ރާއްޖޭގެ ރަށްތަކުގެ ފަޅުތަކުގައި، ގެ އަޅައިގެން ދިރިއުޅެވޭނެ ގޮތުގެ ކޮންސެޕްޓެއް ތައްޔާރު ކޮށްފައިވާ ކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
މީގެކުރިން މިނިސްޓަރ ވަނީ ރާއްޖޭގައި މީހުން ދިރިއުޅޭ ރަށް ރަށުގެ ފަޅު ތެރޭގައި ގެ ހަދައިގެން ދިރިއުޅުމުގެ ވިސްނުންފުޅު ގެންގުޅުއްވާ ކަމަށް ވިދާޅުވެފައެވެ. އަދި މިކަމާއި ގުޅިގެން ގިނަ ފާޑުކިއުންތަކެއް ވެސް އަމާޒުވެގެން ދިޔައެވެ.
މިނިސްޓަރ ވަނީ ހޯމަ ދުވަހު ބިނާވެށި ޕްލޭން ކުރުމާއި ހިންގުމުގެ ބިލާއި ގުޅިގެން މަޖިލީހަށް މައުލޫމާތު ދެއްވުމަށް ވަޑައިގެން މިކަމާއި ގުޅިގެން ވާހަކަ ދައްކަވާފައެވެ. އަސްލަމް ވިދާޅުވީ މި ހިޔާލަށް އަމާޒުވި ފާޑުކިއުންތައް ނެންގެވީ 'ޕޮޒިޓިވް' ކޮށް ކަމަށެވެ.
ރާއްޖޭގައި ހުރިގާ ރަށެއްގެ ހިކިފަސް ބިން އެއްކޮލުމުން 600 ސްކޮއަރ ކިލޯ މީޓަރު އަރާ ކަން ފާހަގަކުރައްވާ މިނިސްޓަރ ވިދާޅުވީ އޭނާ ގަބޫލުކުރައްވާ ގޮތުގައި ރާއްޖޭގެ ބިމުގެ ގޮތުގައި ހިކިފަސް ބިން ނޫން ބިން ވެސް ބަލަން ޖެހޭ ކަމަށެވެ.
ފަތުރުވެރިކަމުގެ ސިނާއަތުގައި ރަށާއި ގުޅިފައިވާ ފަޅުވެސް ބިމުގެ ގޮތުގައި ގުނާއިރު، މިކަން މިސާލެއްގެ ގޮތުގައި ނަންގަވަމުން އޭނާ ވިދާޅުވީ ވަކި ވަރަކަށް ވުރެ ތިލަ ކޮންމެ ބިމަކީ ރާއްޖޭގެ ބިމުގެ ގޮތުގައި ކަނޑައަޅަން ޖެހޭ ކަމަށެވެ.
ސަބްމަރޖްޑް ލޭންޑް ވެސް އެއީ ލޭންޑުގެ ގޮތުގައި އަޅުގަނޑުމެން ބޭނުން ކުރަމުން އެބަގެންދަން. އެއީ ލޭންޑުގެ ގޮތުގައި ޑިފައިން ނުކޮށް. އަޅުގަނޑުމެން ގަބޫލުކުރަނީ މިއީ އަޅުގަނޑުމެންނަށް މިއަދު އާދެވިފަ މިތިބަ ހިސާބަކީ އެއަށްވެސް ޑެފިނީޝަން އެއް އެބަ އަންނަން ޖެހޭ. ބިމުގެ ގޮތުގައި އަޅުގަނޑުމެން އެ ބޭނުން ކުރާ ކަމަށް ވަންޏާ. އެހެންވީމަ ބިމުގައި އަޅުގަނޑުގެ ވިސްނުމުގައި، އެންމެ ރަނގަޅަށް ވިސްނާފަ އޮތް ކަމެއް ރަށަކާއި ގުޅިފައިވާ ބިމެއް ސަބްމަރޖްޑް ބިމެއް، އޭގައި ވަކި ވަރަކަށް ވުރެ ފުން ނުވާ، ވަކި ވަރަކަށް ވުރެ ތިލަ ކޮންމެ ބިމަކީ އެއީވެސް ރާއްޖޭގެ ބިމުގެ ގޮތުގައި.މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް
އެ ބިންތައް ތަފާތު އެކި ބޭނުންތަކަށް ބޭނުން ކުރެވޭނެ ކަމަށް ވިދާޅުވެ އަސްލަމް ވަނީ ފަޅަކީ ބިމުގައި ހިމެނޭ ތަނެއްގެ ގޮތުގައި ކަނޑައަޅައިފި ނަމަ، އެތަނުގައި ކުރެވޭނެ ކަންތައްތަކާއި ނުކުރެވޭނެ ކަންތައްތައްވެސް 'ޑިފައިން' ކުރަން ޖެހޭނެ ކަމަށް ވިދާޅުވެފައެވެ. އަދި މިގޮތަށް ކަނޑައެޅިއްޖެ ނަމަ، ރާއްޖޭގެ ބިމުގެ މުއްސަނދިކަން ވަރަށް ބޮޑުތަނުން އިތުރު ވެގެންދާނެ ކަމަށެވެ.
