ފަތުރުވެރިކަން މާކެޓު ކުރުމަށް 154 މިލިއަން ރުފިޔާ ވާނީ 2021 ވަނަ އަހަރުގެ ބަޖެޓުގައި ކަނޑައަޅާފައިވާކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެ އެވެ.

2021 ވަނަ އަހަރުގެ ބަޖެޓުގެ ޕްރޮގުރާމްތަކުގެ ތަފްސީލު ހިއްސާކުރައްވަމުން މިނިސްޓަރ ވަނީ، ކޮވިޑާއި ގުޅިގެން ފަތުރުވެރިކަމުގެ ދޮރުތައް ބަންދުކުރުމަށްފަހު ޖުލައި މަހުގެ 15 ގައި ފަތުރުވެރިކަމަށް އަލުން ހުޅުވާލުމާއެކު އުންމީދީ ނިޝާންތަކެއް ފެންނަމުންދާކަން ފާހަގަކުރައްވާފަ އެވެ.

އެގޮތުން، އެއާރލައިންތަކުން ރާއްޖެއަށް އަލުން ދަތުރުތައް ފަށައި، އިތުރު އައު ރާއްޖެއަށް ދަތުރުތައް ފަށަމުން އަންނަކަން ފާހަގަކުރައްވައި މިނިސްޓަރ ވަނީ ދުނިޔޭގެ ހާލަތު ބަދަލުވަމުން އަންނަ ވަރަކަށް ފަތުރުވެރިން ޒިޔާރަތްކުރާ އަދަދު އިތުރުވަމުންދާކަން މިނިސްޓަރ ވަނީ ފާހަގަކުރައްވާފަ އެވެ.

އަދި ސަރުކާރުގެ އަމާޒަކީ ހޯދާ ކުރިއެރުން އިތުރަށް ހަލުވިކުރުމަށް މަސައްކަތްކޮށް، ދުނިޔޭގެ ފަތުރުވެރިކަމުގެ މާކެޓުގައި ވާދަވެރިކަން އިތުރުގެންދާ މިދަނޑިވަޅުގައި ރާއްޖޭގެ ފަތުރުވެރިކަން މާކެޓު ކޮށް ޕްރޮމޯޓުކުރުމަށް ހާއްސަ އިސްކަމެއް ދިނުންކަމަށް މިނިސްޓަރ ވިދާޅުވި އެވެ. އަދި، ފަތުރުވެރިކަން މާރކެޓު ކުރުމަށް 154 މިލިއަން ރުފިޔާ 2021ގެ ބަޖެޓުގައި ކަނޑައަޅަފައިވާކަމަށް މިނިސްޓަރ ވިދާޅުވި އެވެ.

އިތުރަށް ވާހަކަ ދައްކަވަމުން މިނިސްޓަރ ވަނީ، ފަތުރުވެރިކަން ކުރިއެރުވުމަށް އެންމެ މުހިންމު އެއް ދާއިރާއަކީ ވައިގެ ދަތުރުފަތުރުގެ ނިޒާމުކަން ފާހަގަކުރައްވައި ސިނާއަތު ކުރިއެރުވުމަށް ބަޖެޓުގައި ވެލާނާ އިންޓަނޭޝަނަލް އެއާޕޯޓު ތަރައްގީކުރުން ބާރު ސްޕީޑެއްގައި ކުރިއަށް ގެންދިއުމަށް 818 މިލިއަން ރުފިޔާ ބަޖެޓު ކޮށްފައިވާކަމަށް ވިދާޅުވެފަ އެވެ. އަދި، ސަރުކާރުގެ ސަރަހައްދީ ތަރައްގީގެ ތަސައްވުރުގެ ތެރެއިން ހަނިމާދޫ އިންޓަނޭޝަނަލް އެއާޕޯޓާއި އައްޑޫ އިންޓަނޭޝަނަލް އެއާޕޯޓު އަޕްގްރޭޑު ކުރުމުގެ މަޝްރޫއުތައް ފެށުމަށް ބަޖެޓުގައި ރާވާފައިވާކަމަށް މިނިސްޓަރ ވަނީ ވިދާޅުވެފަ އެވެ.

އަމާޒަކީ މި މަޝްރޫއުތަކާއި އެކު، އުތުރާ ދެކުނުގެ ފަތުރުވެރިކަމުގެ ސިނާއަތް އިތުރާށް ފުޅާވެ، އިގުދިސާދީ ހަރަކާތްތައް އިތުރުވެ، ވަޒީފާގެ ފުރުސަތުތައް އެސަރަހައްދު ތަކުގައި ތަނަވަސް ވެގެން ދިއުންކަމަށް މިނިސްޓަރ ވިދާޅުވި އެވެ.

މީގެ އިތުރުން ޑޮމެސްޓިކް ގިނަ އެއާޕޯޓުތައް ތަރައްގީ ކުރުމަށް ބަޖެޓުގައި ރާވާފައިވާއިރު ސަރުކާރުގެ އަމާޒަކީ، ދުނިޔޭގެ ދަތުރުފަތުރުގެ ނިޒާމް އަލުން ރިކަވަރ ވާއިރަށް މަޝްރޫއުތައް ނިންމައި އިގުތިސާދީ ފައިދާ ހޯދައި ރާއްޖޭގެ ފަތުރުވެރިކަމުގެ ސިނާއަތް އިތުރު ހަރުފަތްތަކަކަށް ގެންދިއުންކަމަށް މިނިސްޓަރ ވިދާޅުވި އެވެ.