މާލޭގައި ޓެކްސީ ކުރަމުންދާ ހަމައެކަނި އަންހެން ޑްރައިވަރު ކަމަށްވާ އައިމިނަތު ވަހީދާގެ ޓެކްސީއަށް އެކި ފަހަރު މަތިން ގެއްލުންދީފައިވާތީ އެކަމާއި ގުޅޭ ގޮތުން މަޖިލީހަށް ހުށައެޅި ކުއްލި މައްސަލައާއި އެކު މެދު ހެންވޭރު ދާއިރާގެ މެމްބަރު އަލީ އާޒިމްގެ ފާޑުކިއުން ފުލުހުންގެ މުއައްސަސާއަށް އަމާޒުވެއްޖެއެވެ.
މި މައްސަލަ މަޖިލީހުގެ ސަމާލުކަމަށް ގެނެސް، މަޖިލީހުގައި ވާހަކަދައްވަމުން އެމްޑީޕީގެ ޕީޖީ ލީޑަރު އާޒިމް ވިދާޅުވީ އައިންތުގެ ކާރަށް ގެއްލުންދިން މައްސަލަ ފަސް ފަހަރެއްގެ މަތިން ފުލުހުންނަށް ހުށައެޅިއިރު އެ މައްސަލަ ބަލާފައި ނުވުމަކީ އެ އިދާރާގެ މައްސަލައެއް ކަމަށެވެ. މިއީ ހުރިހާ ފުލުހުންގެ މައްސަލައަކަށް ނުވި ނަމަވެސް، އެ އިދާރާގެ މައްސަލަތަކެއް ވާކަން އެ އިދާރާ ހިންގަން ތިއްބެވި ވެރިން ގަބޫލުކުރަން ޖެހޭ ކަމަށް އާޒިމް ވިދާޅުވިއެވެ. އަދި މި ފަދަ މައްސަލަތައް ހައްލުކޮށް، ރައްޔިތުންގެ އިތުބާރު ހޯދަން ޖެހޭ ކަމަށް ވެސް ވިދާޅުވިއެވެ.
ފުލުހުންގެ އިދާރާއަށް ފަސް ފަހަރެއްގެ މަތިން މި މައްސަލަ ހުށައަޅާ ނުބެލި ވާކަމަށް ވާނަމަ މިއީ އެ އިދާރާގެ ވަރަށް ބޮޑު މައްސަލައެއް. އަޅުގަނޑު ނުދަންނަވަން މިއީ ފަހަރެއްގައިވެސް ހުރިހާ ފުލުހުންގެ މައްސަލައެކޭ. އިދާރާ ހިންގުމަށް ތިބި ވެރިން އެބަ ގަބޫލުކުރަން ޖެހޭ މި އިދާރާގެ، ފުލުހުންގެ މުއައްސަސާގެ މައްސަލައެއް ވާކަން. މައްސަލައަކީ ތިމަންނަމެން ހައްލުކޮށް ރައްޔިތުން ބޭނުންވާގޮތަށް ކަންކަން ކުރެވޭނެ މުއައްސަސާއެއްކަން ރައްޔިތުންނަށް އިތުބާރާއި އެކު އެބަ ދައްކަދޭން ޖެހޭ.މެދު ހެންވޭރު ދާއިރާގެ މެމްބަރު އަލީ އާޒިމް
މިހާތަނަށް ހިނހގާފައިވާ ހާދިސާތައް ފާހަގަކުރައްވާ އާޒިމް ވިދާޅުވީ އެމައްސަލަތަކުގެ ތަހުގީގުތައް ހިނގާފައިވާ ގޮތަށް ބަލާލާއިރުވެސް އެ އިދާރާގައި މައްސަލަތަކެއް ވާކަން އެނގޭ ކަމަށެވެ. ފުލުހުންގެ މުއައްސަސާއަށް ބޮޑު ބަޖެޓެއް ދިނުމުންވެސް މައްސަލަތައް ބަލަންޖެހޭ މިންވަރަށް ނުބެލޭ ކަމަށެވެ.
އެހެން މި ދަންނަވަނީ ވޭތުވެދިޔަ އަހަރުގައި ހިނގި ބޮޑު އަލިފާނުގެ ހާދިސާއިން ފެށިގެން ދާދި މިދާކަށް ދުވަހު އެ ހިނގާދިޔަ 135 ކިލޯގެ ޑްރަގުގެ މައްސަލަ އާއި ހިސާބަށް ބަލާލާއިރުގައި އަޅުގަނޑު ގަބޫލުކުރާ ގޮތުގައި ފުލުހުންގެ މުއައްސަސާގައި މައްސަލައެއް އެބައުޅޭ. މުޅި މާލޭގައި ކެމެރާ މިއޮތީ. މުޅި މާލޭގައި ކަންކަން ބެލެމުން މިދަނީ. ފުލުހުންގެ މުއައްސަސާއިން މި މަޖިލީހަށް ނުދޭ ބަޖެޓެއް އޮތީކީނޫން. ކަނޑާލަނީކީ އެއް ނޫން. އެކަމުވެސް އެކަން ބަލަންވާ މިންވަރަށް އެކަން ނުބެލި، އެހެކި ހުށައަޅަން ޖެހޭ ވަރަށް ހެކި ހުށަނޭޅި އެކަން ކުރަންވާ ވަގުތު އެކަން ނުކުރެވި، އޮތްއޮތުމަކީ ހަމަ ޔަގީނުންވެސް އެ މުއައްސަސާ ޒިންމާވާން ޖެހޭ ކަމެއްގެ ގޮތުގައި އަޅުގަނޑު ދެކެނީ.މެދު ހެންވޭރު ދާއިރާގެ މެމްބަރު އަލީ އާޒިމް
އާޒިމް ވިދާޅުވީ ފުލުހުންގެ މުއައްސަސާގައި ހުރި މައްސަލަތައް ހައްލުކޮށް، އެ އިދާރާގެ މަސައްކަތްތައް ރަނގަޅުކުރުމަކީ އެ އިދާރާ ހިންގަން ތިބޭ ފަރާތްތަކުގެ މަސައްކަތެއް ކަމަށެވެ.
މާލޭގައި އާންމުންނަށް ޓެކްސީގެ ޚިދުމަތް ފޯރުކޮށްދޭ އާމިނަތު ވަހީދާ އަށް އެކި ގޮތްގޮތުން އެކި ފަހަރުމަތިން އޭނާ ދުއްވަމުންދާ ޓެކްސީތަކަށް ގެއްލުންދީ، އެކިކަހަލަ ގޯނާތައް ކުރާ ވާހަކައަކީ ފުލުހުންނާއި ކަމާބެހޭ މުއައްސަސާތަކުގެ ސަމާލުކަމަށްވެސް އެތައް ފަހަރެއްގެ މަތިން ހުށައަޅާފައިވާ މައްސަލަތަކެކެވެ. އެހެންނަމަވެސް މިއަދާ ހަމައަށްވެސް މި މައްސަލައާއި ގުޅިގެން އޭނާއަށް އިންސާފު ލިބިފައެއް ނުވެއެވެ.
