މާލެ މަގުތަކަށް ކުނިއަޅާ މީހުން މިހާރު ނިސްބަތުން މަދުކަމަށް މާލެ ސިޓީ ކައުންސިލްގެ މޭޔަރ ޝިފާ މުހައްމަދު ވިދާޅުވެއްޖެ އެވެ.
ޝިފާ މިހެން ވިދާޅުވީ ހޮނިހިރު ދުވަހު މާލެތެރެ ސާފު ކުރުމުގެ ޕްރޮގްރާމެއް ފައްޓަވާދެއްވާ ރާއްޖެއެމްވީ އަށް މައުލޫމާތު ދެއްވަމުންނެ އެވެ.
އަދިވެސް އެންމެ އެދެވިގެންވާ ފެންވަރަށް މާލޭގެ މަގުތައް ސާފުތާހިރު ނުވާ ކަމަށާއި އެގޮތުން ހޮނިހިރު ދުވަހު ފެއްޓި މި ޕްރޮގްރާމް އަކީ ވޭސްޓް މެނޭޖްމެންޓް ކޯޕަރޭޝަން ލިމިޓެޑް (ވެމްކޯ) އާއި މާލެ ސިޓީ ކައުންސިލް ގުޅިގެން މާލެ އަކީ ސާފު ތާހިރު ތަނަކަށް ހެދުމަށްޓަކައި ފެށާފައިވާ ޕްރޮގްރާމެއްކަމަށް ޝިފާ ވިދާޅުވި އެވެ.
މީގެ އިތުރުން މާލެ ސާފުތާހިރު ތަނެއްގެ ގޮތުގައި ބޭއްވުމަށް އެންމެ ދަތިވާ ކަމެއް ގޮތުގައި މޭޔަރ ފާހަގަ ކުރެއްވީ ހަމައެއް ލަމައެއްނެތި މާލެ މަގުތަކުގައި ޕާކު ކޮށްފައިވާ ސައިކަލު ތަކުގެ ސަބަބުންނެވެ.
މާލެ މަގުތަކަކީ އެހާ ބޮޑެތި މަގުތަކަށް ނުވާއިރު ބައެެއް ފަހަރު މާލޭގެ މަގުތަށް މަތީގައި ގޭގެއިން ބޭރު ކުރާ ކޮންކްރީޓް މަސައްކަތް ތަކުގެ ސާމާނުތަށް ބަހައްޓާކަން ފާހަގަ ކުރެވޭ ކަމަށާއި މިފަދަ ތަންތަނަކީ ވެމްކޯގެ ވެހިކަލްތައް އެމަގުތަކަށް ވައްދައިގެން ސާފު ކުރެވޭނޭ ތަންތަން ކަމަށްވީ ނަމަވެސް އެފަދަ މަގުތަކުގައި ދެފަރާތުގައި ސައިކަލްތަށް ބަހައްޓާފައި ހުރުމުން ކުނިތައް ނެގުމަށް ދަތިތަކާއި ކުރިމަތިވާ ކަމަށް ވިދާޅުވި އެވެ.
ހާއްސަކޮށް މިހާރު މަގުތަކުގެ ކަންމަތީގައި ސައިކަލުތައް ޕާކު ކުރަމުން އެދަނީ އިންތިހާ ދަރަޖައަށް. އަސްލު ފުލުހުން ގާތުގައި އަޅުގަނޑުމެން އަބަދުވެސް އެދެމުން މިދަނީ ކަންކަން މަތީގައި ސައިކަލު ޕާކު ކުރުމަކީ ގަވައިދާ ހިލާފު ކަމެކޭ. އެހެންވީމާ ކަންކަން މަތީ ސައިކަލު ޕާކު ކުރެވިގެން ނުވާނެއޭ.މޭޔަރ ޝިފާ
އުންމީދު ކުރަނީ ކުރިޔަށް އޮތްތަނުގައި ކެފޭ އަދި ރެސްޓޯރެންޓް ތަކުގެ މީހުން އަމިއްލައަށް ޒިންމާ ނަގާނެ ކަމަށް ޝިފާ ވިދާޅުވިއެވެ.
ވެމްކޯގެ ހައުސް ހޯލްޑް މެނޭޖަރ މުހައްމަދު ޝާން ވިދާޅުވީ މި ޕްރޮގްރާމުގައި ވެމްކޯގެ 40 ވަރަކަށް މުއައްޒަފުންނާއި މާލެ ސިޓީ ކައުންސިލްގެ ހުރިހާ މުއައްޒަފުން ބައިވެރިވާނެކަމަށެވެ.
މީގެ އިތުރުން ޝާން ވިދާޅުވީ މަގުތަކަށް ކުނި އަޅާއިރު އަނެއްމީހާއަށް އޭގެ ސަބަބުން ގެއްލުމެއް ވެދާނެ ކަމަށް އެއްވެސް މީހަކު ނުވިސްނާ ކަމަށެވެ.
އަދިވެސް ވެމްކޯއަށް ރަޖިސްޓްރީ ނުކުރާ މީހުން ވަރަށް ގިނަ ކަން ފާހަގަކުރަމުން ޝާން ވިދާޅުވީ މާލޭގައި 15000 ވަރަކަށް މީހުން ރަޖިސްޓްރީ ކޮށްފައިވާއިރު މާލޭގައި 35000 ވަރަކަށް ގެ ހުންނަކަމަށާއި އެގޮތުން ބަލާނަމަ ރަޖިސްޓްރީ ނުކޮށް ހުރި މީހުން އަދިވެސް ގިނަ ކަމަށެވެ.
އަދި ކެފޭ ރެސްޓޯރަންޓް ފަދަ ތަންތަނުން ވެސް ރަޖިސްޓްރީ ނުކުރާ ތަންތަން ގިނަ ކަމަށް ޝާން ފާހަގަ ކުރިއެވެ.
ރަޖިސްޓްރީނުކޮށް ތިބި ކަސްޓަމަރުން ވީހާވެސް އަވަހަކަށް ވެމްކޯއަށް ގުޅައިގެން ނުވަތަ ވެމްކޯގެ ވެބްސައިޓް މެދުވެރިކޮށް ރަޖިސްޓްރީ ކުރުމަށް ޝާން ވަނީ އިލްތިމާސް ކޮށްފައިވެއެވެ.
