އިނގިރޭސި ވިލާތުގެ ޔުނިވަރސިޓީ އޮފް ދި ވެސްޓް އިންގްލެންޑުގެ ކޮމާޝަލް ލޯ ގެ މާސްޓަރސް ޑިގްރީ ކޯހެއް ވިލާ ކޮލެޖުން ތައާރަފްކޮށްފިއެވެ.
ބުދަ ދުވަހު ވިލާ ކޮލެޖުގައި ބޭއްވި ހަފްލާއެއްގައި މި ކޯސް އިފްތިތާހުކޮށްދެއްވީ އުއްތަމަ ފަނޑިޔާރު މުއުތަސިމް އަދުނާނެވެ.
އަންނަ އަހަރުގެ ޖެނުއަރީ މަހު ފެށުމަށް ހަމަޖެހިފައިވާ މި ކޯސް ތައާރަފްކުރަން ނިންމީ، ގާނޫނީ ދާއިރާގައި މަސައްކަތްކުރާ މީހުންނާއި އެ ދާއިރާގައި ކިޔަވާ ދަރިއަވަރުންނަށް އަމާޒުކޮށްގެން ވިލާ ކޮލެޖުން މިދިޔަ އަހަރު ކުރިއަށް ގެންދިއަ ސަރވޭއެއްގެ ނަތީޖާ އަށް ބަލާފައި ކަމަށް އެ ކޮލެޖުން ބުންޏެވެ. އަދި ބޭރުގެ ގައުމެއްގެ ޔުނިވަރސިޓީއަކުން ކިޔަވައިދޭ ވިޔަފާރިއާއި ގުޅުން ހުރި ކޯހެއް ގިނަ މީހުން އިހްތިޔާރު ކުރި ކަމަށް ވިލާ ކޮލެޖުން ބުނެއެވެ.
ވިލާ ކޮލެޖުން ބުނީ ގާނޫނީ ދާއިރާ އިން ނުވަތަ މި ކޯހާ ގުޅޭ އެހެން ދާއިރާއަކުން ވެސް ޑިގްރީއެއް ހާސިލްކޮށްފައިވާ ކޮންމެ މީހަކަށް ވެސް މި ކޯހުގައި ބައިވެރިވެވޭނެ ކަމަށެވެ.
މި ކޯސް ފަރުމާކޮށްފައި ވަނީ ދިރާސާ ކުރުމަށް ހާއްސަ އިސްކަމެއް ދީގެންނެވެ. ތިން ސެމިސްޓާއަކަށް ބަހާލައިގެން ކޯހުގެ ކިޔެވުން ކުރިއަށް ގެންދާ އިރު، ފަހު ސެމިސްޓަރ ހާއްސަ ކޮށްފައި ވާނީ ދަރިވަރުންގެ ޑިޒަޓޭޝަން ފުރިހަމަކުރަން ކަމަށް ވިލާ ކޮލެޖުން ބުންޏެވެ. އަދި އެއް އަހަރު ދުވަހުން މި ކޯސް ފުރިހަމަކުރެވޭނެ ކަމަށް ވެސް އެ ކޮލެޖުން ބުނެއެވެ.
މި ކޯހަށް ކުރިމަތިލުމުގެ ފުރުސަތު މިހާރު ވަނީ ހުޅުވާލައިފަ އެވެ. ކޯހަށް ހުށަހެޅުމުގެ އެންމެ ފަހު ތާރީހަކީ އަންނަ މަހުގެ 19 ވަނަ ދުވަހެވެ.
އެކި ދާއިރާތަކުން ސެޓްފިކެޓް ލެވެލް ކޯސްތަކުން ފެށިގެން މާސްޓާސް ޑިގްރީ ކޯސްތަކާ ހަމައަށް 109 ކޯހެއް ވިލާ ކޮލެޖުން މިހާރު އަންނަނީ ކިޔަވައި ދެމުންނެވެ.
