ސަރުކާރު ވައްޓާލަން ފުލުހުން ނުނިކުންނާނެ ކަމުގެ ޔަގީންކަން އޮތްކަމަށް ވާނަމަ، ރައީސް ނަޝީދުގެ ވެރިކަން ބަޣާވާތަކުން ވައްޓާލި މައްސަލައިގައި ފުލުހުންގެ މުއައްސަސާއިން ރަސްމީކޮށް މާފަށް އެދެންޖެހޭ ކަމަށް މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވިދާޅުވެއްޖެއެވެ.
އިމްތިޔާޒް މިހެން ވިދާޅުވީ، ގާނޫނީ ސަރުކާރެއް ހިނގަމުން ދަނިކޮށް ސަރުކާރު ވައްޓާލަން ފުލުހުންގެ ތެރެއިން ބަޔަކު ދެން ނުނިކުންނާނެ ކަމަށް ބުރާސްފަތި ދުވަހު ރާއްޖެޓީވީގެ "ފަށާއިރު" ޕްރޮގްރާމްގައި ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވުމުން އެކަމާއި ގުޅިގެން ކުރެއްވި ޓްވީޓެއްގައެވެ.
އިންތި ކުރެއްވި ޓްވީޓުގައި ވިދާޅުވީ، ސަރުކާރު ވައްޓާލަން ނުނިކުންނާނެ ކަމުގެ ޔަގީންކަން އޮތް ކަމަށް ވާނަމަ ކިތަންމެހާވެސް ހެޔޮ ކަމަށާއި، ނަމަވެސް އެ ޔަގީންކަން ރައްޔިތުންނަށް އެރުވުމަށް ބޭނުންވާ އެންމެ ކުޑަ މިންވަރަކީ "ޓުރޫތު އެންޑް ރީކޮންސިލިއޭޝަން" ގެ އުސޫލުން އެ މުއައްސަސާއިން ރައްޔިތުންގެ ކިބައިން ރަސްމީކޮށް މާފަށް އެދުން ކަމަށް ދެކިވަޑައިގަންނަވާ ކަމަށެވެ.
ސީޕީ ހަމީދު ވިދާޅުވެފައި ވަނީ ހަތެއް ފެބްރުއަރީގައި ހިނގާދިޔަ ކަންތައްތަކަކީ މާޒީ ކަމަށާއި، އޭގެ ސަބަބުން ފުލުހުންނަށް ވަރަށް ގިނަ އިބުރަތްތަކެއް ލިބިގެން ގޮސްފައިވާ ކަމަށެވެ. އަދި ފުލުހުންގެ މުއައްސަސާގައި މިހާރު ތިއްބެވި ފަރާތްތަކާއި، ކުރިއަށް އޮތް ތަނުގައި ފުލުހުންގެ މުއައްސަސާއަށް ގުޅެން ތިއްބެވި ފަރާތްތަކުން ވެސް އެފަދަ ކަމެއް ނުކުރައްވާނެ ކަމުގެ ޔަޤީންކަން ދެއްވާ ކަމަށް ސީޕީ ވަނީ ވިދާޅުވެފައެވެ.
ސީޕީ އިތުރަށް ވިދާޅުވީ، މިހާރު މުއައްސަސާ ހަރުދަނާ ކުރުމަށް އަޅަމުންދާ ފިޔަވަޅުތަކުގެ ތެރެއިންވެސް އެކަންކަން ކަށަވަރު ކުރެވިގެންދާނެ ކަމަށެވެ.
2012 ވަނަ އަހަރުގެ ފެބްރުއަރީ 7 ގައި ފުލުހުންނާއި ސިފައިން ސަރުކާރާ ދެކޮޅުވެ، ވެރިކަން ވައްޓާލުމަށް ނުކުތުމާ ގުޅިގެން އޭރު ފުލުހުންނަށް ގިނަ ފާޑުކިއުންތަކެއް އަމާޒުވެގެން ދިޔައެވެ. އެގޮތުން ހަތެއް ފެބްރުއަރީގައި ގިނަ އަދަދެއްގެ ސިފައިންނާއި ފުލުހުން ރައީސް ނަޝީދާ ދެކޮޅަށް ނިކުތެވެ.
ޑރ. މުހައްމަދު ވަހީދުގެ ވެރިކަމުގައި ވެރިކަން ވައްޓާލި މައްސަލަ ބެލުމަށް ރިޔާސީ ކޮމިޝަނެއް އުފެއްދިއެވެ. ބޭރުގެ ފަރާތްތަކުން އިސްކޮށް ތިބި ކޮމިޝަނުން އެ މައްސަލަ ތަހުޤީޤު ކުރުމަށްފަހު އޭރު ނިންމީ، ވެރިކަން ނިމުމަކަށް އައީ ބަޣާވާތަކުން ނޫން ކަމަށާއި، އެއްވެސް މަޖުބޫރުކަމެއް އޮވެގެން ނޫން ކަމަށެވެ.
އެހެން ނަމަވެސް، މިހާރު މަޖިލީހުގައި ކުރިއަށްދާ އިންތިގާލީ އިންސާފުގެ ބިލް ޤާނޫނަކަށްވުމުން، 7 ފެބްރުއަރީގައި 2012 ގައި ސަރުކާރު ވެއްޓުނު ގޮތް ތަހުގީގު ކުރެވޭނެ ކަމަށް ދެކިވަޑައިގަންނަވާ ކަމަށް ރައްޔިތުންގެ މަޖިލިސް ރައީސް ވެސް ވަނީ ވިދާޅުވެފައެވެ.
