ކޮވިޑް-19 އާ ގުޅިގެން ހަމައެކަނި ރަސްމީ ގަޑީގައި ކައިވެނި ކޮށްދޭގޮތަށް ނިންމާފައިވާ ނިންމުމަށް ބަދަލު ގެނެސްފިއެވެ.
ފެމިލީ ކޯޓުން އާދިއްތަ ދުވަހު ނެރުނު ބަޔާނެއްގައި ބުނީ ރަސްމީ ގަޑިތަކެކޭ އެއްގޮތަށް ނުރަސްމީ ގަޑިތަކުގައި ވެސް ފެމިލީ ކޯޓުން ކައިވެނިކޮށްދޭ ގޮތަށް މިހާރު ނިންމައިފިވާ ކަމަށެވެ.
އެގޮތުން މި ބަދަލަށް އަމަލު ކުރަން ފަށަން ހަމަޖެހިފައި ވަނީ ނޮވެމްބަރު 01 އިން ފެށިގެންނެވެ. އަދި ކުރިން ވެސް ފެމިލީ ކޯޓުން އަމަލު ކުރަމުން އައި ގޮތަށް އަމަލު ކުރަން ވަނީ ހަމަޖައްސާފައެވެ.
މި ބަދަލު ގެނައުމަށް ހަމަޖެހިފައި ވަނީ އޮކްޓޯބަރ 20 ވަނަ ދުވަހު ބޭއްވި ފެމިލީ ކޯޓު ޤާޒީންގެ އާއްމު މަޖިލީހުން ފާސްވުމާއި ގުޅިގެން ކަމަށް ފެމިލީ ކޯޓުން ވަނީ ބުނެފައެވެ. މި ބަދަލު ގެނައި ނަމަވެސް ކައިވެނީގެ މަޖިލިސްތައް ކުރިއަށް ގެންދާނީ އޮންލައިންކޮށެވެ. އަދި މިއީ ކޮވިޑް-19 ގެ ހާލަތާ ގުޅިގެން ސަރުކާރުން އަޅާފައިވާ ފިޔަވަޅުތަކަށް ލުއިތައް ދެމުން ގެންދިއުމާ އެކު ޚިދުމަތް ހޯއްދަވާ ފަރާތްތަކަށް ލުއިފަސޭހަ އިންތިޒާމުތަކެއް ހަމަޖައްސަވައި ދެއްވުމުގެ ބޭނުމުގައި ކަމަށް ފެމިލީ ކޯޓުން ވަނީ ބުނެފައެވެ.
އެގޮތުން ނުރަސްމީ ގަޑީގައި ކާވެނި ކޮށްދޭނީ ރޭގަނޑު 9 އާ ހަމައަށް ކަމަށާއި އަދި ނުރަސްމީ ގަޑީގައި ކުރާ ކައިވެނީގައި ނަގާނީ މީގެ ކުރިން ވެސް ނުރަސްމީ ގަޑީގައި ކޯޓުގައި ކުރާ ކާވެނީގައި ނަގަމުން އަންނަ ފީ ކަމަށް ވަނީ ބުނެފައެވެ.
