ފްރާންސްގައި ކޮވިޑް-19 ޖެހޭ މީހުންގެ އަދަދު އިތުރުވަމުން ދިޔުމާއެކު މި ހަފުތާގައި ދެވަނަ ފަހަރަށް އެގައުމު ލޮކްޑައުން ކުރާނެ ކަމަށް ފްރާންސްގެ ރައީސް އެމަނުއަލް މެކްރޮން ވިދާޅުވެއްޖެއެވެ.

ބުދަ ދުވަހު އެގައުމުގެ ރައްޔިތުންނާއި މުޚާތަބުކުރަައްވައި ވާހަކަދައްކަވަމުން މެކްރޮން ވިދާޅުވީ ހުކުރު ދުވަހުން ފެށިގެން ފްރާންސް ލޮކްޑައުން ކުރާއިރު، މި ލޮކްޑައުން ޑިސެމްބަރު މަހުގެ އެއްވަނަ ދުވަހާ ހަމައަށް ދެމިއޮންނާނެ ކަމަށެވެ. އަދި މި މުއްދަތުގެ ތެރޭގައި އެގައުމުގެ ރައްޔިތުން ތިބެންޖެހޭނީ ގޭގައި ކަމަށާއި، ބޭރަށް ނިކުމެ އުޅެވޭނީ ހަމައެކަނި ކޮންމެހެން ގަންނަންޖެހޭ ތަކެތި ގަތުމަށާއި، ސިއްހީ ފަރުވާ ހޯދުމަށް ކަމަށެވެ. އަދި ކޮންމެ މީހަކަށްވެސް ދުވާލަކު އެއް ގަޑިއިރު ކަސްރަތުކުރުމަށް ބޭރަށް ނިކުމެވޭނެކަމަށް މެކްރޮން ވިދާޅުވިއެވެ.

ގެއިން ބޭރަށް ނިކުންނަ ކޮންމެ މީހެއްގެ އަތުގައި އެކަމާއި ގުޅޭ ލިޔުމެއް އޮންނަންޖެހޭނެ ކަމަށާއި، އެލިޔުން ފުލުހުން ޗެކްކުރާނެ ކަމަށްވެސް މެކްރޮން ވިދާޅުވިއެވެ.

ފިހާރަތަކާއި ރެސްޓޯރެންޓުތަކުގެ ތެރެއިން ޒަރޫރީ ބޭނުންތަކަށް ބޭނުންވާ ތަކެތި ވިއްކާތަންތަން ނޫން އެހެން ހުރިހާ ތަނެއް މަދުވެގެން ކުރިޔަށް އޮތް ދެ ހަފުތާގެ މުއްދަތަށް ބަންދުވާނެ ކަމަށް މެކްރޮން ވިދާޅުވިއެވެ.

ލޮކްޑައުން ކުރި ނަމަވެސް މަސައްކަތް ކުރާ މީހުންގެ ތެރެއިން ގޭގައި ތިބިގެން މަސައްކަތް ނުކުރެވޭ މީހުންނަށް އޮފީހަށް ނިކުމެވޭނެ ކަމަށް މެކްރޮން ވިދާޅުވިއެވެ. އަދި މާޗު މަހު އެ ގައުމު ލޮކްޑައުންކޮށްފައި އޮތްއިރާ ޚިލާފަށް، މިފަހަރުގެ ލޮކްޑައުނުގައި ސްކޫލުތައް ހުންނާނީ ހުޅުވާފައި ކަމަށްވެސް މެކްރޮން ވިދާޅުވިއެވެ.

