ރާއްޖޭގެ ގާނޫނު އަސާސީއާއި ގާނޫނުތަކާ އެތައް ގޮތަކުން ފުށުއަރާ ޝަރީއަތެއް ކަމަށެވެ. އަދި، ޖަލުގައި ހުންނަވާތާ އެއް އަހަރާ ގާތްވަމުންދާ ރައީސް ޔާމީންގެ އިސްތިއުނާފުގެ މައްސަލައާ މެދުހުރި ކަންބޮޑުވުންތައް ހިއްސާކުރިއެވެ.
ޝަރުއީ ދާއިރާއަށް ސަރުކާރުން ސީދާ ފޯރުވަމުންދާ ނުފޫޒުގެ ވާހަކައާއި ގާނޫނު އަސާސީން ވަކިވާންޖެހޭ ބާރުތަކުގެ ތެރެއާއިން ޝަރުއީ ދާއިރާއަށް ފޯރުވަމުންދާ ނުފޫޒުގެ އެންމެ ބޮޑު އަސްލަކީ ޖުޑިޝަލް ސާރވިސް ކޮމިޝަންކަމުގައި ފާހަގަކުރައްވާފައެވެ.
ރައްޔިތުންގެ އެންމެ ގިނަ ބައެއްގެ ތާއީދު އޮތް ސިޔާސީ ލީޑަރަކީ ރައީސް ޔާމީން ކަމަށް ނުޙައްގުން އެ މަނިކުފާނު ހައްޔަރުގައި ބަހައްޓައިގެން ސަރުކާރުން ހިންގަމުންދާ ޖަރީމާތަކުން ދޭހަވަނީ، މި ސަރުކާރަކީ ޑިމޮކްރަސީއަށް ކުޑަވެސް އިޙްތިރާމެއް ނެތް ސަރުކާރެއް ކަމަށް އިންޑިއާގެ ފޮރިން ސެކެޓްރީއަށް ދެއްނެވި ކަމަށް ޕީޕީއެމްއިން ބުނެއެވެ.
މި ބައްދަލުވުމުގައި ދެކެވުނު ވާހަކައިގެ ތެރޭގައި ކޯލިޝަންގެ ކަންބޮޑުވުން ހުރި ތަފާތު ކަންކަން ހުށައެޅިއެވެ. އަދި ޕީޕީއެމްގެ ސްޕެޝަލް އެޑްވައިޒަރ ޑރ. މުޙައްމަދު ވަޙީދު ހަސަން ވަނީ އިންޑިއާއިން ރާއްޖެއަށް ވެދެމުންދާ އެހީތެރިކަމަށް ޝުކުރު އަދާކުރައްވާފައެވެ.
ދިވެހި ރައްޔިތުން ތަމްޞީލުކުރާ އެންމެހާ ފަރާތްތަކާ މަޝްވަރާކުރުމަކީ އިންޑިޔާގެ ސިޔާސަތުކަމާއި، ދެއްވި ދަޢުވަތު ޤަބޫލުފުޅުކުރައްވާ ވާދަވެރި ސިޔާސީ ލީޑަރުން އެ މަނިކުފާނާ ބައްދަލުކޮށްލައްވަން ވަޑައިގެންކަމަށްޓަކައި، ފޮރިން ސެކްރެޓަރީ ޝުކުރު އަދާކުރެއްވިއެވެ.
