ޓެރަރިޒަމް އާއި ގުޅޭ މައުލޫމާތު އެއްކުރުމުގެ ގާބިލުކަން ދިވެހި އަސްކަރިއްޔާގައި ހުންނާނެ ކަމަށް ވައިސް ޗީފް އޮފް ޑިފެންސް ފޯރސް ބްރިގޭޑިއަރ ޖެނެރަލް އަބްދުއްރައީމް އަބްދުއްލަތީފް ވިދާޅުވެއްޖެއެވެ.
ނަސްރުގެ ދުވަހުގެ މުނާސަބަތުގައި ރާއްޖެޓީވީއިން ގެނެސްދިން ހާއްސަ ޕްރޮގްރާމެއްގައި ވާހަކަ ދައްކަވަމުން ބްރިގޭޑިއަރ ޖެނެރަލް އަބްދުއްރައީމް އަބްދުއްލަތީފް ވިދާޅުވީ މި ޒަމާނުގައި ޓެރަރިޒަމްގެ ނުރައްކަލަކީ ހުރިހާ ގައުމަކާއި ވެސް ކުރިމަތިވެފައިވާ ވަރަށް ބޮޑު ނުރައްކަލެއް ކަމަށެވެ.
އެހެންނަމަވެސް، އެންމެ މުހިއްމު ކަމަކީ އެކަމަށް ތައްޔާރުވެ ތިބުންކަން ފާހަގަކުރައްވާ އޭނާ ވިދާޅުވީ ރާއްޖެއިން ވެސް ގިނަ ތައްޔާރީތައް ވަމުންދާ ކަމަށެވެ. އެގޮތުން އަސްކަރިއްޔާ ތަމްރީނުކޮށް، ވަސީލަތްތައް ވަރުގަދަ ކުރުމުގެ މަސައްކަތް ކުރަމުންދާ ކަމަށް ވިދާޅުވިއެވެ.
ބްރިގޭޑިއަރ ޖެނެރަލް އަބްދުއްރައީމް އަބްދުއްލަތީފް ވަނީ ޓެރަރިޒަމް އާއި ގުޅޭ މައުލޫމާތު އެއްކުރުމުގެ މުހިއްމު ކަމުގެ މައްޗަށް ވެސް ވާހަކަދައްކަވާފައެވެ. އެގޮތުން އޭނާ ވިދާޅުވީ އެކަމާއި ގުޅޭ މައުލޫމާތު އެއްކުރުމަށް އެހެން ގައުމުތަކުގެ އެހީތެރިކަން ރާއްޖެއަށް ވަރަށް ބޮޑަށް ލިބޭ ކަމަށެވެ. އެހެންކަމުން މިކަމުގައި ހުރިހާ ގައުމެއް ގުޅިގެން މަސައްކަތް ކުރަން ޖެހޭ ކަމަށް އޭނާ ވިދާޅުވިއެވެ.
ހަމަ އެހެންމެ، ވަރަށް މުހިއްމުކޮށް އަޅުގަނޑުމެން ކުރާ އެއް މަސައްކަތެއް އެއީ ތިކަމާއި ގުޅޭ މައުލޫމާތު އެއް ކުރުމަކީ. އެކަމާ ބެހޭ މައުލޫމާތު އެއްކުރުމުގައި އަޅުގަނޑުމެންނަށް އެކުވެރި ގައުމުތަކުގެ އެހީތެރިކަން ވަރަށް ބޮޑު. އެއީ އެއްވެސް ބަޔަކަށް އެބަޔަކު އަމިއްލައަށެއް އެކަމާ ބެހޭ މައުލޫމާތު އެއް ކުރުމަކީވެސް ކުރެވޭނެ ކަމެއް ނޫން. އެހެން ކަމަށް ވާއިރުގައި އެބަޖެހޭ ހުރިހާ ގައުމުތަކާ ގުޅިގެން މަސައްކަތް ކުރަން. އެހެންވީމަ އަޅުގަނޑުމެންވެސް މިހާރު އެ މަސައްކަތް ކުރާއިރުގައި އަޅުގަނޑުމެންނަށް ކުރެވެން ހުރި ހުރިހާ މަސައްކަތްތަކެއް ކުރަނީ އެހެންގައުމުތަކާ ވެސް ގުޅިގެން.ވައިސް ޗީފް އޮފް ޑިފެންސް ފޯރސް ބްރިގޭޑިއަރ ޖެނެރަލް އަބްދުއްރައީމް އަބްދުއްލަތީފް
އޭނާ އިތުރަށް ވިދާޅުވީ އެ މައުލޫމާތު އެއްކުރުމުގެ ގާބިލުކަން ދިވެހި އަސްކަރިއްޔާގައި އެބަހުރި ކަމަށެވެ. ރާއްޖެއިން މިހާރު ވެސް އަންނަނީ ބޭރުގެ ގައުމުތަކާ ގުޅިގެން ޓެރަރިޒަމްއާ ގުޅޭ މައުލޫމާތު ބަދަލުކުރުމުގެ ވިއުގައެއްގައި ބައިވެރިވަމުންނެވެ.