މެކްރޮން ވިދާޅުވީ ވައިރަސް ފެތުރެމުންދަނީ ކަމާބެހޭ އެއްވެސް ފަރާތަކުން އަންދާޒާކޮށްފައިވާ މިންވަރަށްވުރެ ބާރު އަދި ހަލުވި މިނެއްގައި ކަމަށެވެ. އަދި ކުރިން ފަހަރަށްވުރެ މިފަހަރު ވައިރަހުގެ ބާރުގަދަ ކަމަށް މެކްރޮން ވިދާޅުވިއެވެ. އެެހެންކަމުން މުޅި ފްރާންސް އަނެއްކާވެސް ލޮކްޑައުން ކުރުމަށް ނިންމާފައިވާ ކަމަށާއި، ރައްޔިތުންގެ އެއްބާރުލުމާއެކު ވައިރަސް ފެތުރުން ކޮންޓްރޯލް ކުރެވި، މިކަމުން އަރައިގަނެވޭނެކަމުގެ ފުރިހަމަ ޔަގީންކަން އެބައޮތް ކަމަށްވެސް މެކްރޮން ވިދާޅުވިއެވެ.

ފްރާންސްގައި އެންމެ ފުރަތަަމަ ވައިރަސް ފެތުރެން ފެށުމާއެކު އަށް ހަފުތާގެ މުއްދަތަށް އެގައުމު ލޮކްޑައުން ކުރިއެވެ. ލޮކްޑައުނަށް މެއި މަހުގެ 11 ވަނަ ދުވަހުން ފެށިގެން ލުއިތައް ދޭން ފެށުމުން މަޑުމަޑުން އަނެއްކާވެސް ވައިރަސް ފެތުރުން އިތުރުވާން ފެށިއެވެ.

ފްރާންސްގައި އަންގާރަ ދުވަހު ވަނީ ވައިރަސް ޖެހިގެން 523 މީހަކު މަރުވެފައެވެ. މިއީ އޭޕްރީލް މަހުގެ ފަހުން އެގައުމުގައި އެއްދުވަހާ އެންމެ ގިނަ އަދަދެއްގެ މީހުން މިބަލީގެ މަރުވި ފުރަތަމަ ފަހަރެވެ. ޑޮކްޓަރުން ވަނީ އެގައުމުގެ އައިސީޔޫތައް ބަލި މީހުންނާއިގެން ފުރިދާނެ ކަމުގެ އިންޒާރުދީފައެވެ.

ފްރާންސްގައި މިހާތަނަށް އައިއިރު މިބަލީގައި 35،000ށްވުރެ ގިނަ މީހުން ވަނީ މަރުވެފައެވެ. ފްރާންސަކީ ހަތްވަނައަށް އެންމެ ގިނަ އަދަދެއްގެ މީހުން މިބަލީގައި މަރުވެގެން ރިޕޯޓުކުރަމުން އަންނަ ގައުމެވެ.

ފްރާންސްގައި ވައިރަސް ފެތުރުން ކޮންޓްރޯލް ކުރުމަށް މިމަހުގެ ކުރީކޮޅު ވަނީ ރޭގަނޑު ގަޑީގައި ކާފިއު ހިންގާފައެވެ. އެހެންނަމަވެސް އޮފިޝަލުން ބުނެފައިވަނީ އެފިޔަވަޅުތަކާއެކުވެސް ވައިރަސް ފެތުރުން ކޮންޓްރޯލްނުވާ ކަމަށާއި އެއަށްވުރެ ވަރުގަދަ ފިޔަވަޅުތަކެއް އަޅަންޖެހޭ ކަމަށެވެ.

ފްރާންސްގެ އިތުރުން ޖަރުމަނުންވެސް އަންނަނީ ކޮވިޑް-19 ގެ ކޭސްތައް އިތުރުވާން ފެށުމާއެކު ލޮކްޑައުނަކަށް ދާނެ ކަމަށް ބުނެފައެވެ. ޔޫރަޕުގެ އެންމެ ބޮޑު އިގުތިސޯދު އޮންނަ ދެ ގައުމުން އަނެއްކާވެސް ލޮކްޑައުނަކަށްދާނެ ކަމަށް އިއުލާން ކުރުމާއެކު ދުނިޔޭގެ ސްޓޮކް މާކެޓް ވަނީ ދަށަށްގޮސްފައެވެ.