ލެގޫންގައިވެސް އެގޮތަށް އަޅުގަނޑުމެންނަށް ކުރެވޭނެ ކަންތައްތަކާއި ނުކުރެވޭނެ ކަންތައްތައް ޑިފައިންކޮށްފަ، ޕްލޭނެއް، ރެގިއުލޭޝަނެއްގެ ތެރެއިން އަޅުގަނޑުމެން ކޮންޓްރޯލްކޮށްފިނަމަ އަޅުގަނޑު ގަބޫލުކުރަނީ އަޅުގަނޑުމެންގެ ބިމުގެ މުއްސަނދިކަން ވަރަށް ބޮޑުތަނުން އިތުރުވެގެންދާނެ ކަމަށް ރާއްޖޭގަ.މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް
އަސްލަމް ވިދާޅުވީ އޭނާ ގަބޫލު ކުރައްވާ ގޮތުގައި 'ސަބްމަރޖްޑް ' ލޭންޑަކީ އަގެއް ހުރި އެއްޗެއްގެ ގޮތުގައި ހެދޭނެއެވެ. މިހާތަނަށް ދުނިޔޭގެ އެއްވެސް ހިސާބެއްގައި މިކަން 'ލަރޖް ސްކޭލެއްގައި' ނުކުރި ނަމަވެސް، ތިމާވެއްޓަށް އަންނަ ބަދަލުތަކަށް ވިސްނައިގެން ދިރިއުޅެވޭނެ ތަނަކަށް ހެދުމުގެ ޓެކްނޮލޮޖީ ހުރި ކަމަށް އޭނާ ވިދާޅުވިއެވެ. އަދި މި ފަދަ ބިންތަކުގެ ތެރޭގައި ކޮމަރޝަލް އުސޫލުން ދޫކުރެވޭ ބިން ވެސް ހުންނަން ޖެހޭނެ ކަމަށް އޭނާ ވިދާޅުވިއެވެ.
ޖަލްސާގައި އިތުރަށް ވާހަކަ ދައްކަވަމުން މިނިސްޓަރ ވިދާޅުވީ މި ފަދަ މޮޑެލް އެއް ހަދާފައިވާ ކަމަށެވެ. އެ މޮޑެލް މުޅިން ފުރިހަމަ ނުވި ނަމަވެސް ކޮންސެޕްޓެއް ހެދިފައިވާ ކަމަށެވެ.
އަސްލަމް ވިދާޅުވީ މި ކޮންސެޕްޓު އަޅާކިޔަން ޖެހޭނީ ބިން ހިއްކުމަށްފަހު ލިބޭ ހިކިފަސް ބިމުގެ އަގާއި ފެން މަތީގައި ދިރިއުޅުމަށް ދާ އަގާއި އަކަފޫޓަކަށް ދާ އަގަށް ކަމަށެވެ. އަދި ކުރިއަށްދާނީ ކިހިނެއްތޯ އެނގޭނީ އަގުގައި ހުރި ތަފާތު ބެލުމަށްފަހު ކަމަށެވެ.
މިއީ ރާއްޖޭގެ ބިމުގެ ދަތިކަމަށް ލިބޭ ހައްލެއް ކަން ފާހަގަކުރައްވާ އަސްލަމް ވިދާޅުވީ މި ކޮންސެޕްޓާއި އެއްގޮތަށް މަސައްކަތް ކުރެވިއްޖެ ނަމަ ބިން ހިއްކަން އޮންނަ ޑިމާންޑް ކޮންމެވެސް ވަރަކަށް ކުޑަވެގެންދާނެ ކަމަށެވެ.
