ނ. ކެނދިކުޅުދޫ އިމާރާތް ކުރަން ހަމަޖެހިފައިވާ ޖޫނިއަރ ކޮލެޖްގެ މަސައްކަތް 2021 ވަނަ އަހަރު ފެށޭނެ ކަމަށް ލަފާ ކުރެވޭ އެރަށު ކައުންސިލްގެ ރައީސް ވިދާޅުވެއްޖެއެވެ.
ކެނދިކުޅުދޫގައި އިމާރާތް ކުރަން ހަމަޖެހިފައިވާ ޖޫނިއަރ ކޮލެޖް ގާއިމް ކުރުމުގެ މަޝްރޫއު އާ ބެހޭ މައުލޫމާތު ރާއްޖެ އެމްވީއާ ހިއްސާ ކުރައްވަމުން އެ ރަށު ކައުންސިލްގެ ރައީސް އަލީ ޝަމީމް ވިދާޅުވީ އެ ރަށުގައި މަތީ ތައުލީމު ހާސިލް ކުރުމަށް ނުހަނު ބޮޑެތި ގޮންޖެހުންތަކާ ކުރިމަތި ވަމުންދާ ކަމަށާއި ގިނަފަހަރަށް މަތީ ތައުލީމު ހާސިލް ކުރަން ދާން ޖެހެނީ ރަށުން ބޭރަށް ކަމަށެވެ.
ކޮވިޑް–19 އާ ގުޅިގެން މި މަޝްރޫއުގެ މަސައްކަތް ހުއްޓިފައިވާއިރު މިއީ މިނިސްޓްރީ އޮފް ހަޔަރ އެޑިއުކޭޝަން އިން ކުރިއަށް ގެންދާ މަޝްރޫއަކަށް ވީއިރު މިހާރު މި މަޝްރޫއުގެ ކޮންސެޕްޓް ޕޭޕަރ ވަނީ ނިމިފައެވެ. އަދި މިހާރު ވަނީ ކޮންސެޕްޓްގެ ކުރެހުމާއި އާއި ކޮންސަލްޓަންޓްގެ ޓީއޯއާރް ނިންމާ އިއުލާނު ކުރުމުގެ މަރުހަލާގައެވެ. މީގެ އިތުރުން ކޮލެޖް އިމާރާތް ކުރަން ބޭނުންވާ ބިން ވެސް ވަނީ ހަމަޖެހިފައެވެ.
އަލީ ޝަމީމް އިތުރަށް ވިދާޅުވީ މަސައްކަތް ހުއްޓިފައިވީނަމަވެސް މި ހާލަތުގެ ސަބަބުން ސަރުކާރުގެ ނިންމުމަށް އިހުތިރާމް ކުރާ ކަމަށާއި އެކަމާމެދު އެެއްވެސް ޝަކުވާއެއް ނެތް ކަމަށެވެ. އަދި މިހާރުވެސް ހުއްޓުމެއް ނެތި އެރަށުގައި ފަސް ޕްރޮޖެކްޓެއް ހިނގަމުންދާ ކަމަށާއި ރަށްރަށުގެ ތަރައްގީ އަށް ސަރުކާރުން މިފަދަ ހާލަތެއްގައި ވެސް ކޮށްދެއްވަމުން ގެންދަވާ މަސައްކަތްތަކަށް ޝުކުރު އަދާ ކުރާ ކަމަށެވެ. އަދި 2021 ވަނަ އަހަރު މި ކޮލެޖް އެޅުމުގެ އަމަލީ މަސައްކަތް ކުރަން ފެށޭނެ ކަމަށް ބެލެވޭ ކަމަށް އޭނާ ވިދާޅުވިއެވެ.
އަދި އުއްމީދަކީ އެ ކޮލެޖް އެޅި ރަށުގެ އެންމެހާ ދަރިވަރުންނަށް މަތީ ތައުލީމު ފަސޭހަކަމާއެކު ހާސިލް ކުރުމުގެ ފުރސަތު ލިބިގެން ދިޔުން ކަމަށާއި މި ކޮލެޖްގެ ސަބަބުން އެހެން ރަށްރަށުން ދަރިވަރުން އައިސް ރަށުގެ މާލީ ތަނަވަސްކަން އިތުރު ވެގެން ދިޔުންކަމުގައި ޝަމީމް ވިދާޅުވިއެވެ. ދަނާލަކާއެކު ގާއިމް ކުރެވޭ މި ކޮލެޖުން ތަފާތު އެކިއެކި ރޮނގުން ކިޔެވޭނެ ކަމަށާއި އޭގެތެރޭގައި ފަތުރުވެރިކަމުގެ ދާއިރާ، މަސްވެރިކަން، އަދި ޑައިވިންގ ފަދަ ދާއިރާތަކުން ފަސޭހަ ކަމާއެކު ތައުލީމު ހާސިލް ކުރުމުގެ ފުރުސަތު ހުޅުވިގެން ދާނެ ކަމަށް ވެސް އޭނާ ވިދާޅުވިއެވެ. މި ކޮލެޖްގެ ސަބަބުން އެރަށުގެ ތައުލީމީ ދާއިރާށް ބޮޑެތި ބަދަލުތަކެއް އަންނާނެ ކަމަށް އޭނާ ފާހަގަކުރެއްވިއެވެ.
