ކްރެޑިޓް ރޭޓިން ކުންފުނި ފިޗުން ރާއްޖެ އަށް ދިން ކްރެޑިޓް ރޭޓް ގަބޫލު ނުކުރާ ކަމަށް ފިނޭންސް މިނިސްޓްރީން ބުނެފި އެވެ.

ފިނޭންސް މިނިސްޓްރީން އެކަން ހާމަކޮށް ނެރެފައިވާ ބަޔާނެއްގައި ބުނެފައިވަނީ އިގްތިޞާދު ޚަރުދަނާ ކުރުމަށް ސަރުކާރުން މިފަހުން އަޅަން ފެށި ފިޔަވަޅުތަކާއި ޕޮލިސީތަކުގެ ސަބަބުން ރާއްޖޭގެ އިގްތިޞާދު ހަލުވިމިނެއްގައި ކުރިއަރަމުން އަންނަ ކަމަށެވެ. އަދި ރާއްޖެއިން ދައްކަން ޖެހޭ ދަރަނި ބަރާބަރަށް ދައްކަމުން އަންނަ ކަމަށާއި އެގޮތުގައި ކުރިއަށް އޮތްތަނުގައި ވެސް އަމަލު ކުރަމުންދާނެ ކަމަށް އެ ބަޔާނުގައި ބުނެފައިވެއެވެ.

ކޮވިޑް-19ގެ ސަބަބުން ރާއްޖޭގައި ބޭރު ފައިސާ މަދުވެ ދަރަނި އިތުރުވުމާ ގުޅިގެން، ފިޗުން ވަނީ ރާއްޖޭގެ ރޭޓިން "ބީ" އިން "ސީސީސީ" އަށް ދަށްކޮށްފަ އެވެ.

ސީސީސީ ރޭޓިން އަކީ ދަރަނި ނުދެއްކޭ ދަރަޖަ އަށް މާލީ ހާލަތު ގޯސްވުމެވެ. ނަމަވެސް މާލީ އެކި އިދާރާތަކުން ރާއްޖޭން ނަގާފައިވާ ލޯނުތައް މި ހާލަތުގައި ވެސް ބަރާބަރަށް ދައްކަމުން އަންނަ ކަމަށް ސަރުކާރުން ވަނީ ބުނެފަ އެވެ.

މިބަޔާނުގައި ފިނޭންސް މިނިސްޓްރީން ބުނެފައިވަނީ ކޮވިޑް-19 ގެ ހާލަތު ކޮންޓްރޯލްކުރުމުގައި ރާއްޖެއިން އަންނަނީ ކާމިޔާބު ހޯދަމުންނެވެ. އަދި ރާއްޖޭގެ ބޯޑަރު ހުޅުވައި މަހުން މަހަށް އަންނަ ޓޫރިސްޓުންގެ އަދަދު އިތުރުވަމުން އަންނައިރު ޓޫރިސްޓުންނަށް ލުއި ހޯދައިދިނުމަށާއި ރާއްޖެ އަށް އަންނަ އެއާލައިންތައް ވެސް ގިނަ ކުރުމަށް މަސައްކަތް ކުރަމުން އަންނަ ކަމަށް ފިނޭންސް މިނިސްޓްރީން ބުނެއެވެ.

ފިނޭންސް މިނިސްޓްރީން އިތުރަށް ބުނެފައިވަނީ ފައިނޭންސް ގެޕް ކުޑަކުރުމަށް ބޭރުގެ މާލީ އިދާރާތަކާ ގުޅިގެން ސަރުކާރުން މަސައްކަތް ކުރަމުން އަންނަ ކަމަށެވެ. އެގޮތުން އިންޑިއާ ސަރުކާރާއި ޖަޕާނު ސަރުކާރާއި އޭޑީބީ އާއި ވޯލްޑް ބޭންކާއި އައިޑީބީ އާއި ޔޫރަޕިއަން އިންވެސްޓްމެންޓް ބޭންކާއި އޭއައިޑީބީ އަދި އޯޕެކް ފަދަ އިދާރާތަކާ ގުޅިގެން މަސައްކަތް ކުރަމުންދާ ކަމަށް އެ މިނިސްޓްރީން ބުނެއެވެ.

ސަރުކާރުން މިމަހުގެ 10 ވަނަ ދުވަހުގެ ހެނދުނު 7:00 ގައި އިންވެސްޓާ ކޯލެއް ބާއްވާނެ ކަމަށް ވެސް ފިނޭންސުން ވަނީ ބުނެފަ އެވެ.