ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހްގެ ސަރުކާރުން ރާއްޖޭގެ މިނިވަންކަމާއި ސިޔާދަތައް ގެއްލުންވާނެ ކަމެއް ނުކުރާނެ ކަމަށް ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.
ރާއްޖެޓީވީގެ ''ފަލަ ސުރުޚީ'' ޕްރޮގްރާމްގައި ވާހަކަ ދައްކަވަމުން މިނިސްޓަރ މާރިޔާ ވިދާޅުވީ މި ސަރުކާރުން ރާއްޖޭގެ މިނިވަންކަމާއި ސިޔާދަތައް ބުރޫއަރާނެ އެއްވެސް ކަމެއް ނުކުރައްވާނެ ކަމުގެ ޔަގީންކަން ދެއްވާ ކަމަށާއި، އިދިކޮޅު ފަރާތްތަކުން ރާއްޖޭގެ މިނިވަންކަން ގެއްލެނީއޭ ކިޔައިގެން ދައްކަމުން އަންނަ ވާހަކަތަކަކީ އެ ފަރާތްތަކުގެ ވެރިކަމުގައި ކޮށްފައިވާ ވައްކަމާއި ހިޔާނާތުގެ ވާހަކައިގައި މަތި ޖެއްސެވުމަށް ކުރަމުން އަންނަ ކަމެއް ކަމަށެވެ.
މާރިޔާ އިތުރަށް ވިދާޅުވީ ކޮވިޑް-19 ގެ ހާލަތުގައި ރައްޔިތުންނަށް ބަނޑުހައި ހޫނުކަމާއި ކުރިމަތިލާން ނުޖެހުނީ ރައީސް ސޯލިހުގެ ސަރުކާރުގެ ސިޔާސަތުގެ ސަބަބުން ކަމަށެވެ. އަދި ރައްޔިތުންގެ މެދުގައި މި ސަރުކާރަށް އޮތް މަގުބޫލުކަން ދުވަހުން ދުވަހަށް އަންނަނީ އިތުރުވަމުން ކަމަށާއި، އިދިކޮޅު ފަރާތްތަކުން އުޅެނީ އެކަން ހަޖަމުނުވެގެން ކަމަށް މާރިޔާ ވިދާޅުވިއެވެ. އަދި ރައްޔިތުންގެ މަގުބޫލުކަން ސަރުކާރަށް އިތުރުވަމުން އަންނާތީ އެކަން ގެއްލުވާލުމުގެ ބޭނުމުގައި އިދިކޮޅުން ފިތުނަފަސާދަ އުފައްދަން މަސައްކަތް ކުރަމުން އަންނަ މަންޒަރު ފެންނަކަމަށް މާރިޔާ ވިދާޅުވިއެވެ.
އިދިކޮޅު ފަރާތްތަކުން އިންޑިއާ ސިފައިންގެ ވާހަކަ ދައްކަމުން އަންނައިރު، އިންޑިއާ ސަރުކާރުގެ އެހީގައި ލިބުނު ހެލިކޮޕްޓަރުގެ ބޭނުން ކޮށްގެން އެތައް ބައިވަރު ދިވެހިންގެ ފުރާނަ ސަލާމަތްވެފައި ހުރި ކަމަށް ވިދާޅުވެ މާރިޔާ ވިދާޅުވީ، މި ހިދުމަތްތަކަކީ ދިވެހިން ބަލައިގަންނަ ހިދުމަތްތަކެއް ކަމަށެވެ. އަދި މި ހިދުމަތް ރައްޔިތުންނަށް ލިބޭތީ އެވާހަކަ ދައްކާ އިންޑިއާ އައުޓް އޭ އިދިކޮޅުން ގޮވާލަމުން އަންނާތީ އެކަމާއި ހިތާމަ ކުރާކަމަށް މިނިސްޓަރ ވިދާޅުވިއެވެ.
މި ޕްރޮގްރާމްގައި ވާހަކަ ދައްކަވަމުން މިނިސްޓަރ މާރިޔާ ވަނީ އިދިކޮޅަށް ވަރަށް ބޮޑަށް ފާޑުވިދާޅުވެފައެވެ.
