ދަނޑުވެރިކަން ކުރިއެރުވުމަށް ކުރަމުންދާ މަސައްކަތުގެ ދަށުން ''ދަނޑުވެރިންގެ ދުވަހުގެ ޚާއްސަ ފޯރަމް'' ފަށައިފިއެވެ.

ދަނޑުވެރިކަމާ ބެހޭ މިނިސްޓްރީން ބުނީ ފޯރަމްގެ މައިގަނޑު މަގުސަދަކީ މިނިސްޓްރީގެ އެގްރިކަލްޗަރ ޑިޕާޓްމަންޓުން ދަނޑުވެރީންނަށާއި އާންމުންނަށް ފޯރުކޮށްދެމުންދާ ޚިދުމަތްތައް އިތުރަށް ފުރިހަމަ ކުރުމަށް، ކަމާ ގުޅުންހުރި ފަރާތްތަކުގެ ޚިޔާލާއި މަޝްވަރާ ހޯދުން ކަމަށެވެ.

ޒޫމް މެދުވެރިކޮށް އޮންލައިންކޮށް ކުރިއަށް ގެންދާ މި ފޯރަމްގައި ދަނޑުވެރި ރަށްރަށުގެ ކައުންސިލް މެންބަރުންނާއި، ދަނޑުވެރިންގެ މަންދޫބުންނާއި، ވިޔަފާރީގެ އުޞޫލުން ދަނޑުވެރިކަން ކުރަން ދޫކޮށްފައިވާ ފަޅުރަށްތަކުގެ މަންދޫބުން އަދި ދަނޑުވެރިކަމާ ގުޅުން ހުރި ދައުލަތުގެ އެކި މުއައްސަސާތަކާއި ދަނޑުވެރި ކޯޕަރޭޓިވްސްތަކާއި ދަނޑުވެރި ކަމަށް ބޭނުންވާ ތަކެތި ވިއްކުމުގައި ހަރަކާތްތެރިވާ ވިޔަފާރިތަކުން ޖުމްލަ 45 ފަރާތަކުން ބައިވެރިވެފައިވެއެވެ.

މިނިސްޓްރީން ބުނީ ދެ ދުވަހުގެ މުއްދަތަށް ކުރިއަށް ގެންދާ މި ފޯރަމްގައި އަލަށް އުފައްދާފައިވާ ޕެސްޓިސައިޑް ގާނޫނާއި ގަވާއިދުތަކުން ދަނޑުވެރިކަމުގެ ވައްޓަފާޅިއަށް އަންނާނެ ބަދަލުތަކާއި، މިނިސްޓްރީގެ އެގްރިކަލްޗަރ ޑިޕާޓްމަންޓުން ދޭ އާންމު ޚިދުމަތްތަކާއި، ދަނޑުވެރިކަން ކުރިއެރުވުމަށް މިނިސްޓްރީން ހިންގަމުން ގެންދާ މަޝްރޫއުތަކާއި ބެހޭ ގޮތުން މަޝްވަރާ ކުރާނެ ކަމަށެވެ. އަދި މި އަހަރު ރައީސުލްޖުމްހޫރިއްޔާ އުފައްދަވާފައިވާ ސަރުކާރުގެ %100 ހިއްސާވާ ކުންފުނީ، އެގްރޯ ނެޝަނަލް ކޯޕަރޭޝަން އިން ދަނޑުވެރިންނަށް ފޯރުކޮށްދޭނެ ޚިދުމަތްތަކާއި ބެހޭ މައުލޫމާތު ހިއްޞާކޮށް، އެ ޚިދުމަތްތައް އިތުރަށް ފުރިހަމަ ކުރުމަށް ފޯރަމްގެ ބައިވެރިންގެ ޚިޔާލު ހޯދާނެއެވެ.

ދަނޑުވެރިންގެ ދުވަސް ފާހަގަ ކުރުމަށް މިނިސްޓްރީގެ ފަރާތުން ދަނީ ތަފާތު ހަރަކާތްތަކެއް ހިންގަމުންނެވެ. މި ހަރަކާތްތަކުގެ ތެރޭގައި ހިމެނޭ ދަނޑުވެރިކަމުގެ މައުލޫމާތު ދިނުމުގެ އޮންލައިން ސިލްސިލާ ޕްރޮގްރާމް 5 އޮކްޓޯބަރ އިން 13 އޮކްޓޯބަރަށް ވަނީ ކުރިއަށް ގެންގޮސްފައެވެ.

މީގެ އިތުރުން މިނިސްޓްރީން ބުނީ އާންމުންނަށް ބައިވެރިވެވޭނެހެން ފޭސްބުކް ޕޭޖް މެދުވެރިކޮށް 13 އޮކްޓޮބަރުން 15 އޮކްޓޫބަރުގެ ނިޔަލަށް، ދުވަހާ ގުޅޭ ޚާއްސަ ކުއިޒް މުބާރާތެއް މިހާރު ކުރިއަށްދާ ކަމަށެވެ.

ދަނޑުވެރިންގެ ދުވަހު، ހއ. މޮޅަދޫ، ވަށަފަރު އަދި އުލިގަމުގައި ގަސް ބެހުމުގެ ޙަރަކާތެއް ކުރިއަށް ގެންދިއުމަށާއި ރާއްޖޭގެ ރުއްތަކުގެ ހާލަތު ރަނގަޅު ކުރުމަށް ރުކުގެ އައު ޖިލެއް އުފެއްދުމަށް ބޭނުންވާނެ މުޑުވައް އުފެއްދުމަށް ޚާއްސަކޮށް ހަނިމާދޫ އެގްރިކަލްޗަރ ސެންޓަރުގައި 100 ރުކުގެ ރުއް ދަނޑެއް އެޅުމަށް ވަނީ ހަމަޖެހިފައެވެ.

މި ހިނގާ 2020 ވަނަ އަހަރުން ފެށިގެން ކޮންމެ މީލާދީ އަހަރެއްގެ އޮކްޓޯބަރ މަހުގެ 15 ވަނަ ދުވަހަކީ ދިވެހި ރާއްޖޭގެ ދަނޑުވެރިންގެ ދުވަހުގެ ގޮތުގައި ފާހަގަކުރުމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ނިންމަވާފައެވެ.

މި އަހަރުގެ ދަނޑުވެރިންގެ ދުވަހު ބޭނުން ކުރުމަށް ކަނޑައަޅާފައިވާ ޝިއާރަކީ "ފަރުދީ ދަނޑުވެރިކަން - ކާނާގެ ޔަގީންކަން" މި ޝިއާރެވެ.