ކަސްރަތުގެ ދާއިރާއަށް ކުރިމަތިވެފައިވާ ގޮންޖެހުންތަކާއި ގުޅިގެން މަޝްވަރާކުރުމަށް އެ ދާއިރާގަ މަސައްކަތްކުރާ ފަންނީ ފަރާތްތައް މަޖިލީހުގެ އިޖްތިމާއީ ކޮމިޓީއަށް ހާޒިރުކޮށްދެއްވުމަށް މަޖިލީހުގެ ރައީސް މުހައްމަދު ނަޝީދު އެދިވަަޑައިގެންފިއެވެ.
ޖަލްސާ ފައްޓަވަމުން ރައީސް ނަޝީދު ވިދާޅުވީ ކަސްރަތުގެ ދާއިރާގަ މަސައްކަތްކުރާ ފަންނީ ބޭފުޅުންނާއި ބައްދަލުކުރެއްވުމުން އެ ފަރާތްތަކުގެ މަސައްކަތަށް ކުރިމަތިވެފައިވާ ގޮންޖެހުންތައް ހިއްސާ ކުރައްވާފައިވާ ކަމަށެވެ. އަދި އެކަންކަން ހައްލު ކުރުމަށް އެ ފަރާތްތަކުން އެދޭ ކަމަށެވެ.
އަޅުގަނޑާ މިދިޔަ ދެ ދުވަހު ބައްދަލުވެއްޖެ އެކި އެކި ކަސްރަތު ކުރުމާއި ގުޅޭ ފަންނީ ބޭފުޅުން، ދެން އެބޭފުޅުންގެ އެއްއަތުން ބަލާ ނަމަ ކަސްރަތުގެ މަސައްކަތަށް ވެސް ވަރަށް ބޮޑަށް ބުރުއަރައިގެންދޭ. ހަމަ އެހެންމެ، އެ މަސައްކަތް ކުރުމަށް އެބޭފުޅުންވެސް ވަރަށް ބޮޑަށް އެބަ އެދޭ. ކަސްރަތުގެ މަސައްކަތަކީ އާއްމު ސިއްހަތާ ގުޅޭ ހަރަކާތެއް، މަސައްކަތެއް. އަޅުގަނޑުމެން މިތަނުން ބަލައިފިނަމަ ކަސްރަތު ހިނގާ މިންވަރާ އާއްމު ސިއްހަތަށް ހަރަދު ކުރަން ޖެހޭ މިންވަރާ ނުވަތަ އާސަންދައަށް ހަރަދުކުރަންޖެހޭ މިންވަރާ ހާއްސަކޮށް ދޮށީ އުމުރުގެ މީހުންނަށް ހަރަދުކުރަންޖެހޭ މިންވަރާ ކަސްރަތު ހިނގާ މިންވަރާ، މިކަމުގައި ބޮޑު ގުޅުމެއް އޮތް ކަމަށް ފެނޭ.މަޖިލީހުގެ ރައީސް މުހައްމަދު ނަޝީދު
ނަޝީދު ވިދާޅުވީ ގައުމިއްޔަތު ބިނާ ކުރުމުގައާއި ގައުމުގައި ފަހުރުވެރި ޒުވާނުން އުފެއްދުމުގައި ކަސްރަތުގެ ދައުރު ވަރަށް ބޮޑު ކަމަށް ދެކިވަޑައިގަންނަވާ ކަމަށެވެ. އެހެންކަމުން ކަމާ ބެހޭ ފަރާތްތައް އިޖްތިމާއީ ކޮމިޓީއަށް ހާޒިރުކޮށް މަޝްވަރާކުރުމަށްފަހު ކޮމެޓީގެ ނިންމުމެއް ތަޅުމަށް ހުށައެޅުމަށް އެމަނިކުފާނު އެދިވަޑައިގެންނެވިއެވެ.
